Maria motidorohi lana mawongi i bitina Yesu
12
1 Ini alona hangko damani Alo Posusa Pasa, laomi Yesu i Betania, boea paidaana Lasaru, au Napatuwo hule. 2 KahaweNa inditi, Ia raposusai tauna bosa, lawi matanahe modoko Yesu i boeanda. Marta morora torare, hai Lasaru ara hihimbela hai Yesu hai tauna ntanina au ara indo.3 Tanganda maande, hawemi Maria moanti habotolo lana mawongi. Lana mawongi iti rababehi hangko i uaka kau au mawongi, hai masuli holona. Maria motidoroha lana mawongi iti i bitina Yesu, liliu naumpahi hai weluana. Humalele sou iti mewali mawongi. 4 Hadua topeguruna Yesu au rahanga Yudasi Iskariot, au ina mampobalu Yesu mololita, nauli, 5 “Lana mawongi iti masuli mpuu holona, ba arato pae talu atuna doi pera.a Moapari hai bara rapobalu peami, hai holona raweihe tauna au meahi-ahi?” 6 Katouana, Yudasi bara mampekiri katuwonda topeahi-ahi, lawi ia topanangka! Ia topamboli doinda, hai hambela-hambela naala ngkabuni.
Tadulakonda to Yahudi mohawaka Lasaru rapapate
9 Bosa to Yahudi mohadi kaarana Yesu i Betania, ido hai laomi rapeita. Hai mampeinao worihe moita Lasaru au napatuwo hule Yesu. 10 Indo mogombomohe kapala-kapala tadulako mpenomba, mampololita tunggaianda ina mopapate Lasaru. 11 Lawi anti kaiana, rapalehihe bosa to Yahudi au mepoinalaimohe i Yesu.
Tauna bosa modupa Yesu i pesuana i Yerusale
12 Kahalona, bosa tauna i Yerusale mohadi Yesu monontohi boeanda. I tempo iti, bosa ntepuu tauna au moteruhu i Yerusale lawi ina hawe Alo Posusa Pasa. 13 Mangalamohe tawe harao, hai laohe modupa Yesu. Monganga-nganga liliuhe, rauli:
“Tetoiami Pue Ala!
Rawatimi tauna au mai i lalu hangana Pue!
Pue Ala mowati Datunda to Isaraeli!”*
14 Yesu mangala hambaa ana kalide, bona Napodara. Iti mopabukei lolitana hadua nabi hangkoia au manguli:
15 “Ineekau langa, ampu boea Sion.
Peita! Oloumi mai Datumi,
Ia mesawi i hambaa ana kalide.”*
16 I tempo iti, bara mani raisa topeguruna apa lempona au mewali iti. Agaiana karapopeawanami Yesu i karapapatena, hangko rakatuinaori topeguruNa apa au teuki i lalu Sura Malelaha au mopahawe amimi apa au mewali i Yesu.
17 Ara worihe bosa tauna i Yerusale au hihimbela hai Yesu i pokakioNa Lasaru hangko i lalu talumba i kaNapatuwona hule. Tauna iti mololita liliuhe kana i apa au mewali iti. 18 Ido hai pane bosa ntepuumohe tauna lao mampohidupaa Yesu, lawi mohadihe kaIana au mobabehi tanda kuasa iti. 19 Molololitamohe toParisi, hadua hai hadua rauli, “Manangimoke dide! Peita, ope-ope tauna i dunia meulamohe Iria.”
Yesu mampololita kana i kapateNa
20 Bosa tauna lao i Yerusale menomba i Pue i Alo Posusa Pasa. I olonda tauna iti, ara worihe bahangkia to Yunani. 21 To Yunani iti laohe i Pilipu, rauli, “Mampeinao wongkamia mampohidupaa Yesu.” (Pilipu iti hangko i boea Betsaida i tampo Galilea.)
22 Laomi Pilipu mopahawe lolitanda i Andaria, hai roo indo, ihira rodua lao mopahawea Yesu. 23 Nauliangaahe Yesu, “Hawemi tempona, Ana Manusia rapomahile. 24 Tou mpuu lolitaNgku ide: Iko peisa rapandiri nodo haogu pare. Hangangaa ratuda hai mate, hangko arari wuana au ngkaia. Ane bara nodo, bara ina mowua. 25 Tauna au mampokakaia watana, bara ina molambi katuwo maroa. Agaiana tauna au mokabaha peundeana haduduana i dunia ide, ina molambi katuwo maroa au bara mokahopoa. 26 Hema au naunde mewali hawiNgku, hangangaa meula Iriko bona iumba kalaoaNgku, inditi wori ia. Hai hema au mewali hawiNgku ina napomahile UmaNgku.”
