Yesu rahaka
18
1 Karoona Yesu mekakae, meangkami hai topeguruNa lao i raoa wanua. Mowetamohe lembo Kidron lao i bonde au ntanda i orupena. 2 (Yudasi, au mampobalu Yesu, moisa kaiumbana bonde iti, lawi Yesu hai topeguruNa dokohe mogulu inditi.) 3 Mewali laomi Yudasi i bonde iti hihimbela hai hamporangaa surodadonda to Roma hai topokampai Souna Pue Ala au rapohawaahe kapala-kapala tadulako mpenomba hai toParisi lao mohaka Yesu. Moantihe parewa pombeala, lantera hai hulu.4 Naisa Yesu ope-ope au hangangaa mewali i wataNa. Ido hai laomi mampohidupaahe tauna iti, Napekune, “Hema nihaoki?”
5 Rauli, “Yesu to Nasare.”
Nauli Yesu, “Ikomi.” (Yudasi, au mampobalu Yesu, meangka inditi hihimbela hai ihira.)
6 I kanauliangaanda Yesu, “Ikomi dide,” mousulimohe hai madungkahe. 7 Napekune mbuli Yesu, “Hema nihaoki?”
Rauli, “Yesu to Nasare.”
10 Hangko indo, Simo Peturu mowuka pihona mobata hadua hawina Tadulako Mpenomba Mahile, kana talinga koanana pane maingihi. (Hangana hawi iti, Malkus.) 11 Nauli Yesu i Peturu, “Pusa hule pihomu! Ba nupehangu Kupousulia kapari au Napakanotoa amimoNa UmaNgku?”a
Yesu i lindona Hanas
12 Hangko inditi, surodadonda to Roma hai tadulakonda, hai topekampai au ratudu tadulakonda to Yahudi, laomohe mohaka Yesu. Ia rahilu 13 hai nguru-nguruna raanti lao i Hanas, pengantina Kayapas. Kayapas iami Tadulako Mpenomba Mahile i pare iti. 14 (Kayapas itimi au mouliangaahe tadulakonda to Yahudi hangkoia, “Aginami hadua tauna mate mopahuru ope-ope tauna.”)*
Peturu mosapuaka peulana i Yesu
15 Simo Peturu hai hadua topeguruna Yesu au ntanina meulahe i Yesu. Topeguruna Yesu au hadua iti, hampombekaisangana Tadulako Mpenomba Mahile. Mewali, topeguruNa iti mesuami hihimbela hai Yesu i tabangaa souna Tadulako Mpenomba Mahile. 16 Peturu mepegia pea i raoa baba. Hangko inditi, topeguruna Yesu au hadua iti, lao hulemi i raoa mololita i towawine au mokampai baba, ido hai Peturu rapaliu mesua i lalu hihimbela hai ia.
17 Towawine topokampai baba iti mekune i Peturu, nauli, “Bara pae oio wori hadua topeguruNa tauna olou?”
Nasapuaka Peturu, Nauli, “Bara!”
18 Tempo iti, tempo makuli. Mewali, bahangkia hawi hai topekampai mopatuwomohe api i tabangaa, hai meangkahe motoleliki api mamindu. Peturu meangka wori hihimbela hai ihira mamindu.
19 I lalu sou iti, Tadulako Mpenomba Mahileb mekunemi i Yesu, nauli, “Hema hahahe topeguruMu? Apa au Nupaturoahe tauna?”
20 Nauli Yesu, “MololitaNa i katou-touana i ope-ope tauna. Mepaturo liliuNa iumba pea sou penombaa hai i Souna Pue Ala, au paka rapoteruhui to Yahudi. BaraNa hambela mepaguru ngkabuni. 21 Mewali, moapari hai nupekuneNa nodo? Nupekunemi i tauna au mohadimohe pepaguruNgku. Hangangaa raisa mpuu apa au Kuuli.”
22 Kanaulina Yesu nodo, hadua topekampai au meangka i holaNa mohapa lindoNa Yesu, nauli, “Bai mpuuKo mololita nodo i Tadulako Mpenomba Mahile!”
