<<    <     Markus     9     >    >> 
9
1 Nauli mbuli Yesu, “Nipehadingi maroa apa au Kuuliangaakau ide: arakau inde au bara ina mate hangko damani moita Pue Ala moparenta hai kuasaNa.”
Yesu rapopeawa i wongko bulu
2 Ini alona hangko inditi, Yesu moanti talu topeguruNa mempanai lao i wongko bulu au mapangka. TopeguruNa au talu iti iami: Peturu, Yakobu hai Yohane. Au ara i tempo iti, Yesu pea hai topeguruNa au talu iti. Tanganda inditi, tebalimi lenggeNa. 3 HampiNa mewali bula mengkila-ngkila; bara ara hadua tauna i dunia ide au peisa mobahoi badu duuna nodo pengkilana. 4 Unga peahe topeguruNa moita rodua nabi au mololita hihimbela hai Yesu. Nabi au rodua iti iami: Musa hai Elia.
5 Hangko inditi, Peturu mouliangaa Yesu, “Guru, maroa mpuu kihadi inde. Agina kibabehi talu oguna bambaru: haogu Irio Pue, haogu i Musa, hai haogu wori i Elia.”6 Katouana, Peturu mololita nodo, lawi barapi naisa apa au ina nauli anti kalanganda.
7 Unga pea hawe gawu mobalungkuhihe, hai hangko i lalu gawu iti rahadimi hambua wotu au manguli, “Idemi AnaNgku au Kupokakaia. Nipehadingi lolitaNa!”
8 Hai i tempo iti wori, metotokihe mantoleli, barapi ara tauna ntanina hihimbela hai ihira; Yesu pearai haduduaNa.
9 Pendaulunda hangko i wongko bulu iti, nauliangaahe Yesu, “Inee hampai niuli-uli i hema pea apa au niita inona, hangko damani Iko, Ana Manusia, rapatuwo hule hangko i kapate.”
10 Hawana iti rapeulai mpuu, bara rapopololita i hema pea apa au mewali inona. Agaiana topeguruNa mombekune-kunemohe ba apa tunggaiana Yesu manguli kaina mearoNa hule hangko i kapate. 11 Ido hai mekunemohe i Yesu, rauli, “Wulingkai. Moapari hai rauli guru agama nabi Elia hangangaa hawe ioru, hangko haweri Datu Topehompo?”
12 Nahanaihe, Nauli, “Tou. Elia hangangaa hawe ioru, lawi ia au mopasilolonga hinangkana. Agaiana noumba Iko Ana Manusia? Moapa hai teuki i lalu Sura Malelaha ina molambiNa ngkaia kapari hai rakakabosaiNa tauna? 13 Agaiana Kuuliangaakau, nabi Elia hawemi, hai ia raewa tauna moula peundeanda, nodo au teuki i lalu Sura Malelaha.”a
Yesu mopakaoha hadua anangkoi au napesuangi seta
14 Roo indo, Yesu hai topeguruNa au talu iti mesulemohe hangko i wongko bulu mampohidupaa topeguruNa au ntanina. Kahawenda inditi, moitahe bosa tauna au motoleliki topeguruNa au ntanina iti, hai bahangkia guru agama tanganda mombehahanai hai ihira. 15 Karaitana tauna bosa Yesu hawe, tingkaramohe hai melangkahe lao mampohidupaa Yesu. 16 Yesu mekune irihira, Nauli, “Apa au nipombehehei hai guru-guru agama iti?”
17 Hadua hangko i tauna bosa iti manguli, “Guru, ide wongkoia anangku kuanti bona Nupakaoha. Bara peisa mololita lawi napesuangi tokadake. 18 Ane napesuangi tokadake, madungka, mowire ngangana, mokei-kei bagana, hai malentoro watana. Kuperapimi i topeguruMu bona mampopelohohe tokadake iti, agaiana bara rabuku.”
19 Nauli Yesu irihira, “Noumbarikau dide? Moapari pane bara mani maroho pepoinalaimi? Hangkia mani kamahaena ina hihimbelaNa hai ikamu? Hangkia mani kamahaena hangangaa Kusabarai peewami? Anti mai anangkoi iti!”
20 Raanti mpuumi anangkoi iti i Yesu. I poitana Yesu, tokadake iti mampoporada-rada watana anangkoi iti duuna madungka tepalumba, hai mowire ngangana. 21 Mekune Yesu i umana anangkoi iti, Nauli, “Hangkiami kamahaena narumpa haki ide?”
Nauli umana, “Hangko koi-koi peami. 22 Bosa belana tokadake modungka watana anangkoi iti i lalu api ba i lalu owai napeinao napapate. Guru, ane peisa, Nupokaahingkai hai Nutulungi wongkamia!”
23 Nauli Yesu, “Moapari hai nuuli ‘Ane peisa?’ Ope-ope peisa mewali i tauna au mepoinalai Iriko.”
24 Nahanai umana anangkoi iti masisimbuku, nauli, “Pue, KupoinalaiKo! Tulungi wongkoia, lawi ide iko makura pepoinalaingku.”
