4
1 Mewali halalu au kupokaahi hai au kukabilai: nipakaroho pepoinalaimi i Pue. Ikamumi au kupomahile hai au kupokatana lalu.Paturo au kahopoana
2 Halalungku Euodia hai Sintike! Kuperapi bona hintuwukau nodo au hintoto i tauna au mepoinalai i Pue. 3 Hai kuperapi irikamu rangangku hampopobago (Sunsugos) au tetida lalumi, nitulungi wohiraia towawine au rodua iti bona ineehe mosisala. Tangangku mani hihimbela hai ikamu, madotahe mamporangaina mopahawe Ngkora Marasa hihimbela hai Klemens hai rangangku au ntanina au hampopobago. Hanganda ope haha teuki i lalu Sura Ngkatuwo.
4 Halalu, hangangaa matana-tana liliukau i lalu pohintuwumi hai Pue. Hambela mani kuuli: hangangaa matana-tanakau.
5 Kuharunga ope-ope tauna ina moita kamaroana lalumi. Nikatuinao, barapi mahae Pue ina hawemi. 6 Inee karao inaomi kana i apa pea. I paka-pakana mekakae liliukau, merapikau i Pue Ala, hai niuli ngkaia kamaroana Iria. 7 Mewali Pue Ala ina mopatinda lalumi anti pohintuwumi hai Kerisitu Yesu. Hai ane Ia mopatinda lalumi, barapokau ina langa, lawi kuasaNa melumbu hangko i ope-ope au peisa tapekiri.
8 Kahopoana halalu, kuperapi bona nipailalu liliu hinangkana au maroa hai au hintoto ratoia. Apa au tou, apa au hintoto rabila, apa au manoto, apa au malelaha, apa au merae, hai apa au teadai, itimi au hangangaa nipailalu. 9 Apa au nipegurui hangko iriko, maroa paturongku au nihadi hai au nidoko, maroa babehiangku au niita, itimi au hangangaa nibabehi. Ane nodo nibabehi, Pue Ala ina mamporangaikau hai mopatinda lalumi.
Paulu manguli ngkaia kamaroana i to Pilipi
10 Matana mpuu lalungku halalu, hai motoiana Pue, lawi nauri mahaemona bara mohadi bambari hangko irikamu, agaiana ide-ide nipopakatuana petulungimi. (Barari kuuli barapona nikatuinao agaiana kadanari ara katepakami motulungina.) 11 Tunggaiaku manguli nodo bara anti kamakurangku, lawi biasamona mampokatana apa au ara iriko. 12 Peisana tuwo i anu-anu au haodi pea, peisa worina tuwo i anu-anu au ngkaia. Nauri apa pea au morumpana, kupamatana liliu lalungku maroa i tempo buhu, ba i tempo rimi, ngkaia ba haodi. 13 Kubuku molindo hinangka au merumpa, lawi Kerisitu mopakaroho lalungku. 14 Nauri nodo, maroa mpuu lalumi lawi nitulungimona tangangku i lalu kapari.
15 Halalungku to Pilipi, niisami, hangkoia mopahawena Ngkora Marasa i boeami, hai i kapadungku hangko i tampo Makedonia, bara ara jumaa i boea ntanina au motulungina. Batena pea ikamu au motulungina i tempo iti. 16 Agaiana bara ido pea, i kamakurangku i tempoku mani i wanua Tesalonika, bahangkiami belangku nipopakatua apa au kuparaluu. 17 Kuuli nodo, bara anti kamampeinaongku mbuli molambi kabula lalumi. Agaiana peundeaku bona hangko i kamaroana lalumi, katetetambaia pewatina Pue Ala irikamu. 18 Mewali bona niisa: ope-ope au nipakatu, kulambimi hangko i Epafroditus. Pakatumi iti bara pea handa, agaiana melabitori hangko i apa au kuparaluu. Kabula lalumi iti nodo anu-anu mawongi au nipopenomba i Pue Ala. Popenombami iti Napokana mpuu, hai matana laluNa modoko. 19 Pue Ala au kupenombai ina mopabukei hinangka au niparaluu, moula peawaNa au mahile ntepuu, lawi mohintuwumokau hai Kerisitu Yesu. 20 Tetoiami Pue Ala Umanta hawe i hae-haena! Amin.
Kahopoa sura
21 Nipahaweana tabeangku i ope-ope tauna au mepoinalai i Kerisitu Yesu au arahe inditi. Nidoko wori tabea hangko i halalumi hampepepoinalai au arahe hihimbela hai iko inde. 22 Ope-ope to Sarani i wanua ide, pelumbunami au arahe i souna Kaisar, mopakatu worihe tabeanda irikamu, halalu. 23 Kuharunga Amputa Yesu Kerisitu mowatikau ope-ope.
Hangko iriko
PAULU