2
1 Anangku, ide kuukiakau bona ineekau mobabehi dosa. Agaiana ane ara au mobabehi dosa, arami hadua au mamperuruike i lindona Pue Ala Umanta, iami Yesu Kerisitu au manoto. 2 Hai Iami au mate mewali pahuruna watanta bona Pue Ala moampungi dosanta. Hai bara pea dosanta au Nahuru, agaiana dosanda wori tauna i humalele dunia.Ane moisake Pue Ala, ina mampeulaike hawaNa hai mampokaahike ranganta
3 Ane mampeulaike hawana Pue Ala, iti au mopakanoto kamoisanta mpuu Pue Ala. 4 Tauna au manguli, “Moisana Pue Ala,” agaiana barahe mampeulai hawaNa, modongkomohe hai barahe mopailalu paturo au tou. 5 Tauna au mampeulai lolitana Pue Ala, ihira tou-tou mpuu mampokaahihe Pue Ala. Iti au mopatongawa pohintuwuta hai Pue Ala. 6 Hema-hema au manguli mohintuwuhe hai Pue Ala, babehianda hangangaa moula babehiana Kerisitu.
7 Halalu au kupokaahi, hawa au kuukiakau ide, bara hawa au wou. Hawa ide, mahaemi rapahawe irikamu hangko i nguru-nguruna. Hawa ide iami bambari au mahaemi nihadi au mopaturokau bona mombepokaahikau hadua hai hadua. 8 Agaiana nauri nodo, batena kuukiakau hawa ide nodo hawa au wou, lawi tongawami katouna hawa ide i lalu katuwona Yesu hai i lalu katuwomi. Lawi kamakaindi ina tuna, hai kamabaa au tou mepongkami mewangka.
9 Tauna au manguli tuwohe i lalu kamabaa, agaiana mobabehi manihe dake i hangka ranganda, manoto tuwo manihe i lalu kamakaindi. 10 Tauna au mampokaahihe halalunda, tuwohe i lalu kamabaa, hai bara ara babehianda au mopakanawo ranganda. 11 Tauna au bara mampokaahi halalunda, manoto tuwo manihe i kamakaindi hai barahe moisa iumba kalaoanda, lawi napabilomohe kamakaindi iti.
Ineeke mampomahile anu-anu au ara i dunia
12 Anangku, kuukiakau sura ide,
lawi teampungimi dosami i lalu Kerisitu.
13 Uma-uma, kuukiakau sura ide,
lawi moisamokau Ia au ara hangko i nguru-nguruna.
Ope-ope anantomoane hai anantowawine, kuukiakau sura ide,
lawi monangimokau Datu Tokadake.
14 Kuukiakau anangku,
lawi moisamokau Umanta.
Kuukiakau uma-uma,
lawi moisamokau Ia au ara hangko i nguru-nguruna.
Kuukiakau anantomoane hai anantowawine,
lawi marohomi pepoinalaimi,
mopailalumokau Ngkorana Pue Ala,
hai monangimokau Datu Tokadake.
15 Ineekau mampomahile apa au ara i dunia. Hema au mampomahile anu-anu dunia ide, barahe mampokaahi Pue Ala Umanta. 16 Lawi ope-ope au ara i lalu dunia ide, iami peundeana lalunta au kadake, apa au taita hai tapokaelu, hai apa au mopaara pampemahilenta; ope-ope iti bara hangko i Umanta, batena hangko i dunia. 17 Dunia ide, hihimbela hai hinangka ihina, au naunde manusia ina magero. Agaiana tauna au moula peundeana Pue Ala batenda tuwo i hae-haena.
Ineekau mampoinalai paturo au mosapuaka kaYesuna Datu Topehompo
18 Anangku, barapi mahae kahopoa dunia ide ina hawemi. Hai ina hawe hadua Tomampoiwali Kerisitu, nodo au paka rapaturoakau. Hai ide-ide hawemohe bosa tauna au mampoiwali Kerisitu. Ido hai tongawa mpuu kaina hawenami kahopoa dunia. 19 Tauna au mampoiwalihe Kerisitu iti arahe i olonta hangkoia, agaiana katouana barahe ranganta. Ido hai padumohe mopatani hangko irikita. Ane rapana tou-tou rangantahe, kemia-miahe taporanga. Agaiana megaakimohe hangko irikita, ido hai manoto kadanda mpuu huba hadua au himbela hai ikita.
20 Agaiana ikamu halalu, nidokomi Inao Malelaha au hangko i Kerisitu. Ido hai pane moisamokau ope-ope paturo au tou. 21 Mewali, tunggaiaku moukiakau sura ide bara anti kadami moisa paturo au tou. Agaiana kuukiakau sura ide, lawi moisamokau paturo au tou, hai moisa worimokau kadana mpuu ara dongko au hangko i paturo au tou.
22 Au modongko iamohe tauna au mosapuaka kaYesuna Datu Topehompo. Ihirami au mampoiwali Kerisitu, lawi mosapuakahe Pue Ala Umanta hai Yesu AnaNa. 23 Tauna au mosapuaka Anana Pue Ala, barahe mohintuwu hai Pue Ala Umanta. Tauna au mopangaku Yesu Anana Pue Ala, mohintuwu worihe hai Pue Ala Umanta.
24 Mewali, halalu, bambari au nihadi hangko i nguru-nguruna, iti au hangangaa nipailalu liliu. Ane mopailalukau bambari iti, ina mohintuwukau hai Pue Ala Umanta hai Yesu AnaNa. 25 Hai idemi dandiNa irikita: katuwo maroa au bara mokahopoa.
26 Sura au kuukiakau ide, kana i tauna au mampeinaohe mopakanawokau. 27 Agaiana halalu, modokomokau Inao Malelaha hangko i Kerisitu, hai Inao iti ara liliu i lalumi. Barapokau paraluu rapaguru tauna ntanina, lawi Inao Malelaha iti au mopagurukau i hinangkana. Ope-ope paturoNa tou, bara dongko. Mewali, mohintuwu liliumokau hai Kerisitu moula apa au Napaturoakau.
Napoanamoke Pue Ala ido hai hangangaa mokabahake dosanta