4
1 Ikamu ampu hawi, niweihe hawimi apa au maroa hai au hintoto, lawi niisa kaarana wori Ampumi i suruga.Paturo kana i pekakae hai babehianta i tauna au barahe to Sarani
2 Ineekau oha-oha mekakae, hai i lalu pekakaemi hangangaa mainga-ingakau hai niuli liliu ngkaia kamaroana i Pue Ala. 3 Hai nipekakaea woringkai bona nabungkahiangkai Pue Ala rara mopahawe NgkoraNa au mampololita tunggaiaNa au napabukei Kerisitu. Hangkoia tunggaiaNa iti tewuniangi mani, agaiana ide-ide bambari kana i Kerisitu kupahawemi. Ido hai ratarungguna. 4 Nipekakaea wongkoia bona kubuku mopakanoto bambari kana i Kerisitu moula kahihintotoana.
5 Ane mampogaloakau tauna au barake hampepepoinalai, hangangaa mapande-pandekau moanti watami bona peisakau mampopobundu katepakami mopahaweahe rara mepoinalai i Pue. 6 Ane molololitakau hai ihira, nipamaalusu lolitami bona moantikau katuwo maroa irihira. Hai nipekiri maroa apa au nipahaweahe bona niisa mohanai pampekunenda.
Kahopoa sura
7 Kutudumi halalunta Tikikus lao irikamu bona nauliangaakau apa au mewali iriko inde. Tikikus iti iami halalunta au tapokaahi hai rangangku hampopobago au mampopolumao liliu bagona Pue. 8 Ia kutudu lao mosondakikau bona niisa noumba katuwongki hai bona maroho lalumi. 9 Hihimbela hai Tikikus, kutudu worimi Onesimus, halalu hambomboeami au tapokaahi, hai ia tauna au peisa rapoinalai. Ihira rodua ina mouliangaakau ope-ope au mewali inde.
10 Aristarkus, rangangku ratarunggu, mopakatu tabeana irikamu. Markus halaluna Baranaba, mopakatu wori tabeana. (Nikatuinao apa au kuperapi hangkoia bona ane hawe Markus deade, nidoko maroa!) 11 Tabeana wori Yesu, au rahanga wori Yustus. Hangko i ope-ope to Yahudi au mepoinalai i Pue Yesu, ihira pea talu ide au mobago hihimbela hai iko mampopolumao bago poparentana Pue Ala hai mopakarohohe lalungku.
12 Tabea wori hangko i Epafras, hawina Kerisitu Yesu au hambomboeami. Napekakaea liliukau bona maroho peangkami hai manoto pepoinalaimi moula ope-ope peundeana Pue Ala bona datikau masala. 13 Kusabiki kamadotana i lalu pobagona irikamu au ara i Kolose hawe-hawe wori i halalunta au i Laodikia hai Hierapolis. 14 Tabeana wori Dokter Lukasi au tapokaahi, hai hangko i halalunta Demas.
15 Nipahawea wongkamia tabeangki i halalu hampepepoinalainta au arahe i wanua Laodikia. Tabeangki i Nimpa hai i jumaa au mamingguhe i souna. 16 Ane roomi nibasa sura ide, kuperapi bona nipakatuahe to Sarani i Laodikia bona rabasa wori. Hai surangku au kupakatuahe to Laodikia, nibasa wori. 17 Nipahawe i Arkipus bona hangko i laluna mampopolumao bago au nawei Pue!
18 Tabea hangko iriko, Paulu. Kahopoa sura ide kuuki haduduangku. Nikatuinao wongkoia ide-ide tangangku mani i lalu tarunggu. Pue mowatikau.
Hangko iriko
PAULU