Paulu mampopaingaahe kana i kahawena hule Pue Yesu
5
1 Halalu ope-ope, bara paraluu kiukiakau impira alo kahaweana hule Pue. 2 Lawi niisa halalu: alo kahaweana Pue iti ina mai nodo topanangka i tanga kaindi; ope-ope tauna i dunia ina tingkarahe. 3 I temponda tauna au barahe moisa Pue Ala manguli, “Maroa mpuu katuwonta, bara ara kalanganta,” unga pea hawe kapari mahile au morumpahe, nodo pantodihana hadua towawine au ina moana. Bara mpuu huba hadua au tekabaha hangko i kapari iti.4 Agaiana ikamu, halalu, moisamokau Pue Ala, hai barapokau ara i lalu kamakaindi. Mewali, i alo kahawena hule Pue Yesu, barakau ina tingkara nodo tauna au nasuaki topanangka. 5 Ikamu ope-ope arakau i lalu kamabaa. Lempona, mobabehikau apa au maroa; barake nodo tauna au ara i lalu kamakaindi.
6 Mewali, ineeke lera, ineeke leta mposo nodo tauna au bara mani moisa Pue Ala. Mainga-ingake, hai hangangaa tapamanoto pekirinta. 7 Lawi tauna au ara i lalu kamakaindi, leta peahe, malangu-languhe hai bara manoto pekirinda. 8 Agaiana ikita ide iamoke tauna au ara i kamabaa; ido hai pekirinta hangangaa manoto. Hangangaa mepoinalai liliuke i Pue Ala hai hangangaa mampokaahike ranganta, hangangaa tapakaroho peharaunganta i kaNahoremanta Pue Ala. Itimi parewa pombeala au ina tapolaba moewa kamakaindi. 9 Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu. 10 Yesu Kerisitu mate mopahuruke bona ane hawe deade, ina tuwoke hihimbela hai Ia. Kehapiri matemoke ba tuwo manike i tempo iti, batenta ina tuwo hihimbela hai Ia.
11 Idomi hai halalu, hangangaa mombepaturokau hai mombepakaroho mpolalukau nodo au nibabehi ide-ide.
Paulu moweihe to Tesalonika lolita bona mohintuwuhe
12 Halalu, kiperapi bona nibilahe tauna au mobago mantimi i lalu bagona Pue i olomi, lawi ihira napileimohe Pue bona monini hai mopaturokau. 13 Nibila hai niadaihe, hai nipokaahihe anti pobagonda. Mohintuwukau hadua hai hadua.
14 Halalu, kiperapi bona rangami au lohehe mobago niweihe lolita. Nipalindohe au masusa lalunda. Nipakarohohe au malede pepoinalainda, hai hangangaa sabarakau i ope-ope tauna. 15 Ane ara au mobabehi dake irikita, inee wori tahurungi hai dake. Agina mobabehi liliuke au maroa i ranganta hai i ope-ope tauna.
16-18 Anti pohintuwuta hai Yesu Kerisitu, hangangaa matana liliuke, mekakae liliuke hai manguli liliu worike ngkaia kamaroana i Pue Ala kehapiri apa au mewali, lawi itimi peundeana Pue Ala irikita.
19 Inee nihomboki pobagona Inao Malelaha. 20 Inee bara nipoinalai lolitana Pue Ala au rapahawe tuduaNa. 21 Niparesa maroa-roa hinangka lolita iti, hai nikingkimi apa au maroa. 22 Nikaraohi ope-ope babehia kadake.
Tabea hai lolita kahopoana
23 Mekakaengkai i Pue Ala au moweike roa ngkatuwo, kiuli, “O, Pue Ala! Kiperapi bona babehianda to Tesalonika Nupamanoto liliu, duuna malelaha ntepuu katuwonda. Nuporangaihe i lalu katuwonda, maroa lalunda ba pekirinda ba watanda bona dati ara kamasalanda i kahaweNa hule Amputa Yesu Kerisitu.” Nodomi pekakaengki. 24 Pue Ala au mokakiokau, au ina mopabukei hinangkana iti, lawi Ia madudu.
25 Halalu, kiperapi bona nipekakaea woringkai.
26 Nipahaweangkai tabeangki hai niuliangaahe kamaahingki i ope-ope halalunta hampepepoinalai.
27 I lalu kuasa au naweina Pue Yesu, kuuliangaakau bona sura ide rabasa i lindonda ope-ope halalunta hampepepoinalai au arahe inditi.
28 Amputa Yesu Kerisitu mowatikau ope-ope.
Hangko iriko
PAULU