Pue Yesu mokabahake hangko i Aturana Musa
5
1 Kerisitu mokabahamoke hangko i Aturana Musa bona tou-tou mpuu tekabahake. Ido hai hangangaa tapatetida lalunta. Ineeke rapohawi hule.2 Iko, Paulu, pehadingi lolitangku! Kuuliangaakau: ane nipetandaka mewali manoto i peitana Pue Ala anti pampeulaimi ada mpetile i Aturana Musa, lempona Kerisitu barapi mobundu irikamu. 3 Hai kuuliangaa mbulikau: hema pea au mampopetile, hangangaa mampeulai worihe ope-ope parenta ntanina i lalu Aturana Musa. 4 Mewali hema pea au mampeulai Aturana Musa bona raimba manoto, lempona mobotuki pohintuwumi hai Kerisitu. Hai barapokau tuwo i lalu kabulana laluNa Pue Ala. 5 Agaiana ikita halalu, anti peninina Inao Malelaha, meharungake i Pue Ala au mopamanotoke i peitaNa anti pepoinalainta i Kerisitu Yesu. Hai batena iti au taharunga. 6 Ane mohintuwuke hai Kerisitu Yesu, bara ara bunduna ratileke ba barake ratile; batena pea mepoinalaike i Yesu. Hai ane maahike i ranganta, pepoinalainta iti ina tongawa.
7 Hangkoia, peulami i Ngkora Marasa maroa. Hemarihe au mohombokikau pane barapokau mampeulai paturo au tou? 8 Manotomi, halalu, paturonda iti bara hangko i Pue Ala au mokakioke mewali taunaNa. 9 Paturonda au mepawuli iti nodo ragi, lawi “ragi au haodi mampopembongke tapu mewali ngkaia.” 10 Nauri nodo, batena pea kupoinalai kadami mampeulai paturo au mepawuli iti, lawi mohintuwumoke hai Pue Yesu. Hai manoto wori iriko, hema pea au mopawulikau hai paturonda, batena nahukuhe Pue Ala.
11 Halalu, arahe tauna au mouli kaikona au mopaguru tauna mampeulai ada mpetile Aturana Musa. Bara tou lolitanda iti! Ane kenodo pepaturongku, kebara ara to Yahudi au moewana. Idemi au kupaturoakau: hangangaa mepoinalaike i Kerisitu, lawi anti kapatena Kerisitu au rapaku i kau mombehape, ido hai peisake mewali manoto i peitana Pue Ala. Anti pepaturongku ide, ido hai to Yahudi iti rumpuhe hai rapopeahi-ahina. 12 Aginami tauna au mopawuio pepoinalaimi bara peahe ratile agaiana rabohokilau peami!*
Hangangaa mampeulaike peninina Inao Malelaha
13 Halalu, Nakakiomoke Pue Ala bona tekabahake hangko i Aturana Musa. Agaiana inee tapehangu katekabahanta hangko i atura iti peisamoke tuwo moula peundeana lalunta. Aginari mombepokaahike hai mombetulungike hadua hai hadua. 14 Ara parenta au manguli: “Nupokaahi hangka rangamu nodo pampokaahimu watamu haduduamu.”* Ane tapeulai parenta au hampaka iti, himbelami hai mobabehike ope-ope Aturana Musa au nahawaake Pue Ala. 15 Agaiana maroa-roakau ineekau mobungka-bungka hai mombepakoi mpoinao, datikau mombepakarugi.
16 Tunggaiaku node: hangangaa naninike Inao Malelaha bona datike mampeulai peundeana lalunta au kadake. 17 Lawi peundeana lalunta au kadake moewa peundeana Inao Malelaha. Ane tapeulai peundeana lalunta au kadake, bara tababehi apa au maroa moula peundeana Inao Malelaha; hai ane tapeulai peundeana Inao Malelaha, bara tababehi apa au kadake au ara i lalunta. 18 Mewali, ane naninimoke Inao Malelaha, barapoke tetaka i Aturana Musa.
19 Ina tongawa, ane tauna mobabehi peundeana lalunda au kadake. Pandirina:
motambi-tambi dele,
mobabehi babehia au kedai hai babehia au merikai,
20 menomba i anitu,
mampopobundu kuasa hangko i seta;
mokahihi rangana,
mobungka-bungka,
mohiri,
polo rumpu,
mengkaiwongko,
mosisisala hai mepopogaa-gaa,
21 mahina,
malangu-langu,
mosusa-susahe barapi ara hokana,
hai ara mani wori au ntanina. Mewali, ope-ope iti, kupopaingaa mbulikau nodo au kuuliangaamokau hangkoia: hema-hema au mobabehi nodo, barahe ina maida hihimbela hai Pue Ala i lalu poparentaNa.
22 Agaiana ane naninike Inao Malelaha, ina tongawa wuana i lalu katuwonta, i lalu poantita: mombepokaahike, matana-tanake, tinda lalunta, sabarake, maalusu pololitanta, maroa babehianta; mopabukeike dandita, 23 mengkaiwoike, hai morempekike lalunta. Bara mpuu ara atura au peisa mohomboki babehia au nodo. 24 Ane mewalimoke taunana Kerisitu Yesu, barapoke nakuasai peundeana lalunta au kadake lawi peundeana lalunta au kadake iti rapakumi i kau mombehape hihimbela hai Kerisitu. 25 Lawi naweimoke Inao Malelaha katuwo au wou, hangangaa tapeulai peundeana Inao Malelaha iti. 26 Ineeke mampemahile, ineeke mombepamahai mpolalu ba mombekahinai.