Hangangaa mombetutulungikau hadua hai hadua
6
1 Halalu, ane moitakau rangami hampepepoinalai mobabehi sala, ikamu au mampeulaikau peundeana Inao Malelaha, hangangaa ninini wohiraia mesule i rara au manoto i lalu kamaalusu. Hai mokampai worikau watami datikau hawe mobabehi dosa. 2 Hangangaa mombembetulungikau hadua hai hadua bona hai babehiami iti, nipeulaimi hawana Kerisitu. 3 Ane ara hadua tauna au moimba tuwona melumbu, moleri barato, himbela pea mampodongkoa watana haduduana. 4 Agina ope-ope tauna mampekiri babehiana haduduana, maroa ba bara. Ane maroa, peisa napokatana. Hai ineemi napapahintoto hai babehiana rangana. 5 Lawi ope-ope tauna hangangaa mohalea babehiana haduduana.6 Tauna au modoko paturo kana Ngkorana Pue Ala, hangangaa mampokiraia tauna au mepaturo, hangko i apa pea rasi ba pewati au nahumba.
7 Mainga-ingakau, halalu! Pue Ala bara peisa rapodongkoa, lawi apa au tatuda, iti wori au tapupu. 8 Hema-hema pea au mobabehi liliu peundeana laluna au kadake, ina molambi wori wua au kadake iami ragaaki hangko i Pue Ala hawe i hae-haena. Agaiana hema pea au mampeulai liliu peundeana Inao Malelaha, ina molambi katuwo maroa hihimbela hai Pue Ala hawe i hae-haena lawi katuwo au maroa iti hangko i Inao Malelaha. 9 Mewali, ineeke oha-oha mobabehi apa au maroa, lawi ane mobabehi liliuke apa au maroa, batena ina tapupu wuana i tempo au tepakanotomi. 10 Ido hai, liana mani ara loga au raweike, hangangaa mobabehike apa au maroa i ope-ope tauna, pelumbunami i halalunta hampepepoinalai.
Paturo au kahopoana
11 Nipeita maroa-roa kahopoana sura ide au kuuki hai taiengku haduduangku. Niita noumba kamahilena ukingku. 12 Mainga-ingakau i tauna au mepakanawo, au raunde moula ada au raita pea i raoa bona ratoiahe tauna. Rapari-parikau ratile moula Aturana Musa. Agaiana iti rababehi lawi langahe rapopeahi-ahi hangka to Yahudinda, anti pepoinalaindami i Kerisitu au matemi i kau mombehape. 13 Katouana tauna au mampeulai ada mpetile iti, barato worihe mampeulai ope-ope Aturana Musa. Tunggaianda mopari-parikau ratile bona rapomahilehe anti kanipeulaina hawanda iti. 14 Agaiana iko, bara kuunde rapomahile i raoa hangko i kapatena Pue Yesu Kerisitu i kau mombehape. Lawi ope-ope au peisa raita i dunia ide hai au raimba mahile holona barapi ara bunduna iriko. Hai tauna i dunia ide, bara ara au tedii lalunda i apa au kupomahile. 15 Ratile ba bara, iti bara paraluu. Au paraluu iami katuwo au wou hangko i Pue Ala. 16 Mekakaena bona ope-ope tauna au tuwo moula paturo ide hai au mewali taunana Pue Ala ina molambi roa ngkatuwo hai ahina Pue Ala.
17 Kahopoana, kuperapi bona datipi ara au mopakasusana. Lawi lari i watangku idea mopakanoto kaikona surona Pue Yesu.
18 Halalu-halalungku! Amputa Yesu Kerisitu, mowatikau ope-ope. Amin.
Hangko iriko
PAULU