<<    <     Matiu     17     >    >> 
Yesu mopatongawa peawana tuwoNa i wongko bulu
17
1 Ini alona hangko inditi, Yesu moanti talu topeguruNa mempanai lao i wongko bulu au mapangka. TopeguruNa au talu iti iami: Peturu, Yakobu hai Yohane adina Yakobu. Ihira pea au ara inditi. 2 Temponda ara inditi, mobalimi lenggena Yesu. LindoNa mewangka nodo alo, hai hampiNa mengkila-ngkila. 3 Unga peahe topeguruNa moita rodua nabi au mololita hihimbela hai Yesu. Nabi au rodua iti iami: Musa hai Elia. 4 Hangko inditi, Peturu mouliangaa Yesu, “Pue, maroa mpuu ane maidake inde. Ane Nuunde Pue, kubabehi talu oguna bambaru inde: haogu Irio Pue, haogu i Musa hai haogu wori i Elia.”
5 Tangana mani Peturu mololita, unga pea hawe gawu au mewangka mobalungkuhihe, hai hangko i lalu gawu iti mohadihe hambua wotu au manguli, “Idemi AnaNgku au Kupokakaia hai au Kupokatana. Nipehadingi lolitaNa!”
6 Karahadina topeguruNa wotu iti, madampamohe lawi rumihi kalanganda.
7 Agaiana laohe nahungkuki Yesu hai Napetobohe, pane Nauliangaahe, “Pearo, ineekau langa!”8 Metotokimohe agaiana apa au ara inona barapi raita, batena pearai Yesu.9 Pendaulunda hangko i wongko bulu iti, Nauliangaahe Yesu “Inee hampai niuli-uli i hema pea apa au niita inona hangko damani Iko, Ana Manusia rapatuwo hule hangko i kapate.”
10 Mekunemohe topeguruNa, rauli, “Wulingkai. Moapari hai rauli guru agama, nabi Elia hangangaa hawe ioru, hangko haweri Datu Topehompo?”
11 Nahanai Yesu, “Tou, Elia hangangaa hawe ioru, lawi ia au mopasilolonga hinangkana. 12 Agaiana Kuuliangaakau, hawemi Elia, agaiana bara raisa tadulako boeanta. Ia rapopeahi-ahi moula peundeanda. Nodo wori Iko, Ana Manusia ina rapopeahi-ahi moula peundeanda.” 13 I tempo itimi, hangko raisari topeguruNa lempona lolitana Yesu inona: au rapandiri nodo nabi Elia, iami Yohane Toperiu.
Yesu mopakaoha anangkoi au napesuangi seta
14 I pesulenda Yesu hai topeguruNa au talu iti, mampohidupaahe tauna bosa, hai ara hadua tobalilo au mai molingkudu i lindoNa, nauli, 15 “Pue, Nupokaahi woia anangku. Mohaki dungka, hai doko malimpu ane hawe hakina. Bosa belana madungka i lalu api ba i lalu owai. 16 Kuantimi i topeguruMu, agaiana bara rabuku mopakaoha.”
17 Nauli Yesu i tauna bosa hai i topeguruNa, “Noumbarikau dide? Moapari pane bara mani maroho pepoinalaimi? Nisapuaka mani peundeana Pue Ala! Hangkia maniri kamahaena ina hihimbelaNa hai ikamu? Hangkia maniri kamahaena hangangaa Kusabarai peewami? Anti mai anangkoi iti!”
18 Hangko inditi, Yesu mokambaroa seta au mopakasusa anangkoi iti. Moloho mpuumi seta iti. Pelohona seta iti, maoha mpuumi anangkoi iti.
19 Roo indo, i tempona Yesu haduduana, maimohe topeguruna mekune Iria, “Guru, moapari hai bara kibuku mampopeloho seta iti?”
20 Nahanaihe Yesu, “Nodomi, lawi makura mani pepoinalaimi. Tou mpuu au Kuuliangaakau ide: ane arami pepoinalaimi nauri kokoi pea nodo lihu hahawi, ope-ope peisa mewali. Peisakau mouliangaa bulu iti: ‘Melimbako hangko inditi!’ hai batena melimba. 21 [Agaiana seta au kadake iti, peisa pea rapopeloho ane mekakaeke hai mopuasake.]”
Karombelana Yesu mampololita kapateNa
22 I tempona Yesu hai topeguruNa teruhu i Galilea, Yesu mouliangaahe, “Iko Ana Manusia, ina rahuhuNa i kuasa manusia. 23 Ina rapapateNa, agaiana i alo katalu ina tuwo huleNa.” Indo, masusa ntepuumi lalunda topeguruNa.
Pobaiari asele Souna Pue Ala
24 Kahawena Yesu hai topeguruNa i wanua Kapernaum, hawemohe tauna au mampesingarai asele Souna Pue Ala i Peturu hai mekune, “Noumba gurumu ba mobaiari wori asele Souna Pue Ala, ba bara?”
25 Nahanai Peturu, “Nabaiari!”
Hangko inditi, mesulemi Simo Peturu lao i sou paidaanda. Kahawena, bara mani tepaka mololita, iorumi Yesu mekune, “Simo, noumba pelambiamu: hema au hangangaa mobaiari asele i datu au mokamumu tampo ntanina? Ba taunana haduduana, ba tauna i tampo au nakamumu?”
26 Nahanai Peturu, “Manoto tauna au maida i tampo au nakamumu.”
Nauli Yesu, “Ane nodo, taunana haduduana bara paraluu mobaiari. Nodo wori ikita au mewali taunana Pue Ala, barake hangangaa mobaiari asele Souna Pue Ala. 27 Agaiana nauri nodo, agintami mobaiari bona dati koi inaonda irikita. Mewali, laomoko mopeka i rano. Nualami ikane au nguru-nguruna nupeka. Ina nuhumba doi i lalu ngangana sukana handa tapopobaiari aselenta rodua. Ala doi iti, hai nupopobaiari asele Souna Pue Ala.”