<<    <     Lukasi     22     >    >> 
Yudasi mampobalu Yesu
22
1 Barapi mahae ina hawe alo mahilenda to Yahudi au rahanga Posusa Roti au Bara Raragii hai au rahanga wori Posusa Pasa. 2 I tempo iti, kapala-kapala tadulako mpenomba hai guru-guru agama mohaokihe rara mopapate ngkandii Yesu, lawi mampokalangahe tauna bosa.
3 Roo indo, Yudasi au rahanga wori Iskariot, hadua hangko i topeguruna Yesu au hampulo hai rodua, napesuangimi Datu Tokadake. 4 Ido hai laomi Yudasi i kapala-kapala tadulako mpenomba hai kapala topokampai Souna Pue Ala mampololita tunggaiana kaina mampobaluna Yesu irihira. 5 Matanahe mohadi tunggaiana iti, hai radandia ina rawei doi. 6 Napokanami Yudasi lolitanda, hai nahaokimi katepaka au maroa mohuhu Yesu irihira bona rahaka i tempona bara raisa tauna bosa.
Yesu maande i Posusa Pasa hihimbela hai topeguruNa
7 Hawemi alo pepongkana Posusa Roti au Bara Raragii, hai moula ada agamanda to Yahudi, hambaa dimba hangangaa rasambale i alo iti bona raande i Posusa Pasa. 8 Ido hai Yesu motuduhe Peturu hai Yohane, Nauliangaahe, “Laomokau mopasilolongaake paande Pasa.”
9 Rapekune, “Pue, iumba peundeaMu kipasilolonga paande iti?”
10 Nahanai Yesu, “Ane mesuakau i lalu wanua, ina nipohidupaa hadua tobalilo moanti pantambua au keihi owai. Meulamokau iria hawe i souna. 11 Ane mesuakau i lalu souna, niuliangaa, ‘Nauli Guru: iumbaNa peisa maande Posusa Pasa hihimbela hai topeguruNgku?’ 12 Ampu sou iti ina motudungiakau hambua hologa mahile au ara i wongko. Hologa iti tepasilolongami, hai handa parewana. Inditimi nipasilolongaake paande Pasa.”
13 Lao mpuumohe Peturu hai Yohane i lalu wanua. Kahawenda inditi, ope-ope mewali nodo au nauliangaahe Yesu, hai mopasilolongamohe paande Pasa.
14 Hawemi temponda moande paande Pasa, mohudami Yesu hai topeguruNa au hampulo hai rodua i sou iti. 15 Tanganda mohuda, Nauliangaahe Yesu, “Kuunde mpuu maande sambela hai ikamu i Alo Posusa Pasa hangko damaniNa molambi kapari. 16 Lawi Kuuliangaakau, barapoNa ina moande paande Pasa duuna tepabukei lempona Posusa Pasa ide i kahawena poparentana Pue Ala i dunia.”
17 Roo indo, Yesu mangala hambua paenua au buke anggoro, mekakae i Pue Ala, pane Nauli i topeguruNa, “Nialami hai nikira-kira. 18 Bona niisa: mepongka ide-ide, barapi ina Kuenu anggoro duuna hawe poparentana Pue Ala i dunia.”
19 Roo nodo, Yesu moala mbuli roti hai mekakae i Pue Ala. Roo nodo, roti iti Nabise-bise hai Nakira-kiraahe, Nauli, “Idemi wataNgku au Kuhuhu mopahurukau. Nibabehimi ada ide bona nikatuinaoNa.” 20 Nodo wori, karoonda maande, Nahuhuamohe paenua anggoro, Nauliangaahe, “Paenua anggoro ide, lempona dandina Pue Ala au wou, au mopahintuwu Pue Ala hai manusia. Dandi ide Napakaroho hai waheNgku au tebumbuha i kapateNgku. 21 Agaiana nipehadingi hampai! Hadua hangko irikamu au maande sambelake ide-ide, ina mampobaluNa! 22 Iko Ana Manusia hangangaa mateNa nodo au napakanotomi Pue Ala. Agaiana hurewumi tauna au mampobaluNa iti!”
