Kapatena Lasaru
11
1-2 Ara hadua tobalilo au rahanga Lasaru maida i boea Betania hihimbela hai Maria hai Marta, halaluna. (Maria itimi au ina motidorohi bitina Yesu hai lana mawongi, hai naumpahi hai weluana.) Hambela tempo, Lasaru mahai. 3 Halaluna au rodua iti motuduhe tauna lao mouliangaa Yesu, “Pue, himadaMu au Nupokaahi, tangana mahai.”4 Kanahadina Yesu bambari iti, Nauli, “Hakina iti bara ina Napomate. Iti mewali bona peawana Pue Ala rapatongawa, hai bona Iko AnaNa rapomahile woriNa.”
5 Nauri Yesu mampokaahihe Marta, Maria, hai Lasaru, 6 agaiana kaNahadina Lasaru mahai, Ia bara kasaliu lao; maida pea i paidaaNa rongalo kamahaena. 7 Liumi rongalo, hangko mouliangaarihe topeguruNa, “Maikau, lao huleke i tampo Yudea.”
8 Rauli topeguruNa, “Guru, bara mani mahae to Yahudi inditi mampeinao mowatuiKo. Moapari hai Nupeinao mbuli lao indolou?”
9 Nauliangaahe Yesu, “I lalu hangaloa, bara pae hampulo hai rojaa? Tauna au molumao mabaa, barahe ina tehube. Moitahe raranda, lawi ara pewangka mopamabaa dunia ide. 10 Agaiana tauna au molumao kaindi, batena tehubehe, lawi bara ara kamabaa iria.”
11 Nodomi lolitana Yesu, hai roo indo Nauli mbuli, “Himadanta Lasaru, letami, agaiana ina lao Kurua.”
12-13 Katouana lolitana Yesu iti, lempona Lasaru matemi. Agaiana bara raisa topeguruNa, nabuhu inaonda pea Lasaru iti tou-tou mpuu leta. Ido hai rauliangaa, “Pue, ane letami, ia ina maoha.”
14 Mewali, Nabungkahiamohe lempona lolitaNa, Nauli, “Lasaru matemi. 15 MatanaNa lawi baraNa ara i kapatena. Lawi apa au mewali, ina moanti roa ngkatuwo irikamu bona mepoinalaikau Iriko. Laomokekau mampeita Lasaru.”
16 Tomas, au rauli Toporopa, mouliangaahe hangka topeguruna, “Maikau meulake Iria nauri mateke hihimbela hai Ia.” Mewali lao mpuumohe i tampo Yudea.
Yesu mopalindo Marta hai Maria
17 Kahawena Yesu i Betania, Nahadimi bambari au manguli ibami alona Lasaru ratawu. 18 (Betania iti, hungku i Yerusale, ba arato pea pae talu kilo kakaraona. 19 Mewali, bosahe to Yahudi mai mopalindo Marta hai Maria i kapatena adinda.)
20 Nahadimi Marta kahawena Yesu, ido hai laomi nadupa. Agaiana Maria, i sou liliu pea. 21 Nauli Marta i Yesu, “Pue, ane keindeKo i kamahaina adingku, kebara mate. 22 Nauri nodo, kuisa: apa au Nuperapi i Pue Ala ide-ide, batena NaweiKo.”
23 Nauli Yesu iria, “Adimu ina tuwo hule.”
24 Nauli Marta, “Io, au kuisa, ina tuwo hule i alo pebotusi, i karapopearonda ope-ope tomate.”
25 Nauli Yesu, “Iko idemi au mampopearo tomate, hai au mepatuwo. Tauna au mepoinalai Iriko, nauri matemohe, ina tuwo hulehe. 26 Hai ope-ope tauna au molambi katuwo hangko i pepoinalainda Iriko, barahe ina mate hawe i hae-haena. Ba Nupoinalai au Kuuli ide?”
27 Nauli Marta, “Io, Pue, kupoinalai kaOionami Datu Topehompo, Anana Pue Ala au ina mai i dunia.”
28 Karoona manguli nodo, laomi i sou mokakio Maria, halaluna, hai nakaneni nauliangaa, “Indolou ara Guru, Napeinao mampohidupaako!” 29 Kanahadina Maria lolitana, hoholiga mpuumi lao mampohidupaa Yesu. 30 I tempo iti, Yesu bara mani mesua i lalu boea, ara mani i pohidupaanda hai Marta inona. 31 To Yahudi au maihe mepalindo i lalu sou, moitahe Maria hoholiga padu, rauli, “Ia lao moteria i talumba!” Ido hai meula worihe.
