Bhowaasi ˆakamokwira Ruutu
4
Bhowaasi aghaye ahaghiro hano bhahaakörëra ekiina mo‑kehita ke moghya, aghiikara hayo. Akamara omohiiri o Erimereeki uno Bhowaasi are amutariri kubha n‑o haghuhe akaheta hayo. Bhowaasi akamobherekera akabhugha, “Nuuche hano mohiiri waane.” Mbe, omooto uyo woose akaacha, aghiikara hayo. 2 Achekumara Bhowaasi akabherekera abhagharuka ikomi koru mo‑moghya uyo, akabhabhoorera bhoose bhiikare hayo.3 Niho Bhowaasi akamobhoorera omohiiri waache uyo o haghuhe akabhugha, “Ibheere Nawomi uno agharokiri koru mo‑se e Mowaabhu, niisheriiri kuhaana omoghondo uno ore o mohiiri wiito Erimereeki. 4 Mbe, eni nerooche ngʼoni nekumënyi angʼana ino. Ibheere aribha okwënda kowiimoki omoghondo uno, obhughe ambërë e bhagharuka na abhaato bhano. Wiiki aribha otakowenda obhughe, gho kubha omweya o mumbërë o kowotingori n‑owaacho no o kabhere n‑o waane.”
Iwe aghagharokeri akabhugha, “Eni nekowotingori.”
5 Ibheere Bhowaasi akamobhoorera akabhugha, “M‑bhoheene, amare orawiimoki omoghondo uyo koru o‑Nawomi, umënyë kubha nookubha omughëghiri omosino Ruutu o Mowaabhu, gho ghiri obhooki eriina re mosiri ne ebheghiro bheeche.”
6 Ache kooghu amangʼana ghayo, omohiiri uyo o haghuhe aghagharokeri akabhugha, “Aribha hangʼu keenyi, eni ntekowotingori omoghondo uyo, gho kubha nerighi neghusari aghabho yaane. Ngʼoni omweya waane o kowotingori nekuhë iye, gho kubha eni nteeghotora kowotingori.”
7 Mo‑chaasiko chiyo mo‑se e Isiraeri, kurëngʼaana na asughara yaabho, aribha abhaato ꞉bhëëndiri ghotingori hande ghokerani egheghiro, omooto uyo naare arëndëru ërëki ekyërëkërëri gho koruusi eghekwera keeche na komuha mughëndi waache. Gho kyërëkërëri kiyo, Abhiisiraeri ꞉mbëërëkiri kubha mbiishereriini kwo mangʼana ghayo. 8 Mbe, omooto uyo akamobhoorera Bhowaasi akabhugha, “Ibheere ˆneghaghotighera iye ughëghë omoghondo uyo.” Niho akaruusi eghekwera keeche akamuha Bhowaasi.
9 Niho Bhowaasi akabhabhoorera abhagharuka na abhaato bhoose bhano ꞉bhaare hayo akabhugha, “Reero inyu n‑abhiibhateri bhaane moonyi. Morooche kubha ˆnighëghiri bhyose bhino bheere bhe Erimereeki na abhaana bhaache Kiriyoni na Marooni, koru o‑Nawomi. 10 Wiiki omosino Ruutu o Mowaabhu muka Marooni, ˆnekamughëgha abhe mukari waane. Amiishererani ghano ngaghuköra ebheghiro bhe mosiri ghusaagha kwo bhaato bhaache ne eriina reeche retabhora mo‑bhahiiri bhaache na mo‑moghya uno. Reero ino inyu n‑abhiibhateri bhaane gho ghano ghaköruru.”
11 Mbe, abhagharuka bhano ꞉bhaare mo‑kehita ke moghya na abhaato bhoose bhano ꞉bhaare hayo bhaghagharokeri akabhugha, “M‑mahëënë itu n‑abhiibhateri bhaacho toonyi. Omutëmi Waryobha amotoori omoghiikoro uno, ayi akwibhorere abhaana bhaaru kinya Raheeri na Reeya, bhano ꞉bhaare simoka e bhaana bha Isiraeri. Na niiye wiitabheru mo‑rwibhoro ro Ebhuraati, wiiki ubhe na aghongo mo‑bhaato bha Bheserehemu. 12 Abhaana bhano Omutëmi Waryobha aghokuha, kohetera omoghiikoro uno, bhatubhaane na abhaana bha Bhereesi, bhano Tamaari amwibhooriire Yuuta.”a
Orwibhoro ro Bhowaasi
13 Ibheere Bhowaasi akamwimoki Ruutu akabha mukaache. Mbe, Omutëmi Waryobha akamukangata Ruutu aghaghööta anda, aghitoora omoona o ghesiite. 14 Ibheere abhakari bha moghya uyo bhakamobhoorera Nawomi bhakabhugha, “Aghongibhu Omutëmi Waryobha uno ataghotighiri reero otaanyi no omohiiri o haghuhe o ghoghotugha. Wiiki omoona uyo abhe na aghongo inkoro mo‑Bhiisiraeri. 15 Iwe naghoghugharokeri obhuhöru na ghoghotugha mo‑bhokungu bhoocho, gho kubha omukamoona waacho uno aghosiighiri, uno anyi no obhwëra ghokera abhaana bha ghesubhe mohungate, niwe amwibhwire.” 16 Ibheere Nawomi akamughëgha omoona uyo akamotoora mo‑ghekubha keeche, akabha omurëri waache.
17 Abhaatani bhaache bha ghikari bhakamoroka omoona uyo eriina Obheetib bharabhugha, “Omoona niibhwiru o‑Nawomi.” Akamara Obheeti akiibhora Yeese, uno ibhwire Tawuti.
18 Chino nicho chanyiibhoro che Bhereesi,
Bhereesi akiibhora Hesirooni.
19 Hesirooni akiibhora Raamu,
na Raamu akiibhora Aminataabhu.
20 Aminataabhu akiibhora Nashooni,
na Nashooni akiibhora Sarimooni.
21 Sarimooni akiibhora Bhowaasi,
na Bhowaasi akiibhora Obheeti.
22 Obheeti akiibhora Yeese,
na Yeese akiibhora omutëmi Tawuti o Bhiisiraeri.