23 Karahadina topeguruNa lolitaNa, mombekunemohe ba hema au ina mobabehi iti.
Hema au mahile tuwonda
24 Hangko indo, mombehanaimohe topeguruna Yesu, ba hema i olonda au meliu kamahilena tuwona. 25 Ido hai Nauliangaahe Yesu, “Ope-ope datu i dunia au moparentahe tauna bosa, hai ope-ope topohawa raulihe ihirami topetingku. 26 Agaiana ikamu, ineekau nodo! Aginari tauna au meliu kamahilena tuwona hangangaa mengkaiwoi. Hai tauna au mepohawaa hangangaa mewali hampai nodo hadua hawi. 27 Mewali, hemami au tepamahilea tuwona: tauna au mohuda maande, ba tauna au merora? Taisami: i dunia ide, au mahile tuwona iami au mohuda maande iti. Agaiana irikita bara nodo, lawi Iko au mororakau nodo hadua hawi.
28 NiporangaiNa i lalu hinangkana kapariNgku. 29 Ido hai Kuuliangaakau: nodo UmaNgku moweiNa kuasa moparenta, Iko wori ina moweikau kuasa moparenta, 30 bona maande hai maenu sambelake i hambua meja i lalu poparentaKu. Hai ina mohuda worikau i pohudaa au hampulo hai rombua moparentai to Isaraeli au hampulo hai rontina.”
Yesu mampololita pesapuakana Peturu
31 Roo indo, Yesu mouliangaa Simo Peturu, “Simo! Nupehadingi: Datu Tokadake rawei mpuumi katepaka mokelokau. Nodo pare au ratapihi, ina tepatani au wara hai au moihi. 32 Agaiana Kupekakaengaako Simo bona dati maguli pepoinalaimu. Mewali, ane menosoko hai mesuleko Iriko, hangangaa nupakaroho lalunda halalumu.”
33 Nahanai Peturu, “Pue, baraKo ina kupalehi! Kehapirina ratarunggu ba mate hihimbela hai Oio, batengku meula liliu Irio!”
34 Nauli Yesu, “Peturu, Kuuliangaako: wengi ide, hangko damani motuturua manu, talumi belana nusapuaka kanuisaNgku.”
Dompe hai piho
35 Roo indo, Yesu mouliangaahe topeguruNa, “KaKutudumi lao mobambari Ngkora Marasa, barakau Kupaliu moanti dompe ba rombe ba kandupami. I tempo iti, ba ara kamakurami?”
36 Rahanai, “Bara ara.”
Nauli Yesu, “Agaiana mepongka ide-ide, hema au nakaarai doi ba baku, hangangaa nianti. Hai ane bara ara pihomi, nipobalu badumi nipopeholo piho. 37 Lawi teukimi node i lalu Sura Malelaha: ‘Datu Topehompo ina rapahimbela hai tauna au kadake.’ Hai apa au teuki ide hangangaa mewali Iriko, lawi ope-ope au teuki i lalu Sura Malelaha kana Iriko, batena ina tepabukei.”
38 Rauli topeguruNa, “Pue, idemi piho romata.”
Nahanai Yesu, “Handami.”
Yesu mekakae i Bulu Saitun
39 Nodo biasana, padumi Yesu hangko i wanua lao i Bulu Saitun hihimbela hai topeguruNa. 40 Kahawenda inditi, Nauliangaahe, “Mekakaemokau bona datikau narumpa pekelo.” 41 Roo indo, laomi karao haodi hangko irihira, hai molingkudu mekakae,
42 Nauli, “UmaNgku, ane Nuunde, Nupakaraoa wongkoia kapari au ina morumpaNa ide. Agaiana bara peundeaKu au Kuula, peundeaMuri, Uma.”43 [Roo indo, hawemi hadua malaeka hangko i suruga mai mopakaroho laluNa.44 Mapari mpuu Nahadi, ido hai napari-pari mekakae. Anti kamasusana laluNa, tumbumi siwuniaNa nodo wahe mougu-ogu tudo i tampo.]45 Roo mekakae, meangkami Yesu lao i topeguruNa. Nalambihe tanganda leta anti kawiorana mpuu lalunda.46 Nauliangaahe, “Moapari hai letakau? Mearomokau hai mekakaekau datikau narumpa pekelo.”
