Suro 16

Timotiu meula i Paulu

1 Paulu mopaliliu polumaona lao i wanua Derbe hai i wanua Listra. I wanua Listra, ara hadua tobalilo au mepoinalai i Yesu, hangana Timotiu. Inana Timotiu, to Yahudi au mepoinalai wori i Yesu. Umana to Yunani. 2 Timotiu iti rabila ope-ope halalu hampepepoinalaina i wanua Listra hai Ikonium. 3 Peundeana Paulu bona Timotiu meula iria mobambari Ngkora Marasa. Ido hai Timotiu napopetile moula Aturana Musa. Tunggaiana bona radoko pea to Yahudi, lawi ope-ope to Yahudi i tampo iti moisa katoYunanina umana. 4 Hangko inditi, meangkamohe Paulu, Silas hai Timotiu. I ope-ope boea au rapolumaongi, mopahawe liliuhe i to Sarani pobotusinda surona Pue Yesu hai penatua-penatua i Yerusale, hai mopaturohe bona hinangka hawa au rapakanotomi hangangaa rapeulai. 5 Nodomi popakarohonda pepoinalainda to Sarani, hai kamahae-haea kabosa-bosaami tauna au mepoinalai.

Paulu moita hambua pampetudungia i Troas

6 Inao malelaha mohombokihe Paulu hai rangana lao mopahawe Ngkorana Pue Ala i propinsi Asia. Ido hai tebalikimi tunggaianda, hai laomohe mampolumaongi tampo Frigia hai Galatia. 7 Kahawenda i pariolo Frigia hai Misia, ina laohe i tampo Bitinia, agaiana Inao Malelaha au hangko i Pue Yesu mokontohe bona ineehe lao inditi. 8 Ido hai moliuhe i tampo Misia hai mendauluhe lao i boea Troas i wiwi ntahi.

9 Tanga kaindi tanganda maturu i Troas, Paulu moita hambua pampetudungia. Naita hadua tobalilo au hangko i tampo Makedonia meangka i lindona, nauli, “Maimokau i Makedonia. Nitulungi wongkamia!”10 Karoona Paulu moita pampetudungia iti, mangkadipurangkai hai hoholigangkai lao i tampo Makedonia, lawi manotomi kanatudungki Pue Ala mobambari Ngkora Marasa i tauna au arahe inditi.

Paulu i Pilipi Lidia mepoinalai i Yesu

11 Meangkamongkai hangko i Troas, mesawingkai i kapala tahi lao i lewuto Samotrake, hai kahalona laongkai i wanua Neapolis.12 Roo indo, mendaulumongkai hangko i kapala tahi, hai laongkai i wanua Pilipi, au rakamumu hai rapaidai to Roma, hai au mahile hangana i propinsi Makedonia. Inditi maidangkai bahangkia alona.

13 I alo Penombaanda to Yahudi, laongkai i wiwi owai i raoa wanua, lawi kiisami kaarana pekakaeanda to Yahudi inditi. Indo aramohe bahangkia towawine au mogulu, ido hai mohudangkai hai mololitangkai irihira. 14 I olonda towawine iti, ara hadua au rahanga Lidia hangko i wanua Tiatira. Ia, topobalu-balu bana maroa au masuli holona, hai au menomba wori i Pue Ala. Pue Ala mopakanoto laluna, alana modoko apa au napaturoahe Paulu. 15 Karoonda Lidia hantambi rariu, napari-parimongkai Lidia lao maida i souna, nauli, “Ane niimbana manoto i lalu pepoinalaingku i Pue Yesu, laomoke i soungku.” Ido hai lao mpuumongkai i souna moula pamperapina.

Paulu hai Silas ratarunggu i Pilipi

16 Hambela tempo, kalaongki i pekakaeanda to Yahudi, mohidupangkai hai hadua hawi towawine au moanitu. Anti kuasana anitu iti, ia peisa mopahawe apa au ina mewali. Ido hai ampu hawi iti molambihe ngkaia doi. 17 Towawine iti meula liliu irikami, monganga-nganga, nauli, “Ihira ide hawina Pue Ala au melumbu kuasaNa hangko i ope-ope au rapenombai! Kamainda inde, maihe mopahaweakau rara bona peisakau tehorema hangko i pehukuna Pue Ala.” 18 I lalu bahangkia alona, nodo liliu pea pololitana, alana malutami Paulu mohadi. Hangko indo, membalilimi Paulu, hai mololita i anitu au mebalasua i towawine iti, nauli, “I lalu hangana Yesu Kerisitu, peloho hangko iria!” Meloho mpuumi anitu iti.

