Surana Suro Paulu au nguru-nguruna i to Sarani i wanua
Tesalonika
Pepongkaa lolita
Wanua Tesalonika iami pohudaa poparenta propinsi Makedonia i kadatua Roma. Hangkoia, Paulu lao i Tesalonika mobambari Ngkora Marasa, alana tauna inditi arahe au mepoinalai i Pue Yesu (Suro 17:1-4). Agaiana bara mani mahae hangko indo, arahe to Yahudi au mokahinai Paulu. Ihira moewahe paturona Paulu au napahaweahe tauna au bara to Yahudi. Anti peewanda, padumi Paulu hangko i Tesalonika lao i wanua Berea (Suro 17:5-10), hai hangko inditi, ia lao i wanua Korintu. Anti kamabilana i to Tesalonika, Paulu motudu Timotiu lao mosondakihe, hai i pesulena, Timotiu mopahawe i Paulu noumba kamarohona pepoinalainda (1Tes. 3:1-6). Roo indo, naukimi Paulu sura ide.
I lalu sura ide, Paulu mopakaroho pepoinalainda to Tesalonika bona mantahahe i lalu kapari. Matana mpuu laluna mohadi bambari au mampololita noumba kamarohona pepoinalainda hai kamaahinda i ranganda. Ia mohanai pampekunenda kana i kahawena hule Kerisitu. Node pampekunenda: Ane hadua to Sarani mate hangko damani hawe Pue Yesu i karombelana, ba peisa tauna iti molambi katuwo maroa au bara mokahopoa? Hai impira Pue Yesu ina hawe hule? Paulu mopaturo worihe bona mobago liliuhe mohaoki paandenda, hai bona tinda lalunda mampegia kahawena hule Kerisitu au mewali peharunganta.
Ihi sura
1. Pepongkana lolita (1:1)
2. Paulu manguli ngkaia kamaroana i Pue Ala anti pepoinalainda to Tesalonika (1:2–3:13)
3. Paulu moweihe lolita bona mobabehihe apa au hintoto i tauna au meula i Pue Yesu (4:1-12)
4. Paulu mepaturo kana i apa au ina mewali i alo kahawena hule Pue Yesu (4:13–5:11)
5. Paulu moweihe to Tesalonika lolita bona mohintuwuhe (5:12-22)
6. Tabea hai lolita kahopoana (5:23-28)