Yesu rahaka
47 Tangana mani Yesu mololita, unga peahe hawe tauna au bosa. Tauna iti naantihe Yudasi, hadua hangko i topeguruna Yesu. Kahawenda inditi, laomi Yudasi i Yesu, natabe hai naangki moula adanda to Yahudi. 48 Agaiana nauli Yesu, “Yudasi, moapari hai nuangkiNa? Nodo pae raramu mohuhuNa, Iko Ana Manusia?”
49 Karaitana topeguruNa apa au ina mewali, rauli, “Pue, noumba, kiewamohe hai piho?”
50 Roo indo, hadua hangko i topeguruNa mowuka pihona mobata hawina Tadulako Mpenomba Mahile, kana talinga koanana pane maingihi. 51 Nauli Yesu, “Handami!” Hai liliu motobo talingana hawi iti pane maoha.
52 Roo indo, Yesu mouliangaahe kapala-kapala tadulako mpenomba hai topokampai Souna Pue Ala hai totosaenda to Yahudi au mai mohaka, Nauli, “Tauna kadakeriNa pae dide, pane maiNa nihaka moantikau piho hai pewombe? 53 Alo-alona araNa hihimbela hai ikamu i Souna Pue Ala mepaturo. Moapa hai baraNa nihaka i tempo iti? Agaiana kaindi rai hangko baikau mohakaNa. Idemi tempomi, lawi ide wori tempona Datu Tokadake au makuasa i hinangkana au makaindi!”
Peturu mosapuaka peulana i Yesu
54 Hangko inditi, rahakami Yesu hai raanti lao i souna Tadulako Mpenomba Mahile. Peturu meula ngkarao pea. 55 I tabangaa sou iti, arahe bahangkia tauna au mopatuwo api rapamindui. Lao worimi Peturu mohuda hihimbela hai ihira. 56 Hadua towawine au mobago i souna Tadulako Mpenomba Mahile moita Peturu tangana mamindu. Natotoki pane nauli, “Tauna ide ara hihimbela hai Yesu inona!”
57 Nasapuaka Peturu, nauli, “Bara kuisa tauna iti!”
58 Bara mahae hangko indo, hadua mbuli moita Peturu, nauliangaa, “Bara pae oio wori hadua topeguruNa?”
Nasapuaka mbuli Peturu, nauli, “Bara, bara iko!”
59 Ba ara hajaa hangko indo, ara mani hadua au manguli, “Ia wori meula i Yesu, lawi ia to Galilea!”
60 Nahanai Peturu, “Bara mpuu kuisa apa au nuuli!”
Tangana mani mololita, motuturuami manu, 61 hai membalilimi Pue Yesu mototoki Peturu. I tempo iti, nakatuinaomi Peturu lolitana Pue Yesu au mouliangaa, “Hangko damani motuturua manu, talumi belaNgku nusapuaka.” 62 Padumi Peturu lao i raoa, hai moteria monggoro-nggoro lawi masusa laluna.
Yesu rakakabosai hai rapapahai
63 Roo indo, tauna au mokampai Yesu, mopapakoihe Yesu hai rapapahai. 64 Rabungkuhi matana, hai rauliangaa, “Ee nabi! Uli ba hema au mohapaKo!” 65 Ia rakakabosai wori hai mampopengaa lolita au kadake.
Yesu i lindona tadulako agama
66 Madondona ope-ope kapala-kapala tadulako mpenomba hai guru-guru agama hai totosaenda to Yahudi mogulumohe i Pogombo Topeparesa Mahile Agama Yahudi, hai Yesu raanti i lindonda. 67 Rauli tadulako iti i Yesu, “Ide-ide Nuuliangaangkai, ba Oio mpuu Datu Topehompo?”
Nahanai Yesu, Nauli, “Kehapirikau Kuhanai, batena ina bara nipoinalai. 68 Hai ane mekuneNa irikamu, batena baraNa ina nihanai. 69 Mewali, idemi pehanaNgku: barapi mahae Ana Manusia ina mohuda ntanda i koanana Pue Ala au makuasa.”
70 Rauli mbuli tadulako iti i Yesu, “Ba Anana mpuuKo Pue Ala?”
Nahanai Yesu, “Tou mpuu, nodo au nuuli iti.”
71 Hangko indo, raulimi, “Barapi bunduna ara sabi, lawi tahadi ntalingami lolitaNa au mopakoi Pue Ala!”