Tuwo i lalu baa
5
1 Mewali, lawi napoanamokau Pue Ala hai Napokaahikau, ido hai hangangaa moulakau poantina Pue Ala. 2 I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.3 Mewali inee mpuukau ara au mobabehi babehia kedai, babehia merikai hai mehioro—nihowara pea inee—dati ara pepangkaanda tauna mosalaikau. Babehia au nodo bara hintoto irikamu lawi taunanamokau Pue Ala. 4 Inee worikau metatarahu ba mohowara lolita au bara mobundu au bara hintoto rahadi tauna. Aginari mangulike ngkaia kamaroana i Pue Ala. 5 Nipehadingi maroa: hema-hema au mobabehi babehia kedai, merikai ba au mehioro, nodohe tauna au menomba i anitu. Tauna iti barahe hintoto molambi kiranda i lalu poparentana Kerisitu hai Pue Ala. 6 Mewali, ineekau rapakanawo hai lolitanda tauna au mampeinaohe bona moulakau babehianda au nodo. Lolitanda iti batena bara tou. Lawi hangko i babehia au nodo, Pue Ala ina mohuku tauna au bara mengkoru Iria. 7 Mewali, ineehe nipohintuwua tauna au nodo babehianda.
8 Hangkoia, makaindi mani lalumi, agaiana ide-ide mabaami lalumi anti pohintuwumi hai Pue. Mewali, hangangaa tuwokau i lalu kamabaa. 9 Lawi hangko i kamabaana lalumi, mesupa ope-ope babehia au maroa, au tou hai au manoto. 10 Nipari-pari mobabehi apa au hintoto i peitana Pue. 11 Mewali, inee nipeulai babehianda tauna au makaindi mani lalunda, lawi bara ara babehia maroa au mesupa hangko i lalu au makaindi. Agina nipatongawaa peamohe kakadakena babehianda iti. 12 Lawi babehianda au tewuniangi, rapopololita pea, mepakaeami. 13 Agaiana ane tauna au kadake moita babehiami au maroa, ina tongawa kakadakena babehianda, alana arahe au ina mokabaha babehianda au makaindi, hai ina tuwo worihe i lalu kamabaa. 14 Ido hai ara lolita au manguli:
“Mearomokau au leta,
Mearomokau hangko i kapate,
hai Kerisitu ina mowangkahikau.”
15 Ido hai hangangaa nipamaroa-roa babehiami: ineekau nodo tontuli; agaiana hangangaa manoto pekirimi. 16 Hangangaa nipopobundu maroa tempo au ara irikamu, lawi i tempo ide-ide kadake mpuu babehia manusia. 17 Mewali, ineekau ntuli, nipekiri maroa babehia apa au naunde Pue.
18 Ineekau malangu-langu, lawi iti ina moantikau mobabehi ngkaia pakana dake, agaiana hangangaa nakuasai peamokau Inao Malelaha. Anti kuasana Inao Malelaha iti, 19 ina mombepakaroho mpolalukau hai mamponanikau nani petoia, nani mpenomba hai nani rohani. Ina monanikau matana-tana motoia Pue hangko i lalumi, hai 20 i hinangkana niuli ngkaia kamaroana i Pue Ala Umanta i lalu hangana Yesu Kerisitu Amputa.
Paturo i topotambi
21 Hangangaa mombepengkoruikau hadua hai hadua anti pebilami i Kerisitu. 22 Ikamu towawine, hangangaa mengkorukau i tobalilomi, nodo pengkorumi i Pue. 23 Lawi tobalilo mewali tadulako i towawinena nodo Kerisitu mewali tadulako i jumaa, hai Ia haduduana au mohorema jumaa au mewali wataNa. 24 Mewali, nodo ope-ope jumaa mengkoru i Kerisitu, nodo wori towawine hangangaa mengkoru i tobalilona i paka-pakana.
25 Hai ikamu tobalilo, hangangaa nipokakaiahe towawinemi moula pandirina Kerisitu au mampokakaia jumaa; ido hai mokirami wataNa rapapate mohuru dosanta. 26 Ope-ope iti Nababehi bona Napatanike mewali taunaNa, Nabahoike hangko i dosanta hai owai hai NgkoraNa, 27 bona mewalike tauanaNa au malelaha hai meawa, alana barapi ara kamasalanta hai kamakuranta i lindoNa. 28 Mewali nodo Kerisitu mampokaahi jumaa au mewalimi wataNa, tobalilo hangangaa mampokaahi wori towawinena nodo pampokaahina watana haduduana. Hema au mampokaahi towawinena himbela pea mampokaahi watana haduduana. 29 Bara ara tauna au mokahihi watana haduduana, batena nakampai hai nakadipura. Nodo wori Kerisitu mokadipura tauna au mepoinalai Iria. 30 Ia mokadipurake lawi ikita au mepoinalai Iria mewalimoke hangkira hangko i WataNa.
31 I lalu Sura Malelaha, teuki node:
“Ido hai tobalilo hangangaa mopalehi umana hai inana,
hai tuwo hihimbela hai towawinena,
bona au rodua iti mewalihe hawata-wata.”*