<<    <     Lukasi     24     >    >> 
Yesu tuwo hule
24
1 Madondo-dondo i alo Minggu, laomohe towawine iti i talumba moanti lana mawongi au rapasilolongami. 2 Hawemohe inditi, raita watu petuko baba talumba telolimi. 3 Pesuanda i lalu talumba, ralambi watana Pue Yesu barapi ara. 4 Wuli mani lalunda moita iti, unga peahe ara rodua tobalilo au mehampi mengkila-ngkila meangka i holanda. 5 Towawine iti, tepalingkuduhe anti kalanganda. Agaiana rodua tobalilo iti mouliangaahe, “Moapari hai nihaoki tauna au tuwo i olonda tomate?
6 Barapi ara inde. Ia tuwo hulemi! Bara pae nikatuinao apa au Nauliangaakau hangkoia i tempomi mani i tampo Galilea?7 Nauli, Ana Manusia hangangaa rahuhu i tauna au kadake bona rapaku i kau mombehape, agaiana i kataluna alona ina tuwo hule.”
8 Roo indo, hangko rakatuinaori lolitana Yesu. 9 Pesulenda towawine iti hangko i talumba, rapahawemi ope-ope au mewali iti i topeguruna Yesu au hampulo hai hadua hai i ope-ope tauna au ara inditi. 10 Towawine iti, iami Maria Magdalena, Yohana, hai Maria inana Yakobu, hai ara worihe towawine ntanina au hihimbela hai ihira. 11 Agaiana karahadina topeguruNa lolitanda iti, bara rapoinalai; raimba pea lolita au bara tou.
12 Peturu liliu meangka hai melangka lao i talumba. Kahawena, motumpami meloga i lalu, naita bana popebungkuhina pearai au ara inditi. Roo indo, mesulemi, hai mekune-kune i laluna kana i apa au mewali iti.
I rara lao i boea Emaus
13 I alo iti wori, ara rodua topeulana Yesu au lao i boea Emaus. Kakaraona boea Emaus iti, ba arato pae hampulo hai hakilo hangko i Yerusale. 14 Tanganda molumao, mampololita liliuhe kana i ope-ope au hangko mewali. 15 Tanganda mololita, unga pea hawe Yesu mohungkukihe hai molumao sambelahe. 16 Moitamohe Yesu, agaiana ara au mopawuli pekirinda ido hai bara raisa kaIana Yesu. 17 Tanganda molumao, mekunemi Yesu irihira, Nauli, “Apari au nipololita tangami molumao?”
Mengkaroomohe lumao hai tongawa kamasusana lalunda. 18 Roo indo, hadua au rahanga Kleopas mekune i Yesu, nauli, “Hangko iumbariKo mai pane bara Nuisa apa au mewali inde i Yerusale bahangkia alona au liu?”
19 Nauli Yesu, “Apari au mewali?”
Mehanahe, rauli, “Au mewali iti kana i Yesu to Nasare! Ia hadua nabi au makuasa i pobagoNa hai i pololitaNa, maroa i peitana Pue Ala ba i peitana tauna. 20 Kapala-kapala tadulako mpenomba hai totosaengki i boea mohuhu Ia i topoparenta bona rahuku mate. Ido hai Yesu rapakumi i kau mombehape. 21 Katouana, Iami au kiharunga ina mokabahake, ikita to Isaraeli hangko i iwalinta. Hai alo ide, alo katalunami hangko i karapapateNa, 22-23 bahangkia towawine au hamporangaangkai laomohe i talumba madondo-dondo, agaiana wataNa bara rahumba. Tingkara mpuumongkai lawi i pesulenda rapahaweangkai kamoitanda malaeka i talumba au mampololita katuwo hulenami Yesu. 24 Hangko indo, bahangkia rangangki lao worimohe i talumba. Kahawenda inditi, raita batena nodo au rauli towawine inona. Agaiana Yesu bara ara raita.”
25 Roo indo, nauli Yesu, “Ntuli mpuukau! Moapari pane bara niisa lempona apa au mewali? Bara pae nipoinalai ope-ope au rauli nabi hangkoia? 26 Idemi au rapahaweakau nabi hangkoia: Datu Topehompo, hangangaa narumpa kapari, hangko molambiri pohudaa au meawa hai au teadai.”
