Kolose i

Surana Suro Paulu i to Sarani i wanua

Kolose

Pepongkaa lolita

Kolose iami hambua wanua i propinsi Asia Kokoi au bara karao hangko i wanua Epesu, pobagoana Paulu hangkoia. Nauri rompare labi kamahaena Paulu mobago inditi mopahawe Ngkora Marasa i to Epesu (Suro 19:1-41), agaiana bara hambela lao i wanua Kolose. Bara mahae, arahe to Sarani hangko i Epesu au lao i Kolose mobambari Ngkora Marasa, alana ara worihe to Kolose au mepoinalai i Pue Yesu. Bahangkia parena hangko indo, Paulu ratarunggu anti pobagona mobambari Ngkora Marasa. Tangana Paulu ratarunggu, kira-kira pare ini pulona hai isa hangko i karapoanakana Yesu (61 M), naukimi sura ide, hai napakatuahe to Kolose.

I lalu sura ide, Paulu mampopainga to Kolose kana i guru agama au moanti paturo au sala. Rauli guru iti, ane mampeinaoke molambi katuwo maroa hangko i Pue Ala, bara handa ane mepoinalai peake i Yesu; hangangaa menomba worike i paka-pakana au makuasa i langi hai i dunia. Rauli wori guru iti, hangangaa ratileke moula atura agama Yahudi, hai hangangaa moulake palia ntanina. I lalu sura ide, Paulu mopakanoto kadana tou paturonda guru iti, nauli ane mepoinalaimoke i Yesu, handami, lawi batena pea Yesu au peisa moanti katuwo maroa i manusia. Yesumi au napopatoa Pue Ala mampopewali langi hai dunia, hai kuasaNa melumbu hangko i hinangkana. Kahopoana, Paulu mopaturohe to Kolose kana i babehia au hintoto i to Sarani.

Ihi sura

1. Pepongkana sura (1:1-2)

2. Paulu manguli ngkaia kamaroana i Pue Ala anti pepoinalainda to Kolose, hai napekakaeahe (1:3-14)

3. Poantina hai pobagona Kerisitu (1:15-23)

4. Pobagona Paulu mopahawe Ngkora Marasa (1:24–2:5)

5. Babehia au hintoto i tauna au mohintuwu hai Kerisitu (2:6–4:6)

6. Kahopoa sura (4:7-18)