Paulu merapi bona rapekakaea to Tesalonika
3
1 Mewali, halalu, kiperapi bona nipekakaea woringkai. Mekakaekau i Pue Ala bona kabosa-bosaa tauna au mohadi hai modoko Ngkorana Pue, nodo au mewali irikamu hangkoia. 2 Niperapi wori bona Pue Ala mokabahangkai hangko i tauna au kadake hai au mepopeahi-ahi, lawi bara ope-ope tauna mepoinalai i Ngkorana Pue Ala.3 Pue Yesu bara mokabaha pekadipuraNa irikamu. Ia ina mopakaroho lalumi hai mampeparaikau hangko i Datu Tokadake. 4 Mewali, anti pekadipurana Pue irikamu, ido hai kiisa mpuu kanipeulaina apa au kipaturoakau, hai kiisa wori paturo iti ina nipeulai liliu.
5 Kipekakaeakau bona naninikau Pue Yesu duuna niisa ntepuu ahina Pue Ala irikamu, hai bona mantahakau i lalu kapari, nodo kamantahana Kerisitu.
Paulu mokambaroa tauna au lohe
6 Halalu, hai kuasa au naweingkai Pue Yesu Kerisitu, kiuliangaakau: ineehe nipohintuwua halalumi hampepepoinalai au lohehe mobago hai au barahe mampeulai atura au nidoko hangko irikami. 7 Niisa mpuu babehiangki halalu, barangkai lohe mobago i tempoki hihimbela hai ikamu hangkoia. Babehia iti hangangaa nipopandiri. 8 Barangkai moande paande au bara kiholo. Mabaa ba kaindi mobago mantimingkai datikau kipakapari. 9 Katouana, barangkai masala ane merapingkai irikamu. Agaiana kiunde mewali pandiri au maroa irikamu bona nipeulai. 10 I tempoki mani hihimbela hai ikamu hangkoia, arami hawa au kiwoliakau, kiuli: tauna au lohe mobago, ineemi rapaande.
11 Tunggaiaki pane kiuli nodo, lawi kihadi bambari au mouli kaaranda tauna i olomi au lohehe mobago. Mampesuaki liliu peahe urusianda ranganda, hai bara mpuuhe madota mobago. 12 Mewali, hai kuasa au naweingkai Pue Yesu Kerisitu, tauna iti kipopainga hai kipaturohe bona madotahe mobago mohaoki paandenda.
13 Halalu-halalu, ineeke oha-oha mobabehi apa au maroa. 14 Rapana, ara tauna au bara raunde mampeulai apa au kiuki i lalu sura ide, nipekatandaihe. Ineehe nipohintuwua bona maeahe. 15 Ngkalinari ineehe niimba iwalimi. Agaiana nipaturohe nodo halalumi.
Tabea hai pewati
16 Batena pea Pue au peisa moweike roa ngkatuwo. Ido hai mekakaengkai Iria bona alo-alona Naweikau katinda lalu i paka-pakana. Pue mamporangaikau ope-ope.
17 Tabea hangko iriko, Paulu. Kahopoana sura ide kuuki haduduangku. Ide tanda i lalu ope-ope kahopoa surangku bona niisa mpuu kahangko irikona sura ide. 18 Amputa Yesu Kerisitu mowatikau ope-ope.
Hangko iriko
PAULU