Surana Suro Paulu i to Sarani i wanua
Epesu
Pepongkaa lolita
Tangana Paulu ratarunggu anti pobagona mobambari Ngkora Marasa, naukimi sura ide hai napakatuahe to Sarani i wanua Epesu. Sura ide rauki kira-kira pare ini pulona ba ini pulona hai isa Masehi (60-61 M). Epesu iami hambua wanua mahile au ara i propinsi Asia i kadatua Roma. (3:1, 13; 4:1). Tauna au maida i Epesu kabosanda barahe to Yahudi (2:11-12).
I lalu sura ide, Paulu mampololita kangkaiana pewati au tahumba “anti pohintuwuta hai Kerisitu” (1:3). Paulu mampololita wori kana i tunggaiana Pue Ala “bona hinangkana, maroa au i suruga ba au i dunia, Napahintuwuhe anti pohintuwunda hai Kerisitu, hai Kerisitu au moparenta hinangkana” (1:9-10). Napagurua worihe Paulu kana i babehia au hintoto i to Sarani. (4:1–6:20).
I lalu sura ide, Paulu mopake bahangkia pakana ngkora pandiri. Yesu rapandiri nodo Waa, hai topeulaNa rapandiri nodo ngaana WataNa (1:10, 22-23; 4:4, 15-16; 5:23-32). Yesu rapandiri nodo watu pohudaa sou, hai topeulaNa rapandiri nodo kau au teparampi i wongkona (2:20-21). Inao Malelaha rapandiri mewali hambua pekatandaina Pue Ala i lalunta (1:13; 4:30). Ane hambua sura ara pekatandaina, tongawami kahemana ampu sura iti. Nodo wori, Inao Malelaha i lalunta mopatongawa kaikitana taunana Pue Ala. To Sarani rapandiri nodo surodado au moewa tokadake hai parewa pombeala au hangko i Pue Ala (6:10-18).
Ihi sura
1. Pepongkana lolita (1:1-2)
2. Tunggaiana Pue Ala i to Sarani (1:3–3:21)
a. Pue Ala moweihe ngkaia pewati anti pohintuwunda hai Kerisitu (1:3-23)
b. Pue Ala mopahintuwu to Yahudi hai tauna au barahe to Yahudi (2:1–3:13)
c. Paulu mekakae bona to Epesu moisahe noumba kamahilena ahina Kerisitu irihira (3:14-21)
3. Babehia au hintoto i to Sarani (4:1–6:20)
a. To Sarani hangangaa mohintuwu hai mombepakaroho mpolalu (4:1-16)
b. To Sarani hangangaa motende babehia au kadake hai mobabehi apa au maroa (4:17–5:20)
c. Bahangkia pakana paturo (5:21–6:9)
d. To Sarani rapandiri nodo surodado au moanti parewa pombeala (6:10-20)
4. Kahopoa sura (6:21-24)