<<    <     Lukasi     23     >    >> 
Yesu i lindona Gubernur Pilatu
23
1 Roo indo, laomohe ope-ope tadulako iti hai moantihe Yesu i lindona Gubernur Pilatu. 2 Kahawenda inditi, rapepongkami mosalai Yesu, rauli, “Tauna ide kilambi tangaNa mopakanawo tauna bosa! Nauli barangkai paraluu mobaiari asele i Kaisar i Roma. Hai Nauli wori kaIanami Datu au rahanga Kerisitu.”
3 Mewali, mekunemi Pilatu i Yesu, nauli, “Datunda mpuuKo pae to Yahudi?”
Nahanai Yesu, “Tou, nodo au nuulimi.”
4 Hangko indo, nauli Pilatu i kapala-kapala tadulako mpenomba hai i tauna bosa, “Tauna ide bara kulambi salana au ina kuhukua.”
5 Agaiana rapaliliumi pesalainda Iria, rauli, “Anti pepaturoNa, Ia mohuweki lalunda tauna bosa moewa poparenta i humalele tampo Yahudi, mepongka i Galilea duuna hawe inde.”
6 Kanahadina Pilatu lolitanda iti, napekunehe, “To Galilea pae tauna ide?”
7 Rahanai, “Io, Ia to Galilea.” Kanahadina Pilatu pehananda, natudumi tauna moanti Yesu lao i Datu Herode, lawi Herode datu au moparenta i tampo Galilea. Tempo iti, Herode ara wori i Yerusale.
Yesu i lindona Datu Herode
8 Matana mpuu Herode moita Yesu, lawi mahaemi nahadi bambari kana Iria, hai naharunga wori kaina Natudungiana hampaka tanda kuasa au metingkarai. 9 Ido hai Herode mopahawe ngkaia pakana pampekune i Yesu, agaiana bara ara au Nahanai Yesu. 10 Ara worihe inditi kapala-kapala tadulako mpenomba hai guru-guru agama au mosalai ntepuuhe Yesu i lindona Herode. 11 Roo indo, Herode hai surodadona mampopowadi-wadi hai mopapakoihe Yesu. Rabadui badu datu, hai raanti hule lao i Pilatu. 12 I alo iti, Herode hai Pilatu mombepomaroamohe, lawi hangkoia moiwalihe.
Rabotusi bona Yesu rahuku mate
13 Hangko indo, Pilatu mogulu mbulimi ope-ope kapala tadulako mpenomba hai totosae boea hai tauna bosa, 14 pane nauliangaahe, “Tauna ide, nianti mai iriko hai niuli Ia mohuweki lalunda tauna bosa bona moewa poparentata. Alo ide kuparesami i lindomi, agaiana bara kuhumba hampaka babehiaNa au kadake nodo au nisalaia. 15 Nodo wori pelambiana Herode, lawi napopesule pea mai iriko. Tauna ide bara mobabehi apa pea au hintoto rahukua mate. 16 Mewali, ina kuhepe-hepe peami hai pekandangi au modui roo indo, kukabaha.”
17 (Pilatu manguli nodo, lawi pare-parena i Alo Posusa Pasa, ia mokabaha hadua tauna au ratarunggu, ba hema au raperapi tauna bosa.)
18 Karahadina tauna bosa lolitana, monganga-ngangamohe rauli, “Ia hangangaa rapapate! Baraba au nukabaha!” 19 (Baraba iti, ratarunggu anti pepapatena hai peewana i lalu wanua.) 20 Hambela mani Pilatu Mololita i tauna bosa, lawi napeinao mokabaha Yesu. 21 Agaiana monganga-nganga liliuhe masisimbuku, rauli, “Papate! Papate i kau mombehape!”
22 I kataluna belana, Pilatu mololita irihira, nauli, “Apa dakeNa? Mogalori hampaka salaNa au hintoto rapapatea, bara ara kulambi. Kupapahai pea hai kukabaha.”
23 Agaiana tauna bosa iti mopasimbukumohe pamperapinda monganga-ngangahe bona Yesu rapaku i kau mombehape. Kahopoana tauna iti menangihe. 24-25 Nabotusimi Pilatu bona Yesu rahuku mate hai Baraba au rakabaha moula pamperapinda tauna bosa. Roo indo, nahuhumi Yesu i surodadonda to Roma bona rapapate moula peundeanda to Yahudi.
Yesu rapaku i kau mombehape
26 Hangko inditi, surodado to Roma moantimohe Yesu lao i raoa wanua, hai i tanga rara mampohidupaahe hadua to Kirene au hangko hawe i Yerusale, hangana Simo. Simo iti rataha hai rapari-pari motalondo kau mombehape meula i bokona Yesu. 27 Tangana Yesu raanti lao i raoa wanua, bosahe tauna meula Iria, tepesuahe bahangkia towawine au moteriahi Yesu. 28 Yesu mampembalilingihe towawine iti, hai mololita, Nauli, “Towawine to Yerusale, inee Iko au niteriahi, agaiana niteriahi watami haduduami hai anami. 29 Lawi barapi mahae tauna ina manguli: ‘Morasihe towawine au lalo hai au bara mopatomi ananda!’ 30 I tempo iti, tauna ina manguli: ‘Barapi kiunde tuwo! Agina narumpingingkai bulu hai natabungingkai tampo!’ 31 Ane tauna mobabehi nodo i kau au tuwo,a apa mani i kau au bangi.”