25 Kanaitana Yesu bosa tauna melangka mai moteruhu, Ia mokambaroa tokadake iti, Nauli, “Ee tokadake au mepabongo hai mepantuli! Peloho hangko i anangkoi iti, hai ineemoko mesua hule.” 26 Tokadake iti monganga-nganga, mampoporada-rada anangkoi iti, pane melohomi. I pelohona tokadake, anangkoi iti barapi mokale-kale, nodomi au mate, alanda bosa tauna manguli, “Matemi!”
27 Agaiana Yesu mokingki taiena anangkoi iti hai natulungi mearo. Mearo mpuumi anangkoi iti.
28 Roo indo, Yesu hai topeguruNa paduhe hangko inditi mesua i lalu sou. Pesuanda, mekunemohe topeguruNa iria, rauli, “Guru, moapari hai bara kibuku mampopeloho tokadake iti inona?”
29 Nahanaihe, “Tokadake au nodo, bara peisa rapopeloho hai kapande apa-apa, batena pea hai pekakae.”b
Karombelana Yesu mampololita kana i kapateNa
30 Roo indo, Yesu hai topeguruNa meangka hangko inditi mopaliliu polumaonda moliu i tampo Galilea. Tunggaiana Yesu bona dati raisa tauna bosa kaiumbaNa, 31 lawi i tempo iti, tangaNa mopaguru topeguruNa. Nauliangaahe, “Iko Ana Manusia, ina rahuhuNa i kuasa manusia. Ina rapapateNa, agaiana i alo katalu, ina tuwo huleNa.” 32 Agaiana tunggaiana lolitana Yesu bara raisa topeguruNa, hai bara worihe bai mekune Iria.
Hema au mengkaiwoi tepamahilea tuwona
33 Kahawenda i boea Kapernaum, mesuamohe i haogu sou, mekunemi Yesu i topeguruNa, Nauli, “Apari au nipololita i tanga polumaonta inona?” 34 Barahe mehana, lawi au rapombehehei i tanga polumaonda iami: ba hema au meliu kamahilena tuwona i olonda. 35 Mewali, mohudami Yesu hai mokakio topeguruNa au hampulo hai rodua, Nauliangaahe, “Hema au mampeinao bona meliu kamahilena tuwona hangangaa mengkaiwoi hangko i hangka rangana, hai hangangaa mewali topekadipura i hangka rangana.” 36 Roo indo, Yesu mokakio hadua anangkoi, Napopeangka i olonda. Nakalapuimi anangkoi iti, hai mololita i topeguruNa, Nauli, 37 “Hema au anti peulana Iriko, modoko tauna nodo anangkoi ide, lempona Ikomi au nadoko. Hai hema au modokoNa, bara Iko pea au nadoko, agaiana modoko worimi Pue Ala au motuduNa.”
38 Roo indo, nauli Yohane, “Guru, ara kiita hadua tauna au mampopeloho seta i lalu hangaMu, agaiana kikonto lawi ia bara meula irikita.”
39 Nahanai Yesu, Nauli, “Inee rakonto, lawi tauna au mobabehi tanda kuasa i lalu hangaNgku, barahe ina mokakabosai wataNgku. 40 Tauna au barahe meewa irikita, ihirami au hihimbela hai ikita.
41 Bona niisa: hema pea au motulungikau anti peulami i Kerisitu, ina molambi hurungina i alo au ina mai. Kehapiri owai ntoo pea naweikau anti peulami i Kerisitu, ia ina molambi hurungina hangko i babehiana au maroa.
42 Agaiana hema au mopakanawo hadua anangkoi au nodo anangkoi ide alana barapi mepoinalai Iriko, ina rumihi mpuu pehukuna Pue Ala i tauna iti. Aginami haogu watu pogilia au mahile ratoe i tambolona hai ratende i tahi.
43 Maroa-roakau bona ineekau madosa. Ane pandirina taiemu hambali au moantiko madosa, nubohoki peami. Aginami hambali pea taiemu asala molambiko katuwo maroa hihimbela hai Pue Ala, pane rombali taiemu, agaiana kahopoana ratenderiko i lalu api naraka au rore liliu. 44 [Inditi, api rore liliu, hai uli bara peisa mate.] 45 Ane pandirina bitimu hambali moantiko madosa, nubohoki peami. Aginami hambali pea bitimu asala molambiko katuwo maroa hihimbela hai Pue Ala, pane rombali bitimu, agaiana kahopoana ratenderiko i lalu naraka. 46 [Inditi, api rore liliu, hai uli bara peisa mate.] 47 Hai ane pandirina matamu hambali moantiko madosa, nudungkiki peami. Agina hambali pea matamu hai mewaliko taunana Pue Ala i lalu poparentaNa, pane rombali matamu, agaiana kahopoana ratenderiko i lalu api naraka. 48 Inditi, api rore liliu, hai uli bara peisa mate. 49 Moula Aturana Musa, ope-ope paande au rapopenomba i Pue Ala hangangaa rapamalelaha hai bure.c Nodo wori ope-ope tauna hangangaa rapamalelaha hai api.d
50 Bure, mobundu ntepuu. Agaiana ane matawaami, peisa pae rapakebure hule? Nodo wori, ikamu au meula Iriko hangangaa nodokau bure: lempona, inee nipogiangaa pepoinalaimi mewali malede. Hangangaa mohintuwukau.”