Paturo bona malelaha tuwonta
4
1 Mewali halalu, kiperapi bona nipeulai ope-ope paturo au nihadimi hangko irikami bona babehiami moula peundeana Pue Ala. Katouana, ide-ide maroami babehiami. Agaiana anti kuasa au naweingkai Pue Yesu, kiperapi hai kipari-pariakau bona nitambai mbuli kamaroana babehiami. 2 Lawi niisami paturo au kipahaweakau hai kuasana Pue Yesu. 3 Ide peundeanami Pue Ala bona malelaha katuwonta, hai mokaraohikau babehia au merikai. 4 Ikamu tobalilo, hangangaa mohintuwukau hai towawinemi moula rara au maroa i peitana Pue Ala hai i peitana manusia.a 5 Ineekau naanti peundeana lalumi au kadake, nodo au biasa mewali i tauna au barahe moisa Pue Ala. 6 I babehia tobalilo hai towawine, ineekau mobabehi sala i tauna ntanina lumbunami i halalumi hampepepoinalai. Hangkoia kipakanotoamokau pehukuna Pue Ala i tauna au mobabehi nodo. 7 Lawi tunggaiana Pue Ala mokakioke, barake Nakakio bona mobabehike sala agaiana Nakakioke bona malelaha tuwonta. 8 Ido hai ane ara tauna au mosapuaka paturo ide, bara manusia au nasapuaka, agaiana Pue Alari au nasapuaka! Tunggaiana Pue Ala moweike Inao Malelaha bona malelaha tuwonta.9 Kaliliuana halalu, ara paturo au manguli hangangaa mampokaahike halalunta hampepepoinalai. Katouana barapi paraluu kiukiakau paturo iti, lawi napaturomokau Pue Ala bona mombepokaahikau hadua hai hadua. 10 Katouana, maahimokau i ope-ope halalumi hampepepoinalai i Makedonia. Agaiana kiperapi mpuu halalu bona babehiami iti nitambai mani. 11 Nipari-pari mohintuwu hai rangami. Nipopolumao maroa bagomi haduduami, inee nipesuaki urusiana rangami. Mobagokau mohaoki paandemi, nodo au kipaturoamokau hangkoia. 12 Ane nodo nibabehi, barapokau ina merapi-rapi i rangami. Hai ina raadaikau tauna au barahe mepoinalai i Pue Yesu.
Kahawena hule Pue Yesu
13 Halalu, tunggaiana lalungki bona moisa mpuukau apa au ina mewali i ranganta au matehe dati masusa ntepuu lalumi nodohe tauna au bara ara peharunganda i Pue Ala. 14 Ane tapoinalai Pue Yesu au mate hai napatuwo hule Pue Ala, hangangaa tapoinalai wori ope-ope tauna au mate au mepoinalai Iria ina tuwo hule worihe. Hai ina naguluhe Pue Ala hihimbela hai Yesu.
15 Idemi paturo au kidoko hangko i Pue Yesu: i kahawena hule Pue Yesu, ikita au tuwo manike, barake ina mampehindorungi ranganta au matemohe. 16 Lawi i tempona Pue Yesu mendaulu hangko i suruga, ina tahadi hampai pekakiona tadulakonda malaeka hai pomoni tatamburuna Pue Ala. Hai i tempo iti, ina tuwo hulehe ope-ope tomate au mepoinalai i Kerisitu. 17 Hai roo indo, ikita au tuwo manike i tempo iti ina Naoreke hihimbela hai ihira lao i lalu gawu mampohidupaa Pue Yesu i laerawa. Hai ina maidake hihimbela hai Pue hawe i hae-haena. 18 Mewali halalu, hangko i bambari ide, hangangaa mombepalindoke hadua hai hadua.