32 Ara wori rodua tauna au kadake babehianda raanti bona rapapatehe hihimbela hai Yesu.
33 Kahawenda i bulu au rahanga Bulu Banga waa, rapakumi Yesu i kau mombehape hihimbela hai rodua tauna au kadake iti. Hadua rapaku ntanda i koanaNa hai hadua ntanda i kabeoNa.34 Yesu mekakae, Nauli, “Uma, Nuampungi wohiraia tauna ide, lawi bara raisa apa au rababehi.”
Surodado au mopaku Yesu motendemohe dadu bona mopakanoto kahemana au molambi hampiNa.
35 Bosa tauna meangka i woi kau mombehape mampengoa Yesu. Ara worihe tadulakonda to Yahudi au mopapakoi Ia, rauli, “Peita! Ia motulungi tauna ntanina, agaiana wataNa bara Nabuku Natulungi. Ane tou-tou mpuu kaIana Datu Topehompo au napilei Pue Ala, hangangaa mendaulu hangko i kau mombehape iti!”36 Surodado mopapakoi worihe Yesu, hai rahungkuki pane rapaenu anggoro au mangilu,37 rauli, “Ane tou-tou datundaKo to Yahudi, tulungimide wataMu!”
38 I kau popakua i wongko waaNa, teuki node: IDEMI DATUNDA TO YAHUDI.
39 Hadua tauna au kadake babehiana au rapaku i kau mombehape hihimbela hai Yesu, mopapakoi Yesu, nauli, “Nuuli kaOiona Datu Topehompo! Ane tou mpuu apa au Nuuli iti, tulungimide wataMu hai Nutulungi woringkai!”
40 Agaiana tohaduana mokambaroa rangana, nauliangaa, “Barako pae langa i Pue Ala? Ide ikita, hihimbelake rahuku mate hai Ia. 41 Ane ikita, hintotoke rahuku mate anti babehianta au kadake, agaiana Ia, bara mpuu ara salaNa.” 42 Roo indo, nauli mbuli tauna iti, “Yesu, Nukatuinao wongkoia, ane haweKo i poparentaMu!”
43 Nauli Yesu, “Tou mpuu au Kuuliangaako, i alo ide peami, ina hihimbelako hai Iko i lalu Paradesi.”b
Yesu mate
44 Pualomi, ba tinti hampulo hai duami pae, unga pea makaindi i humalele tampo iti hawe tinti talu. 45 Rindi bana au ratoe i lalu Souna Pue Ala, mahepa ntanga.
46 Roo indo, naulimi Yesu masisimbuku, “Uma, i lalu taieMu Kupaisare inaoNgku!” KarooNa mololita nodo, opemi inaoNa.
47 Kanaitana tadulako surodado apa au mewali iti, motoiami Pue Ala, nauli, “Tongawa mpuu! Ia ide tauna au manoto!”
48 Pesulenda tauna bosa au lao mosabiki apa au mewali iti, mohapa-hapamohe pondanda lawi rumihi mpuu penosonda. 49 Ope-ope tauna au mahaemohe moisa Yesu tepesuahe towawine au meula hangko i Galilea, meangka ngkaraohe bona mampeitahe hinangkana au mewali iti.
Yesu ratawu
50-51 I tempo iti, ara hadua tobalilo au rahanga Yusupu au hangko i boea Arimatea i tampo Yudea. Yusupu iti, iami tauna au maroa laluna hai manoto babehiana. Mahaemi mampegia kahawena poparentana Pue Ala. Ia wori hadua tadulako i Pogombo Topeparesa Mahile Agama Yahudi, agaiana bara napokana pobotusinda tadulako iti au manguli Yesu hangangaa rahuku mate. 52 I kapatena Yesu, laomi Yusupu mampombelambia Pilatu mamperapi wataNa Yesu bona ratawu.
53 Roo indo, motaurami watana Yesu hangko i kau mombehape, nabungkuhi hai bana au bula, hai nawoli i lalu talumba au rababehi i bulu watu. Talumba iti bara mani hambela rapopatawui.
54 Alo iti iami Alo Pampasilolonga, lawi kahalona Alo Pengkarooangaa. Moula adanda to Yahudi, mepongka kaindi iti, rapaliami mobago. 55 I kanaantina watana Yesu lao i talumba, bahangkiahe towawine au mamporangai Yesu hangko i Galilea meulahe i Yusupu. Kahawenda i talumba, moitamohe noumba watana Yesu rawoli inditi. 56 Roo indo, mesulemohe lao i boea mopasilolonga rampa-rampa hai lana mawongi bona rapake mobumbuhi watana Yesu, agaiana i Alo Pengkarooangaa barahe mobago moula Aturana Musa.