32 Hawemi Maria i pengkarooangaana Yesu inona, moitami Yesu hai laomi molingkudu i lindoNa, nauliangaa, “Pue, ane keindeKo i tempo iti, adingku kebara ina mate.”
33 Yesu moita Maria moteria hai to Yahudi au napohimbelaa moteria wori, ido hai wiora mpuu laluNa. 34 Napekune, Nauli, “Iumba ratawu?”
Rauli, “Pue, maiKo lao tapeita.”
37 Agaiana ara worihe au manguli, “Tauna au bilo Napakaoha. Moapari pane Ia bara mopakaoha Lasaru dati mate?”
Yesu mopatuwo hule Lasaru
38 Hangko inditi, tetambaimi kawiorana Yesu, pane laomi i talumba. (Talumba iti, iami kalolu au rakae i tabingke bulu au ratuko hai watu mahile.) 39 Nauli Yesu, “Nibungkahimi watu petukona iti!”
Marta, halaluna tomate iti, manguli, “Pue, ineemi rabungkahi. Bangkami, lawi ibami wengina ratawu.”
40 Nauli Yesu i Marta, “Bara pae Kuuliangaamoko inona, ane nupoinalaiNa, ina nuita mpuu kamahilena kuasana Pue Ala?” 41 Roo indo, rabungkahimi watu petuko talumbana. Mengoami Yesu i langi, Nauli, “UmaNgku, Kuuli ngkaia kamaroana Irio, lawi Nuhadimi perapiNgku.
Tadulakonda to Yahudi mohawahe mopapate Yesu
45 Bosahe to Yahudi au mai mosondaki Maria i tempo ido, moita apa au nababehi Yesu. Hai bosahe au mepoinalai Iria. 46 Agaiana ara worihe hanggaa au lao i toParisi mopahawehe apa au nababehi Yesu iti. 47 Ido hai toParisi hai kapala-kapala tadulako mpenomba mopaaramohe pogombo mahile hihimbela hai tadulako agama au ntanina, rauli, “Apa au hangangaa tababehi? Nipeita! Ngkaiami tanda kuasa au Nababehi tauna iti. 48 Ane tapogiangaa liliu, ope-ope tauna ina mepoinalaihe Iria. Kahopoana, surodado to Roma ina maihe mogero Souna Pue Ala hai ope-ope boeanta.”
49 Roo indo, mololitami hadua hangko i olonda au rahanga Kayapas, Tadulako Mpenomba Mahile i pare iti, nauli, “Bara niisa apa-apa! 50 Bara pae niisa apa au mobundu irikamu. Aginami hadua tauna mate mopahuru tauna bosa, pane boeanta ragero ope-ope.” 51 Lolita iti nawei Pue Ala iria, lawi ia Tadulako Mpenomba Mahile i tempo iti. Nodemi tunggaiana pololitana Kayapas: Yesu hangangaa rapapate. Agaiana ara wori lempona au karompakana, au bara naisa, iami kapatena Yesu mopahuru to Yahudi. 52 Hai bara pea to Yahudi. Anti kapatena Yesu iti, ope-ope anana Pue Ala au mahawu-hawu i humalele dunia ina ragulu hai rapahintuwuhe.
53 Mepongka alo iti, tadulakonda to Yahudi mohawamohe bona Yesu rapapate. 54 Ido hai Yesu barapi mampatongawa i olonda to Yahudi bona datipi raita tauna bosa. Padumi Yesu hangko inditi lao i boea au rahanga Epraim i wiwi pada wungi. Maidami inditi hihimbela hai topeguruNa.
55 I tempo iti, hungkumi alo mahile agama Yahudi au rauli Alo Posusa Pasa. Hangko damani alo mahile iti, bosa tauna hangko i boea-boeana lao i Yerusale bona mobahoihe watanda moula ada agamanda. 56 Tauna au mogulu i Yerusale iti mohaoki liliuhe Yesu. Tanganda mogulu i Souna Pue Ala, mombekune-kunehe, rauli, “Noumba pelambiami? Kira-kira ba mai Yesu i posusa ide?”
57 Nodo lolitanda tauna bosa, lawi kapala-kapala tadulako mpenomba hai toParisi mampopesuwumohe parenta i tauna bosa au manguli, “Hema-hemakau au moisa kaiumbana Yesu, hangangaa niuliangaangkai bona rahaka.”