27 Hangko indo, Yesu mopakanotoahe ope-ope au teuki i lalu Sura Malelaha kana i wataNa, mepongka hangko i Sura Aturana Musa duuna i ope-ope suranda nabi au ntanina.
28 Hungkumohe mehupe i boea au ratunggai, mepehindorungimi Yesu nodo au ina mopaliliu polumaona. 29 Agaiana tauna au rodua iti mopari-parihe Yesu bona mehupe sambelahe, rauliangaa, “Indemoke hampai, lawi ina kaindimi, ina tampumi alo.” Mewali mehupe mpuumi Yesu hihimbela hai ihira.
30 Mohudamohe hihimbela ina maande, Yesu moala roti. Napekakaea, Nabise-bise hai Nahuhuahe. 31 I tempo iti, hangko manotori lalunda kaYesunami au maande sambelahe. Roo indo, unga pea matanta Yesu; barapi raita. 32 Mololitamohe, rauli, “I tanga rara inona, tekalea mpuu lalunta i kaNapakanotoanta ope-ope au teuki i lalu Sura Malelaha kana i wataNa!”
33 Liliuhe meangka mesule i Yerusale. Kahawenda inditi, molambihe topeguruna Yesu au hampulo hai hadua moguluhe hai ranganda.34 Molololitahe, rauli, “Tou mpuu, Pue Yesu tuwo hulemi. Ia mopatongawami wataNa i Simo!”
35 Mewali, tauna au rodua iti motuntua worihe ope-ope au mewali i tanga rara inona, hai mopahaweahe apa au mewali i tempona Yesu mobise-bise roti, lawi i tempo iti, hangko manotori i lalunda kaYesunami au ara hihimbela hai ihira.
Yesu mopatongawa wataNa i topeguruNa
36 Tanganda mani mololita, unga pea Yesu meangka i olonda hai Natabehe, Nauli, “Roa ngkatuwo hawe irikamu.”
37 Tingkaramohe hai langahe, lawi rapehangu tanoana. 38 Ido hai nauliangaahe Yesu, “Moapari hai langakau? Moapa wori hai bata-bata mani lalumi? 39 Nipeita ide lari i taieNgku hai i bitiNgku. Ikomi dide! NipetoboNa bona niisa kadaNgku tanoana, lawi moonto hai mobuuNa.”
40 Roo indo, Napopaitaamohe taieNa hai bitiNa. 41 Anti kamatananda, bara gaga mani rapoinalai hai rapotingkara wori. Ido hai nauli Yesu, “Ara ditihou paandemi?” 42 Rahuhua mpuumi hantepo ikane au ratunu. 43 Nadokomi Yesu Naande bona raita kadana mpuu tanoana.
44 Roo indo, mololitami Yesu irihira, Nauli, “Ope-ope au teuki i lalu Sura Aturana Musa, suranda nabi hai i sura Petoia kana i wataNgku hangangaa tepabukei. Ide lolitaNgku au Kupahaweamokau i tempoKu mani hihimbela hai ikamu.”
45 Roo indo, Yesu mobungkahi pekirinda kana i apa au teuki i lalu Sura Malelaha.
46 Nauli, “I lalu Sura Malelaha teuki node: Datu Topehompo hangangaa molambi kapari hai kapate, hai i kataluna alona ina tuwo hule.47 Ope-ope tauna hangangaa menoso hangko i dosanda, bona naampungihe Pue Ala, anti kanapahurunda Datu Topehompo. Bambari iti hangangaa rapahawe i humalele dunia, mepongka i Yerusale.48 Ikamumi au mewali sabiNgku lawi niita matami ope-ope au mewali ide.
49 Nipehadingi lolitaNgku! Ina Kutudu Inao Malelaha mai irikamu. Agaiana hangangaa nipegia hampai inde i wanua Yerusale, duumi molambi kuasa moula dandiNa UmaNgku.”
Yesu mengkaore lao i suruga
50 Roo indo, nawawahe Yesu lao i raoa wanua Yerusale, hungku i boea Betania, pane Naangkami taieNa hai Nawatihe.
51 TangaNa mewati, teangkami Yesu lao i suruga.52 Molingkudumohe menomba Iria, pane mesulehe i Yerusale hai matana mpuu lalunda.53 I Yerusale, alo-alona maidahe i Souna Pue Ala hai motoiahe Pue Ala.