Eriiraghano re Ryobha na Abhuramu
15
Amangʼana ghayo ghaache koheta,
Omutëmi Waryobha akamobhoorera Abhuramu mo‑marighi,
akabhugha,
“Oo Abhuramu!
Otatiina!
Eni neghoghokengera kinya angubha,
na atuho yaacho neekubha inkoro chwee.”
2 Niho Abhuramu akabhugha,
“Oo Mutëmi Waryobha!
Neke okuuha,
na neeni ntighöötë omoona uno akuucha ghungabha?
Kana Eriyeseeri Omutamaasiko,
omusësë waane uno,
niwe akuucha ghughabha ebheghiro bheene bhyose!
3 Mööhi!
Gho kubha tuheere orwibhoro,
nekorighibhu kubha omutamishi uno ibhwiru mo‑nyumba yaane,
niwe akuucha ghungabha!”
4 Omutëmi Waryobha akamobhoorera wiiki akabhugha,
“Omooto uyo,
taghoghughabha.
Amare omoona waacho uno okwibhora iye mwene,
niwe akuucha ghoghughabha.”
5 Akamara Mutëmi akamohoroki anche,
akamobhoorera akabhugha,
“Mööhi ighoro Mwishaaro!
Bhara chanchöta aribha oghotora ghochibhara.
Hangʼu nibhu orwibhoro roocho rookubha.”
6 Abhuramu akamokumi Omutëmi Waryobha,
woose kwo ngʼana iyo akamubhara kubha omuhëënë ambërë yaache.
7 Omutëmi akamobhoorera wiiki akabhugha,
“Eni n‑Omutëmi Waryobha,
uno ꞉neekoruusiri Uru,
mo‑se e Bhakaritaayo,
kubha nekuhë ase ino,
ibhe aghabho yaacho.”
8 Niho Abhuramu akamobhoori akabhugha,
“Oo Omutëmi Waryobha!
Nibhu neghuköra nimënyë kubha eni nekoyighabha ase ino?”
9 Omutëmi akamugharokeri akabhugha,
“Undëëtërë arööri,
na amweti,
na anguruki,
choose chibhe che meeka etato.
Undëëtërë asarari ne ereena re gheghuuti.”
10 Abhuramu akamurëëtëra bhiyo bhyose.
Akabhighöögha na kobhibhaarura amabhaara abhere ke imu imu,
aghachitëta emikarara ebhere chereerekerana.
Amare ebhinyönyi,
tabhibharwire amabhaara abhere.
11 Hano chamatoonyi ꞉chiichiri ghwikara mo‑chataasa chiyo,
aghachihëëbha.
12 Hano eryobha reere reghaye ghosikera,
Abhuramu aghaghöötu na chandöörö indito chwee.
Ekengʼuuri ghe kuruu na ghe ghotiini ghekamokundekeri.
13 Niho Omutëmi akamobhoorera,
“Iye!
Umënyë obhuhëënë kubha orwibhoro roocho ndookubha abhaghëni mo‑se ino etaanyi eyaabho,
mbaakubha abhasësë,
na mbakunyaakibhu kwo riibhagha re meeka amaghana ane.
14 Koru hangʼu na ase yiire bhaakubha bharayihökëri,
eni nekoyetenera ekiina.
Mbakumara mbaakoru mo‑se iyo bhaanyi no obhwame bhwaru chwee.
15 Iye noghwikara emeeka myaru.
Nooghoku kwo murëmbë na nokoryeku bhoheene.
16 Mo‑rwibhoro roocho ro kane ndoghugharuka mo‑se ino,
gho kubha amasari gha Bhaamoori ghakeere ghataamara ghahikeerana.”
17 Hano eryobha reere rimariri ghosikera,
ne ekengʼuuri ghekaacha,
rekarwera eriinata reraghunda eryoki,
no orumëmë ro mororo roraaka,
okaheta ghateghate e mabhaara gha chaanyama chiire.
18 Orosiko ruyo,
Omutëmi Waryobha aghaköra eriiraghano haghirohamu na Abhuramu arabhugha,
“Ase ino,
nekoyiha orwibhoro roocho,
korwera eribhaara re ghitaaro ke Miisiri,
mbagha kohika mo‑ghitaaro eghekoro ke Ebhuraati.
19 Nekobhaha ase e Bhakeeni,
ne e Bhakeniisi,
ne e Bhakatimooni,
20 ne e Bhahiti,
ne e Abhabhereesi,
ne Bharebhaayi
21 ne e Bhaamoori,
ne e Bhakanaani,
ne e Bhaghirighaashi,
ne e Bhayebhuusi.”