Saraayi na Haaghiri
16
Kwo riibhagha riyo, Saraayi muka Abhuramu, naare akeere komwibhorera mosubhe waache omoona. Ibheere naare no omubhaghati umu o ghikari Omomiisiri, eriina reeche Haaghiri. 2 Niho Saraayi akamobhoorera Abhuramu akabhugha, “Weeche kubha Omutëmi Waryobha nanyiimiri orwibhoro. Mbe! Neghoghusabha, omwimoki omubhaghati waane Haaghiri, oghi omisi nawe! Hamwabhe neghotora kubhöna omoona kohetera ghokooche.” Abhuramu aghiishererani na amiihëëbhö ghayo gha Saraayi. 3 Niho Saraayi akamuha Abhuramu omubhaghati waache Haaghiri, abhe mukaache. Hano ghayo gharweriire, Abhuramu naare amariri emeeka ikomi mo‑se e Kanaani.4 Mbe, Abhuramu akamisi na Haaghiri aghaghëgha anda. Hano amënyiri kubha n‑inda anyi, aghasëëma komutaraaha kaabhari yaache. 5 Niho Saraayi akamobhoorera Abhuramu akabhugha, “Iye niiye okoreha amabhe ghano niköriiru. Eni nekoheere omubhaghati waane, amare hangʼu akiihööcha aghasëëma ghuntaraaha. Omutëmi Waryobha niwe aghototenera ekiina eni na niiye!”
6 Abhuramu akamobhoorera akabhugha, “Omubhaghati waacho mo‑mabhökö ghaacho anyi, nomukörërë kinya okorighi eghoghuchömëra.” Niho Saraayi akamunyaaki mbagha akangʼösa.
Kwibhoru kwo Ishimaeri
7 Marayika o Mutëmi Waryobha akamorighi Haaghiri haghuhe ne ekerika iyo mwibhara. Ekerika kiyo nkeere mo‑nchëra ino ere erëërëkëra Shuuri. 8 Marayika o Mutëmi Waryobha akamobhoorera akabhugha, “Haaghiri, omubhaghati o Saraayi! Hayi okoru? Na hayi oghuye?”
Haaghiri akamugharokeri akabhugha, “Nekomungʼösa ghooko waane Saraayi.”
9 Marayika o Mutëmi Waryobha akamobhoorera akabhugha, “Gharuka o‑nyaghokoro, na ubhe oramosooka. 10 Wiiki nekorwengera orwibhoro roocho chwee, koru bhataaghotora korubhara kwo bhwaru bhoobho.”
11 Niho marayika o Mutëmi Waryobha akamobhoorera akabhugha, “Iye ibheere nwihööchiri, nokwibhora omoona o ghesiite. Eriina reeche omoroke Ishimaeri,a gho kubha Omutëmi nooghwire eriirera na nyaako yaacho. 12 Ishimaeri uyo, naakubha kinya atikere e mwitereghob kwo bhaato. Nakurööna na mooto woose na mooto woose nakurööna nawe. Iwe eriimanya reeche ndeekubha re riihë na abhahiiri bhaache.”
13 Mbe, Haaghiri akiihëëbha kubha, “Hëënë nemorooche hano uno akondighi!” Gho ghayo, akamuha eriina Omutëmi Waryobha uno are arasiikëra nawe kubha, “Iye n‑Eryobha rino rekorighi.” 14 Nikyo ꞉ghiighëriri ekerika kiire ghekabherekeru Bheeri‑Rahayi‑Rooyi.c Ekerika kiyo nkeenyi ghate e meghya ghe Kateeshi na Bhereeti.