23 Nauli Yesu, “Ane lolitangku iti masala, nuuli peami inde apa kamasalana. Agaiana ane au Kupololita iti tou, moapari hai nuhapaNa?” 24 Hangko inditi, Hanas motuduhe topekampai moanti Yesu lao i Tadulako Mpenomba Mahile Kayapas. I tempo iti, taiena Yesu tehilu mani.
25 Tangana mani Simo Peturu meangka mamindu hihimbela hai topekampai, arahe tauna mekune iria, rauli, “Barato woriko pae topeguruNa tauna olou?”
Agaiana Peturu mesapu mbuli, nauli, “Bara wongkoia iko!”
26 Inditi ara wori hadua hawina Tadulako Mpenomba Mahile. Hawi iti halaluna tauna au nabata Peturu talingana. Nauli hawi iti i Peturu, “Bara pae oio au kuita i bonde iti inona hihimbelako hai Yesu?”
27 Mesapu mbulimi Peturu, nauli, “Bara!” I tempo iti, motuturuami manu.
Yesu raanti i lindona Gubernur Pilatu
28 Madondo-dondo, Yesu raanti hangko i souna Kayapas lao i souna gubernur. Tadulakonda to Yahudi, barahe mesua i lalu souna gubernur datihe mewali kedai moula atura agamanda, lawi gubernur iti bara to Yahudi. Hai ane mesuahe i lalu souna, barahe peisa moande paande Pasa. 29 Mewali, Gubernur Pilatu laomi i raoa mampohidupaahe hai napekunehe, “Apa au nisalaia tauna ide?”
30 Rahanai, rauli, “Ane rapana ia bara tauna au kadake, kebara kianti i Gubernur.”
31 Nauli Pilatu, “Nialami hai nianti hule! Nibotusimi kara-karaNa moula atura agamami!”
Rauli to Yahudi iti, “Ikami, barangkai rapaliu mohuku mate tauna.” 32 (Ide mewali bona tepabukei apa au nauli Yesu kana i kapateNa.c)
33 Hangko inditi, Pilatu mesua hulemi i lalu sou, hai natudumohe taunana moanti Yesu i lindona, hai napekune, “Tou pae datundako to Yahudi?”
34 Nauli Yesu, “Pekunemu iti, ba hangko irio haduduamu, ba nuhadi pea hangko i tauna ntanina?”
35 Nauli Pilatu, “Iko barana to Yahudi! Hangka to YahudiMu hai kapala-kapala tadulako mpenomba au moantiKo mai iriko. Sala apari au Nubabehi?”
36 Nauli Yesu, “Iko, baraNa nodo datu au moparenta i dunia ide. Ane kenodoNa datu i dunia ide, tauna au meula Iriko kehangangaa meewahe bona ineeNa rahaka hai rahuhu i tadulakonda to Yahudi. Agaiana baraNa datu au hangko i dunia ide.”
37 Nauli mbuli Pilatu, “Ane nodo, tou mpuu pae datuKo?”
Nauli Yesu, “Nodo au nuuli Iko ide datuNa. Ido hai rapoanakaNa i dunia ide bona mopahaweNa apa au tou. Tauna au naunde moula apa au tou, mampehadingihe lolitaNgku.”
38 Nahanai Pilatu, “Apari lempona lolitaMu au manguli ‘apa au tou’?”
Yesu rahuku mate
Roo indo, lao mbulimi Pilatu i raoa mouliangaahe tadulakonda to Yahudi, “Nauri hampaka salaNa, bara ara kulambi. 39 Agaiana, moula au biasa rababehi, pare-parena i Alo Posusa Pasa, kukabahaakau hadua toratarunggu, ba hema peundeami. Mewali, noumba? Ba niunde ane kukabahaakau datunda to Yahudi ide?”
40 Monganga-ngangamohe, rauli, “Inee, inee Ia! Aginari Baraba!” (Baraba iti, hadua au moewa topoparenta.)