Paulu mepaturo kana i apa au ina mewali i kahawena hule Pue Yesu
2
1 Kaliliuana halalu, kipeinao kiuliangaakau kana i kahawena hule Amputa Yesu Kerisitu, hai kana i kaina ragulunta bona hihimbelake hai Ia, 2 datikau holi-holi napawuli bambari au mampololita kahawenami Pue Yesu, lawi arahe au manguli Inao Malelaha mampopaisaahe nodo. Ara worihe au mouli kaarana sura hangko irikami au mopakanoto kahawenami alona Pue. 3 Nauri noumba raranda, inee mpuuhe nipogiangaa mopakanawokau, lawi hangko da hawe Alo iti, hangangaa mewali hampai: bosa tauna ina moewahe Pue Ala, hai Manusia Kadake au tepakanotomi mesua i naraka, ina mampatongawa. 4 I lalu pampemahilena Manusia Kadake iti ina meewa hai mampeiwongko hangko i ope-ope au rapenombai manusia. Hai ia ina mohuda wori i Souna Pue Ala hai nauli kaianami Pue Ala.5 Nikatuinao halalu, kupaturoamokau ope-ope ide hangkoia i tempoku ara hihimbela hai ikamu. 6 Ide-ide, bara mani hawe Manusia Kadake iti, lawi ara mani au mohomboki. Agaiana, ane hawemi tempo au napakanoto Pue Ala, Manusia Kadake iti ina mampatongawami. 7 Hai tempo ide, kuasana au kadake mobago ngkandii-ndii i dunia. Agaiana ia bara mani hawe, lawi ara mani au mohohomboki. 8 Mewali, ane teweihami topehomboki iti, hangko haweri Manusia Kadake. Agaiana ane hawemi Pue Yesu hai kuasaNa au meawa, Manusia Kadake iti ina ope kuasana, lawi ia ina napapate Pue Yesu hai inao au mesuwu hangko i humeNa.
9 Manusia Kadake iti ina hawe hai kuasana Datu Tokadake, hai kuasa iti ina napake mobabehi ngkaia pakana tanda kuasa au mepakanawo. 10 Ope-ope akalana au kadake napake mopakanawo tauna au tepakanotohe rahuku. Ina marugihe, lawi barahe mau mampoinalai Ngkorana Pue au peisa mohoremahe hangko i huku dosanda. 11 Ido hai napawulihe Pue Ala alana mepoinalaihe i lolita au mepakanawo au naanti Manusia Kadake. 12 Kahopoana, Pue Ala ina mohuku ope-ope tauna au raunde mobabehi dosa hai au barahe mampoinalai NgkoraNa au manoto.
Nipakaroho pepoinalaimi i paturo au tou
13 Halalu-halalu au napokaahi Pue, hintoto mpuungkai manguli liliu ngkaia kamaroana i Pue Ala anti kaikamuna. Lawi Pue Ala mopileikau hangko i nguru-nguruna bona tehoremakau hangko i huku dosami anti pepoinalaimi i bambari au tou. Napileimokau bona Nahoremakau anti kuasana Inao Malelaha au mampopewalikau taunana Pue Ala au malelaha. 14 Nakakiokau Pue Ala i lalu pohadimi Ngkora Marasa au kipahaweakau bona molambikau kirami i peawana tuwona Amputa Yesu Kerisitu.
15 Mewali halalu, nipakaroho pepoinalaimi, mekingki liliukau i hinangka au kipaturoamokau, maroa au kiuliangaakau ba au kiukiakau i lalu surangki.
16-17 Pue Ala motudungiake ahiNa, hai mopakaroho lalunta hawe i hae-haena, hai Naweike peharunga au maroa anti kabulana laluNa. Ido hai mekakaengkai i Amputa Yesu Kerisitu hai Pue Ala Umanta bona Napakaroho hai Napatetida lalumi bona maroa ope-ope lolitami hai babehiami.