Surana Suro
Yohane
au nguru-nguruna
1
1 Sura ide mampololita kana i Ngkora au mopaara katuwo. Ngkora iti, arami hangko i nguru-nguruna, kihadimi, kiita matami, kisabikimi hai kipetobomi. 2 Au mopaara katuwo iti hawemi i dunia ide, hai kiitami. Ido hai kipakanotoakau kahemaNa. Kisabikimi kaIana au mopaara katuwo maroa au bara mokahopoa. Ia au ara hihimbela hai Pue Ala Umanta, hai au rapatongawami irikami.3 Apa au kiita hai kihadimi, iti au kipahaweakau bona ikamu wori mepoinalaikau hai peisakau mohintuwu hai ikami i lalu pohintuwuki hai Pue Ala Umanta hai Yesu Kerisitu AnaNa. 4 Kiukiakau ide bona rumihi kamatananta.
Ane moisake Pue Ala, ina mokabahake babehianta au kadake
5 Idemi bambari au kihadi hangko i Yesu hai au kipahaweakau: Pue Ala iami pewangka. Iria bara ara kamakaindi.
6 Ane tauli mohintuwuke hai Pue Ala, moleri tuwoto manike i lalu kamakaindi, modongkomoke hai barake mampeulai paturo au tou. 7 Agaiana ane tuwoke i lalu kamabaa, nodo Pue Ala ara i lalu kamabaa, batenta mohintuwu hadua hai hadua, hai wahena Pue Yesu, Anana Pue Ala, ina mobahoike hangko i dosanta.
8 Ane tauli bara ara dosanta, modongkomoke hai barake mopailalu paturo au tou. 9 Ane mopangakuke dosanta, Pue Ala ina mopabukei dandiNa irikita, hai Nababehiake apa au manoto: Ia moampungi dosanta, hai mobahoi lalunta hangko i hinangka dake.
10 Ane tauli barake madosa, mampopodongkomoke Pue Ala, hai NgkoraNa bara ara i lalunta.