Epesu 1

Surana Suro Paulu i to Sarani i wanua

Epesu

1 Sura ide hangko iriko, Paulu, au mewali surona Kerisitu Yesu moula peundeana Pue Ala. Sura ide kupakatu irikamu taunana Pue Ala i Epesu au tetida pepoinalaimi i Kerisitu Yesu. 2 Pebila hai peadai! Kuharunga Pue Ala Umanta hai Pue Yesu Kerisitu mowatikau hai moweikau roa ngkatuwo.

Pewati hangko i Pue Ala anti pohintuwuta hai Yesu Kerisitu

3 Tatoiami Pue Ala, Umana Amputa Yesu Kerisitu, au mowatike hai hinangka pewati au maroa hangko i suruga, anti pohintuwuta hai Kerisitu. 4 Hangko damani dunia rapopewali, Napileimoke Pue Ala mohintuwu hai Kerisitu bona mewalike taunaNa au malelaha au bara ara kamasalanta i peitaNa. 5 Anti kamaahina laluNa irikita, Napakanoto amimi kaNaangkata mewali anaNa. Naangkamoke mewali anaNa anti kanahoremanta Yesu Kerisitu, lawi itimi au Natunggai hai au Napokatana. 6 Ido hai tatoiami Pue Ala, lawi mahile mpuu ahiNa irikita. Hangko i kabulana laluNa, Nawei mberomoke ahiNa anti pohintuwuta hai Yesu, AnaNa au Napokaahi.

7 Hai wahena Pue Yesu au mabubu i kapateNa, tehompokimoke hangko i huku dosanta, lempona naampungimi Pue Ala hinangka dosanta, hangko i kabulana laluNa au mahile. 8 Ia mobabehi iti anti kamaahiNa au bara ara hokana, moula kamatopaNa hai kapandeNa. 9-10 Moula peundeaNa, Napopaisaamoke tunggaiaNa au tewuniangi mani. TunggaiaNa iti iami bona hinangkana, maroa au i suruga ba i dunia, ina Napahintuwuhe hai Kerisitu au mewali tadulako i hinangkana. Hai tunggaiaNa iti batena Napopewali melempo i Kerisitu ane hawemi tempona.

11 Pue Ala mobabehi hinangkana moula peundeaNa hai pobotusiNa haduduaNa. Napileimoke hai Napakanotomi kaikitana au mewali taunaNa anti pohintuwuta hai Kerisitu. 12 Nababehi nodo, bona ikami to Yahudi au nguru-nguruna meharunga i Kerisitu motoia hai mampomahile Pue Ala. 13 Nodo wori ikamu. I kamohadimi bambari au tou mewalimokau taunana Pue Ala. Mampoinalaimokau Ngkora Marasa iti, ido hai Nahoremamokau Pue Ala hangko i huku dosami. Hai Naweimokau Inao Malelaha au Nadandi hangkoia, au mewali pekatandaina Pue Ala i lalumi au mopatongawa pewalimimi taunaNa. 14 Inao Malelaha itimi au mopakaroho dandiNa irikita bona manoto kaina Naweinta ope-ope sosora au Nadandiake, iami Nakabahake hangko i huku dosanta hai Napopewalike taunaNa. Ido hai hintoto mpuuke motoia hai mampomahile Pue Ala.

Pekakaena Paulu

15 Mewali, anti kakuhadina bambari au mampololita noumba pepoinalaimi i Pue Yesu hai noumba kamaahimi i rangami hampepepoinalai, 16 ido hai barana botu-botu manguli ngkaia kamaroana i Pue Ala anti kaikamuna, hai kukabelai liliukau i lalu pekakaengku. 17 Mekakaena i Pue Ala au meawa, Umana Amputa Yesu Kerisitu. Kuperapi Iria bona Naweikau Inao Malelaha au mopamanoto lalumi, duuna moisa ntepuukau Pue Ala. 18 Kuperapi Pue Ala ina mopamanoto lalumi bona niisa apa au peisa taharunga hangko i kanakakionta Pue Ala mewali anaNa, hai ina Niisa wori noumba kamahilena sosora au Napasilolongaahe tauna au Napoana, 19 hai bona niisa wori kamahilena kuasana Pue Ala au mobago i lalunta ope-ope tauna au mepoinalai Iria. KuasaNa iti mahile ntepuu 20 itimi au Napake mampopearo Kerisitu hangko i kapate bona Napopohuda ntanda i koanaNa i lalu suruga.

21 Kuasa au Nawei Pue Ala i Kerisitu iti, meliu kamahilena hangko i kuasanda ope-ope topoparenta, tomakuasa, tadulako, hai au rapenombai. KuasaNa iti meliu kamahilena hangko i ope-ope au molambi pohudaa au teadai, maroa au tuwo ide-ide, maroa au tuwo i alo au ina mai. 22 Pue Ala mampopengkoru hinangkana i Kerisitu, hai moangka Kerisitu mewali Tadulako au moparenta ope-ope tauna au mepoinalai Iria. 23 Ikita au mepoinalai Iria, mewalimoke Watana Kerisitu. Iami au mampobago hinangkana bona ope-ope mewali moula tunggaiaNa.