Surana Suro Paulu au karombelana i to Sarani i wanua
Tesalonika
1
1-2 Sura ide hangko irikami: Paulu, Silas hai Timotiu. Sura ide kipakatu irikamu halalungki hampepepoinalai i Tesalonika au menombakau i Pue Ala Umanta hai i Pue Yesu Kerisitu! Mekakaengkai bona Pue Ala Umanta hai Pue Yesu Kerisitu mowatikau hai moweikau roa ngkatuwo.Paulu manguli ngkaia kamaroana i Pue Ala anti pepoinalainda to Tesalonika
3 Halalu-halalu, barangkai oha-oha manguli ngkaia kamaroana i Pue Ala anti kaikamuna. Hai hintoto mpuu kibabehi nodo, lawi kamaroho-rohoami pepoinalaimi i Pue Yesu, hai katetetambaiami ahimi i hangka rangami. 4 Ido hai i jumaa ntanina, kitoiakau i lindonda halalunta hampepepoinalai. Anti kamatanangki, ido hai kiuliangaahe: “To Tesalonika iti, nauri rapopeahi-ahihe hai narumpahe kapari, batena mepoinalai liliuhe i Pue Yesu.”
5 Mewali, anti kamarohona pepoinalaimi, tongawa kamanotona pebotusina Pue Ala. Moula pebotusiNa, ina mewalikau taunaNa i lalu poparentaNa lawi mantahakau i lalu kapari au morumpakau anti peulami i Pue Ala. 6 Pue Ala mobabehi apa au manoto hai batena mohurungi babehianda tauna au mampopeahi-ahikau. 7 Hai Ia ina mokabahakau hangko i kaparimi, nodo wori ikami. Hinangkana iti ina Nababehi i kahawena hule Pue Yesu au ina mendaulu mai hangko i suruga hai malaekaNa au makuasa hai api au lolaa. 8 Hai Iami au ina mohuku tauna au barahe moisa Pue Ala hai au barahe mampeulai Ngkora Marasa au mopahawe kahemana Yesu Amputa. 9 Tauna au barahe mepoinalai ina molambihe pehuku au bara mokahopoa, hai ina ratendehe hangko i Pue, duuna barapohe moita kamakuasaNa hai peawaNa au mahile. 10 Ope-ope iti ina mewali i kahawena hule Pue Yesu. I tempo iti, ope-ope taunaNa ina mampomahile hangaNa, hai ope-ope tauna au mepoinalai Iria ina manguli, “Tongawa mpuu peawaNa!” Hai ikamu wori halalu, batemi mampomahile worikau Pue Yesu i alo iti, lawi nipoinalaimi bambari au kipahaweakau.
Paulu mampekakaengaahe to Tesalonika
11 Idomi hai kipekakaea liliukau halalu. I pekakaengki kiuli node: “O Pue Ala Umangki! Kiperapi bona Nupopewali tunggaiaMu i lalu katuwonda to Tesalonika duuna Nuimbahe tauna au hintoto rauli taunaMu, lawi Nupileimohe. Kiperapi bona anti kuasaMu, Nupopewali ope-ope tunggaianda au maroa, hai Nupahandai hinangkana au rapobago anti pepoinalainda i Pue Yesu.” 12 Tunggaiaki mekakae bona anti babehiami au maroa iti, hangana Yesu Amputa rapomahile, hai bona ikamu napomahile worikau Pue Yesu. Ope-ope iti hangangaa mewali anti kabulana laluna Pue Ala Umanta hai Pue Yesu Kerisitu.