Pilipi i

Surana Suro Paulu au napakatu i to Sarani i wanua

Pilipi

Pepongkaa lolita

Pilipi iami wanua au mahile i propinsi Makedonia au napolumaongi Paulu i pobambarina Ngkora Marasa. I pobagona inditi, ia raewa bosa tauna, agaiana kahopoana ara worihe to Pilipi au mepoinalai i Pue Yesu (Suro 16:1-40). Padumi Paulu hangko i Pilipi, bahangkia belana arahe to Pilipi mopakatu doi iria bona tetulungi i bagona.

Bahangkia parena hangko i tempona Paulu mopahawe Ngkora Marasa i wanua Pilipi, ia ratarunggu i Roma. Karahadina to Pilipi bambari kana i Paulu, mopakatu mbulihe doi motulungi Paulu i lalu tarunggu. Doi iti naanti hadua to Pilipi au rahanga Epafroditus. Kahawena Epafroditus i Roma, doi iti naweimi Paulu, hai maida bahangkia wulana i Roma bona modurei Paulu. Liumi bahangkia wulana, natudumi Paulu mesule, hai nawei sura ide bona naantiahe to Pilipi.

Ara bahangkia pakana tunggaiana Paulu mouki sura ide. Napahawe noumba katuwona i lalu tarunggu (1:12-26). Naweihe lolita bona mohintuwuhe, mengkaiwoi lalunda, hai mantahahe i lalu kasusa (1:27–2:18; 4:2-3). Napololita tunggaiana motudu Timotiu hai Epafroditus lao i Pilipi, (2:19-30). Napaturohe bona mainga-ingahe i tauna au kadake babehianda au moanti paturo au sala (3:1-2, 17-19). Hai manguli ngkaia kamaroana i to Pilipi anti petulunginda au naanti Epafroditus (4:10-18).

Ihi sura

1. Pepongkana lolita (1:1-2)

2. Paulu manguli ngkaia kamaroana i Pue Ala anti pepoinalainda to Pilipi, hai napekakaengaahe (1:3-11)

3. Paulu mampololita karatarungguna (1:12-26)

4. Paulu moweihe to Pilipi lolita bona mohintuwuhe hai moulahe pandirina Yesu (1:27–2:18)

5. Paulu motoia Timotiu hai Epafroditus anti pobagonda i Pue (2:19-30)

6. Paulu mampopainga to Pilipi kana i tauna au moanti paturo au sala (3:1–4:1)

7. Paulu mopaturo to Pilipi bona maroho pohintuwunda hai pepoinalainda (4:2-9)

8. Paulu manguli ngkaia kamaroana anti petulunginda to Pilipi (4:10-20)

9. Kahopoa sura (4:21-23)