<<    <     Yohane     13     >    >> 
Yesu mobahoi bitinda topeguruNa
13
1 Hangalo hangko damani hawe Alo Posusa Pasa, naisami Yesu kaina hawenami tempoNa mopalehi dunia hai mesule i UmaNa. Ia mampokaahihe ope-ope tauna au meula Iria, hai batena Napokaahihe duuna i kahopoana.
2 Kaindi iti Yesu hai topeguruNa maande sambelahe. I tempo iti, Datu Tokadake mokaleami laluna Yudasi anana Simo Iskariot bona mampobalu Yesu. 3 Agaiana naisa Yesu kanaweiNami UmaNa ope-ope kuasa. Naisa wori Ia hangko i Pue Ala, hai ina mesule hule i Pue Ala. 4 Ido hai meangkami, mowosui kumbaNa, hai mangala komo Naweweha i pekoNa.
5 Roo indo, mokando owai i loia, pane mepongkami mobahoi bitinda topeguruNa, Naumpahi hai komo au i pekoNa.
6 Hawemi i Simo Peturu, nauli Peturu, “Pue, noumba pane Oiori mobahoi bitingku?”
7 Nauli Yesu, “Ide-ide, bara mani nuisa apa au Kubabehi, agaiana i alo au ina mai, hangko nuisari.”
8 Nauli Peturu, “Inee, Pue! IneeKo hawe mobahoi bitingku.”
Nauli Yesu, “Ane barako Kubahoi, barako mohintuwu hai Iko.”
9 Nauli Simo Peturu, “Ane nodo Pue, inee bitingku pea agaiana taiengku hai waangku wori.”
10 Nauli Yesu, “Tauna au mendoimi, barapi kedai, barapi paraluu rabahoi hule. Batena pearai bitina au hangangaa rabahoi. Ikamu, tebahoimokau, agaiana barakau ope-ope.” 11 Yesu mololita nodo, lawi Naisa ami kahemana au ina mampobalu wataNa. Ido hai Nauli, “Tebahoimokau, agaiana barakau ope-ope.”
12 Karoona Yesu mobahoi bitinda, Napake hulemi kumbaNa, hai mohuda, pane Nauliangaahe, “Ba niisa lempona apa au hangko Kubabehiakau? 13 NikakioNa Guru hai Pue. Lolitami iti tou, lawi tou mpuu Ikomi Guru hai Pue. 14 Iko, Ampumi hai Gurumi, mobagomoNa nodo hadua hawi mobahoi bitimi. Mewali, ikamu wori hangangaa mombebahoi mpobitikau. 15 Kupopaitaakau pandiri ide inona bona apa au Kubabehi nipeulai. Iko motulungikau, mewali ikamu wori hangangaa motulungi worikau rangami.
16 Tou mpuu lolitaNgku ide: hadua hawi bara meliu karabilana hangko i ampuna. Hadua tudua bara meliu karabilana hangko i tauna au metudu. 17 Ane niisa hai nipeulai paturo ide, ina morasikau.
18 Apa au Kupololita inona, barakau nakanai ope-ope. Hema-hema au Kupilei Kuisa, amimi poampena. Agaiana hangangaa tepabukei apa au teuki i lalu Sura Malelaha au manguli: ‘Hadua tauna au maande hihimbela hai Iko, ia au ina mampoiwaliNa.’
19 Ide Kupahawea amimokau hangko damani mewali bona ane mewalimi, ina nipoinalai ‘Ikomi au rauli IKO ARA’.a20 Tou mpuu lolitaNgku ide: hema au modoko tuduaNgku, himbelami Iko au nadoko. Nodo wori, hema au modokoNa, himbelami Pue Ala au nadoko lawi Ia au motuduNa.”
Yesu mampopainga Yudasi
21 Karoona Yesu mololita nodo, wiorami laluna, hai Nauli, “Tou mpuu lolitaNgku ide: hadua hangko irikamu ina mampobaluNa.”
22 Anti kawulinda topeguruNa, mombetototokimohe lawi bara raisa kahemana au Natunggai. 23 Ara hadua topeguruNa au Napokakaia, mohuda i holaNa.b 24 Simo Peturu mokinde tauna iti, nauliangaa, “Nupekune i Guru, ba hema au Natunggai.”
25 Ido hai topeguruNa au mohuda i holaNa Yesu iti membalili hai mekune Iria, “Hema, Pue?”
26 Mehana Yesu, nauli, “Hema au Kutandongia roti au Kutubuka i lalu mangko ide, iami taunana.” Naalami hambise roti, Natubuka i lalu mangko iti, hai Nawei Yudasi, anana Simo Iskariot. 27 Kanadokona Yudasi roti iti, mesuami Datu Tokadake i laluna. Roo indo, nauliangaa Yesu, “Apa au ina nubabehi, nubabehimi holiga.”
28 Ranganahe au maande sambela hai ia, barahe moisa tunggaiana Yesu mololita nodo i Yudasi. 29 Hanggaahe mampehangu Yesu motudu Yudasi lao moholo apa au raparaluu i posusanda, ba mowei doi i tauna au meahi-ahi, lawi Yudasi topamboli doi. 30 Kanadokona Yudasi roti iti, padumi lao i raoa. I tempo iti, kaindimi.
Parenta au wou
31 Kapaduna Yudasi, mololitami Yesu, nauli, “Ide-ide Ana Manusia ina rapomahile. Hai apa au ina mewali Iriko, ina mopakahile wori Pue Ala. 32 Hai ane apa au mewali Iriko mopakahile Pue Ala, Pue Ala ina mopamahile woriNa hai kuasaNa. Au Kupololita ide ina holiga pewalina. 33 AnaNgku, barapoNa mahae hihimbela hai ikamu. Ina nihaokiNa, agaiana nodo au Kuuliangaamohe tadulakonda to Yahudi hangkoia, nodo wori Kuuliangaakau: i kalaoaNgku barakau peisa hawe.
34 Kuweikau hawa au wou: mombepokaahimokau. Hangangaa mombepokaahikau nodo kaKupokaahimi. 35 Ane mombepokaahikau, ina raisa ope-ope tauna ikamu topeguruNgkukau.”
Yesu mampololita kaina nasapuakaNa Peturu
36 Simo Peturu mekune i Yesu nauli, “Pue, ina laoKo iumba?”
Nahanai Yesu nauli, “I kalaoaNgku, bara maniko peisa lao. I alo au ina mai, hangko peisaNa nuula.”
37 Mekune mbuli Peturu, nauli, “Pue, moapari barana peisa meula Irio ide-ide? Pebaina mate anti peulangku Irio!”
38 Nauli Yesu, “Pebai mpuuko pae mate anti peulamu Iriko? Tou lolitaNgku ide: Bona nuisa, hangko damani motuturua manu wengi ide, talumi belana nusapuakaNa.”