Hema au mengkaiwoi hai au motulungi rangana, iami au mahile tuwona i peitana Pue Ala
18
1 I tempo iti, maihe topeguruna Yesu mekune Iria, rauli, “Pue, hema wei au meliu kamahilena tuwona i lalu poparentana Pue Ala?”2 Yesu mokakio hadua anangkoi, Napopeangka i olonda, 3 hai Nauliangaahe, “Tou lolitaNgku ide: ane barakau mobaliki babehiami hai mewali nodo anangkoi ide, barakau ina mewali taunana Pue Ala i lalu poparentaNa. 4 Hema au mengkaiwoi laluna hai mewali nodo anangkoi ide, iami au mahile ntepuu tuwona hangko i ope-ope taunana Pue Ala i lalu poparentaNa. 5 Hema au modoko hadua anangkoi nodo anangkoi ide anti peulana Iriko, lempona Ikomi au nadoko.
6 Agaiana hema au mopakanawo hadua anangkoi au nodo anangkoi ide alana barapi mepoinalai Iriko, ina rumihi mpuu pehukuna Pue Ala i tauna iti. Aginami haogu watu pogilia au mahile ratoe i tambolona hai ratende i lalu tahi. 7 Hurewumi dunia ide lawi ngkaia au mepakanawo. Tou pepakanawo iti ara, agaiana hurewumohe tauna au mopaara pepakanawo iti.
8 Maroa-roakau bona ineekau madosa. Ane pandirina taiemu hambali ba bitimu hambali au moantiko madosa, nubohoki peami hai nutende. Agina hambali pea taiemu ba bitimu, asala molambiko katuwo maroa hihimbela hai Pue Ala pane rombali taiemu hai rombali bitimu, agaiana kahopoana ratenderiko i lalu api au rore liliu. 9 Hai ane pandirina matamu hambali au moantiko madosa, nudungkiki peami hai nutende. Aginami hambali pea matamu asala molambiko katuwo maroa hihimbela hai Pue Ala, pane rombali matamu, agaiana kahopoana ratenderiko i lalu api naraka.”
Ngkora pandiri kana i dimba au matanta
10 “Mewali, mainga-inga mpuukau. Inee nipakoi tauna au koi tuwona nodo anangkoi ide, nauri hadua pea. Lawi tou-tou Kuuliangaakau: malaeka au mokampaihe maida liliu i lindona UmaNgku au ara i suruga. 11 [Lawi tunggaiaKu Iko Ana Manusia mai i dunia bona mohaokiNa tauna au karao hangko i Pue Ala hai mohoremahe hangko i huku dosanda.]
12 Noumba pelambiami? Ane pandirina, ara hadua tauna au dimbana hangatu baana, hai matanta hambaa, apa au ina nababehi? Batena mopalehi dimbana au hahio pulona hai hahio i tongku-tongkuna, hai lao mohaoki hambaa au matanta iti. 13 Hai ane nalambi hule, rumihi kamatanana mampokatana dimbana au hambaa iti pane dimbana au hahio pulona hai hahio au barahe matanta. 14 Nodo wori Umami au ara i suruga, bara Naunde ane ara hadua nodo anangkoi ide au puha.”
Apa au tababehi ane ara halalunta au masala irikita
15 “Ane ara halalumu hampepepoinalai au masala irio, lao nupombelambia, hai nuuliangaa salana. Hangangaa nubabehi iti bona dati ara au moisa, batena pea ikamu rodua. Ane napoinalai lolitamu, maroa hule pohintuwumi. 16 Agaiana ane bara naunde mampeulai lolitamu, nukakio hadua ba rodua tauna nuporanga mopahawe lolitamu iria. Lawi i lalu Sura Malelaha hangkoia teuki node:
‘Ane ara tauna au rasalai,
hangangaa ara rodua ba talu tauna au mosabiki katouna kamasalana,
bona manoto kara-karana.’*
17 Ane bara naunde mampehadingi lolitanda sabi iti, nupahawemi i ope-ope halalumi hampepepoinalai. Ane bara liliu napoinalai kehapiri ope-ope halalumi hampepepoinalai mokambaroa, pogiangaamide, hai niimbami nodo tauna au bara moisa Pue Ala hai au kadake babehiana.
18 Nipehadingi: apa au nibotusi i dunia, aminami tebotusi i suruga. Ane niuli hadua tauna hangangaa rahuku, ia nahuku worimi Pue Ala. Ane niuli hadua tauna raampungi dosana, naampungi worimi Pue Ala. 19 Kuuliangaa mbulikau: ane arakau rodua i dunia ide au hintuwu mekakae mamperapi ba apa pea, pekakaemi iti ina nahanai UmaNgku au ara i suruga. 20 Lawi iumba tauna teruhu anti kaIkona, nauri rodua ba talu peahe, Iko araNa hihimbela hai ihira.”
Ngkora pandiri kana i hadua tauna au bara moampungi rangana
21 Roo indo, Peturu mohungkuki Yesu hai mekune Iria, nauli, “Pue, ane halalungku hampepepoinalai masala iriko, hangkia belana hangangaa kuampungi? Hawe pae pitu belana?”
22 Nahanai Yesu, “Bara pea pitu belana. Agaiana pitu belana pitu pulona belana hangangaa moampungiko rangamu hampepepoinalai au masala irio. 23 Lawi Pue Ala nodo datu au i lalu ngkora pandiri ide: ara hadua datu au moparesa indanda hawina. 24 Nguru-nguruna, ara hadua hawi au raanti i lindona au moinda i jutana.a 25 Bara mpuu woia nabuku mobaiari indana. Mewali, nahawakami datu, nauli: ‘Pobalu peami hawi iti hai anana hai towawinena hai ope-ope anu-anuna bona tebaiari indana.’
26 Molingkudumi hawi iti i lindona datu, merapi ampu, nauli: ‘Sabarako, ina kubaiari pea wongkoia indaku!’
29 Molingkudumi rangana iti merapi ampu, nauli: ‘Sabarako hampai ene, ina kubaiari pea wongkoia indaku!’
31 Karaitana hawi au ntanina apa au mewali, wiora mpuu lalunda. Laomohe i datu mopahawe babehiana hawi iti. 32 Kanahadina datu lolitanda, motudumi tauna lao mokakio hawi au kadake babehiana iti. Kahawena hawi iti, nauliangaa datu: ‘Kadake mpuuko! Indamu kugewomi hangko i surangku, lawi merapi ampuko iriko. 33 Moapari hai bara nupokaahi hangka hawimu, nodo kakupokaahimu?’
