Markus 16

Yesu tuwo hule

(Mat. 28:1-10; Luk. 24:1-12; Yoh. 20:1-10)

1 Kaliuna Alo Pengkarooangaa, laomohe Maria Magdalena, Maria inana Yakobu, hai Salome, meholo lana mawongi. Tunggaianda bona laohe molanai watana Yesu. 2 Mewali, madondo-dondo i alo Minggu, i pembetona alo, laomohe i talumba. 3-4 I tanga rara molololitamohe, rauli, “Hemami au ina motulungike mololi watu petuko baba talumba iti?” Lawi watu iti mahile. Agaiana kahawenda i talumba, raita watu iti malolimi. 5 Pesuanda i lalu talumba, moitamohe hadua anantomoane au mohuda ntanda i koana, mebadu bula. Tingkarahe towawine iti moita tauna iti.

6 Nauli anantomoane iti, “Ineekau tingkara! Kuisa kamohaokimi Yesu to Nasare au rapaku i kau mombehape. Ia tuwo hulemi! Barapi ara inde. Nipeita karadampaaNa.7 Laomokau i Peturu hai topeguruna Yesu au ntanina niuliangaahe node: Yesu tuwo hulemi. Moiorumi lao i tampo Galilea, hai Ia ina niita inditi nodo au Nauliangaamokau.”

8 Melangkamohe towawine iti mopalehi talumba, lawi langa hai tingkarahe. Anti kalanganda, bambari iti bara rapopololita i hema pea.

Yesu mopatongawa wataNa i Maria Magdalena hai i topeguruNa au ntanina

(Mat. 28:9-10, 16-20; Luk. 24:13-49; Yoh. 20:11-23; Sur. 1:6-8)

9 [Pearona Yesu hangko i kapate madondo-dondo i alo Minggu, nguru-nguruna Ia mopatongawa wataNa i Maria Magdalena. Maria iti, au napakaoha Yesu hangkoia i kanapesuangina pitu seta. 10-11 Laomi Maria i topeguruna Yesu, nalambihe tanganda moteria hai masusa lalunda. Nauliangaahe, “Pue tuwo hulemi; kuitami inona!” Agaiana ope-ope au napololita Maria iti bara mpuu rapoinalai.

12 Roo indo, Yesu mopatongawa mbulimi wataNa i rodua topeulaNa au tanganda lumao mesule hangko i Yerusale laohe i boeanda. I tempo iti, lenggeNa Yesu bara nodo biasa. 13 I pesulenda hule i Yerusale tauna au rodua iti, mopahawe worihe i ranganda apa au mewali. Agaiana bara worihe rapoinalai.

14 Hangko inditi, Yesu mampatongawa worimi i topeguruNa au hampulo hai hadua au tanganda maande. Nakambaroahe lawi makura pepoinalainda hai matua lalunda. Lawi barahe mampoinalai lolitanda tauna au moitamohe Yesu au tuwo hulemi. 15 Nauliangaahe Yesu, “Laomokau i humalele dunia, mopahawe Ngkora Marasa i ope-ope tauna. 16 Hema-hema au mepoinalai Iriko hai rariu, ina tehoremahe hangko i huku dosanda. Agaiana hema au bara mepoinalai batena rahuku. 17 I tauna au mepoinalai, ina Kuweihe kuasa mobabehi tanda kuasa au node: i lalu hangaNgku, ihira ina mampopelohohe seta. Ina mololitahe i lalu basa au bara raisa. 18 Nauri mokingkihe ile, ba maenuhe rasu, agaiana barahe ina moapa-apa. Ane motobohe tauna au mahai, tomahai iti batena ina maoha.”

Yesu teangka lao i suruga

(Luk. 24:50-53; Sur. 1:9-11)

19 Karoona Yesu mampololitaa topeguruNa, Ia teangkami lao i suruga, hai mohuda ntanda i koanana Pue Ala.20 Hangko inditi, laomohe topeguruNa mopahawe Ngkora Marasa iumba-umba pea. Naporangaihe Pue i lalu bagonda, hai Napakaroho pobambarinda Ngkora Marasa hai tanda kuasa au metingkarai bona tongawa katouna Bambari au raanti.]