27 “Masusa mpuu ide laluNgku. Barapi Kuisa apa au hangangaa Kuuli, ina mekakaena Kuuli: ‘Uma, Nukabaha wongkoia hangko i kapari au ina morumpaNa!’ Agaiana idomi tunggaiaKu mai i dunia bona mantodihaNa kapari iti. 28 Uma, patongawamide peawana hangaMu!”
Roo indo, ara hambua wotu hangko i langi au manguli, “Kupatongawami peawana hangaNgku hai ina Kupatongawa mbuli.”
29 Tauna bosa au mohadi wotu iti, mololitahe rauli, “Iti pomoni gumpata!”
Agaiana hanggaahe manguli, “Bara. Ara malaeka au mololita Iria.”
30 Nauliangaahe Yesu, “Wotu au nihadi inona, bara ina motulungiNa, agaiana bona motulungikau. 31 Ide-ide hawemi tempona Pue Ala hangangaa mobotusi ope-ope manusia i dunia. Hai hawe worimi tempona Datu Tokadake au mokuasai dunia ide hangangaa ranawo. 32 Agaiana Iko, ane rapamapangkaNa i kau mombehape, ina modiiNa ope-ope taunab mai Iriko.” 33 Lolitana Yesu iti mopakanoto noumba kaina rapapateNa.
34 Rauli tauna bosa, “I lalu Aturana Pue Ala kibasa: Datu Topehompo tuwo hawe i hae-haena. Moapari hai Nuuli Ana Manusia hangangaa rapamapangka i kau mombehape? Hema Ana Manusia au Nutunggai iti?”
35 Nauliangaahe Yesu, “Hampalai pearai, pewangka au mopamabaakau ide-ide barapi ina ara hihimbela hai ikamu. Molumao liliumokau i lalu kamabaana i tempona pewangka iti ara mani irikamu bona datikau narumpa kamakaindi. Tauna au molumao i lalu kakaindiana, bara raisa iumba kalaoanda. 36 Mepoinalaimokau Iriko i tempoKu mani mewangka i olomi bona mabaa lalumi.”
Karoona Yesu mopahawe ope-ope iti, padumi hangko inditi, hai barapi mopatongawa wataNa i tauna bosa.
To Yahudi bara mepoinalai i Yesu
37 Nauri ngkaia tanda kuasa au nababehi Yesu i lindonda to Yahudi iti, batenda bara mepoinalai Iria. 38 Mewali tepabukeimi lolitana nabi Yesaya hangkoia au manguli:
“Pue, barahe ara au mepoinalai i bambari au kipahaweahe.
Kehapirihe Nupopaitaa kuasaMu, batenda bara mepoinalai.”*
39 Barahe peisa mepoinalai, lawi nodo au naukimi nabi Yesaya hangkoia:
40 “Nauli Pue Ala:
‘Kupabilomohe, datihe meita.
Kupamatua lalunda bona barahe moisa peundeaKu.
Kahopoana barahe mesule Iriko,
hai barahe Kuhorema.’ ”*
41 Lolita kana i Yesu iti napahawe nabi Yesaya hangkoia, lawi naita amimi peawaNa.c
42 Nauri nodo, ara worihe bosa tadulakonda to Yahudi au mepoinalai i Yesu. Agaiana i lalunda pea mepoinalai, lawi mampokalangahe toParisi; langahe ina barapohe rapaliu mesua i sou penombaa. 43 Lawi raunde mani ratoia manusia pane natoiahe Pue Ala.
Lolitana Yesu au kahopoana i tauna bosa
44 Mololitami Yesu masisimbuku, Nauli, “Tauna au mepoinalaihe Iriko, bara Iko pea au rapoinalai, mepoinalai womohe Pue Ala au motuduNa. 45 Tauna au moitaNa, moita worimi Pue Ala au motuduNa. 46 MaiNa i dunia ide mewali pewangka bona ope-ope tauna au mepoinalai Iriko barapohe maida i lalu kamakaindi.
47 Tauna au mohadi lolitaNgku agaiana bara napeulai, bara Iko au mohuku. Lawi tunggaiaKu mai i dunia ide, baraNa mai mohuku manusia. Agaiana MaiNa mokabahahe hangko i huku dosanda. 48 Tauna au mosapuakaNa hai bara modoko lolitaNgku, arami au ina mohuku. Lolita au Kupahawe, itimi au ina mohuku i alo pebotusi. 49 Lawi lolitaNgku bara hangko i peundeaKu. Mopahawe hai mampololita peana apa au naparentaiaNa UmaNgku, lawi Ia au motuduNa mai. 50 Hai Kuisa, hema au mampeulai parenta iti ina molambi katuwo maroa au bara mokahopoa. Mewali, apa au Kupololita ide, nodo lolita au napahaweaNa UmaNgku.”