19 Roo indo, rumpumohe ampu towawine iti, lawi barapohe peisa molambi doi hangko iria. Ido hai mohakamohe Paulu hai Silas rabisosohe lao i tadulako boea i pobalu-balua. 20 Kahawenda i tadulako-tadulako boea, mololitamohe rauli, “Tauna idehe to Yahudi au maihe mopamagunego boeanta. 21 Mepaturohe kana i ada au bara himbela hai adanta. Ikita to Roma barake peisa modoko ba mampeulai paturonda.” 22 Tauna bosa meula worihe mosalai. Mewali, topoparenta iti motuduhe tauna bona mowosuihe hampinda Paulu hai Silas hai rapapahaihe.

23 Karoonda rapapahai, liliuhe ratarunggu. Kapala tarunggu rapohawaa bona Paulu hai Silas nakampai maroahe.24 Ido hai rapopesuahe i tanga-tanga tarunggu iti, hai bitinda rorombali rakapusa i lalu kau au rakalolungi.

25 Tanga kaindi, Paulu hai Silas mekakae hai monanihe motoia Pue Ala. Naninda iti, rapehadingihe toratarunggu au ntanina. 26 I tempo iti, unga pea ara linu rumihi alana tarunggu iti modua-dua. Ope-ope baba, unga pea tebungkahi, hai rante au rapopohilu ope-ope tauna au ratarunggu tebolehi wori. 27 Tingkarami kapala tarunggu hai mearo, hai naita ope-ope baba tebungkahimi. Nawukami pihona ina menoo, lawi napehangu melangkamohe ope-ope tauna au ratarunggu. 28 Agaiana nakambaroa Paulu masisimbuku hangko i lalu tarunggu, nauli, “Ineeko menoo, indetongkai ope-ope!”

29 Roo indo, kapala tarunggu iti merapi hulo, hai melangkami mesua i lalu tarunggu. Moradami hai tepalingkudu i lindona Paulu hai Silas. 30 Roo indo ia moantihe Paulu hai Silas hai nauliangaahe, “Tua, apami wongkoia au hangangaa kubabehi bona nahoremana Pue Ala?”

31 Mehanahe Paulu hai Silas, rauli, “Mepoinalaimoko i Pue Yesu bona tehoremako hangko i pehukuna Pue Ala, oio hai ope-ope tauna au i lalu soumu.”32 Hangko inditi, Paulu hai Silas mopahawemi Ngkorana Pue i kapala tarunggu, hai i ope-ope tauna au i lalu souna.33 Mewali, i wengi iti kapala tarunggu mobahoi belanda Paulu hai Silas. Ia hai ope-ope tauna au i lalu souna rariumohe.34 Roo indo, kapala tarunggu iti moantihe Paulu hai Silas lao i souna hai napaandehe. Matana mpuuhe tohantambi iti, lawi mepoinalaimohe i Pue Ala.

35 Kahalona madondo topoparenta to Roma motudu surodado lao i kapala tarunggu, nauliangaa, “Kabahamohe tauna au rodua iti au rahaka imaindi.” 36 Kanahadina kapala tarunggu parenta iti, nauli i Paulu hai i Silas, “Ara hawa hangko i topoparenta au mouliangaana bona rakabahakau. Mewali, padumokau, hai maroa-roakau i rara.”

37 Agaiana nauli Paulu i surodado iti, “Ikami ide to Romangkai. Bara hintoto ane hangko damani rapohuda-hudaa kara-karangki, rapapahaimongkai i lindonda tauna bosa hai ratarunggumongkai! Hai ide-ide nipeinao nipopeangka ngkandiingkai! Bara kiunde! Niuliangaahe, ihirari au hangangaa mai mokabahangkai.”

38 Mesule hulemohe surodado iti moanti lolitana Paulu i topoparenta. Karahadina topoparenta, Paulu hai Silas iti to Roma, langamohe. 39 Laomohe merapi ampu i Paulu hai Silas, raporangaihe lao i raoa tarunggu, rauli, “Agina padumokau hangko i wanua ide.” 40 Mewali, padu mpuumohe Paulu hai Silas hangko i tarunggu iti lao i souna Lidia. Inditi mampombelambiamohe halalu hampepepoinalainda, hai rapakaroho lalunda. Roo indo, padumohe mopalehi wanua Pilipi.