Yesu mampololita ada mpogaa i lalu posamboko
19
1 Karoona Yesu mopahawe ope-ope iti, padumi hangko i tampo Galilea lao i tampo Yudea au ntanda i orupena owai Yarade. 2 Bosa tauna meula Iria, hai au mahai Napakaohahe.3 Arahe bahangkia toParisi au mai mohaoki kamanawona Yesu, mekunehe, rauli, “Moula atura agamanta, ba peisa mpuu tobalilo mogaa hai towawinena kehapiri bara motoka patoana?”
4 Nahanai Yesu, “Bara pae nibasa apa au teuki i lalu Sura Malelaha au manguli: nguru-nguruna Pue Ala mampopewali tobalilo hai towawine. 5 Nauli mbuli Yesu: ‘Ido hai tobalilo hangangaa mopalehi umana hai inana, hai tuwo hihimbela hai towawinena bona au rodua iti mewalihe hawata-wata.’* 6 Mewali i peitana Pue Ala, barapohe rodua, agaiana mewalihe hadua. Ido hai Kuuliangaakau: apa au napahintuwumi Pue Ala, inee mpuu nagaa manusia.”
7 Mehanahe toParisi, rauli, “Ane nodo, moapari hai Musa mohawa bona tobalilo mowei sura mpogaa i towawinena, ane napeinao napogaaki?”
8 Nahanai Yesu, “Anti kamatuana lalumi, Musa mopaliu tauna mogaa. Agaiana katouana, bara nodo hangko i nguru-nguruna. 9 Bona niisa: hema au mampogaaki towawinena hai mampotambia towawine au ntanina, mebualosi. Ane towawinena iti mebualosi, hangko peisari napogaaki.”
10 Hangko inditi, topeguruNa mouliangaa Yesu, “Ane nodori kamaparina ada posamboko, agina ineemoke motambi.”
11 Nahanai Yesu, “Bara ope-ope tauna au peisa modoko lolita ide. Agaiana ara tauna au napakanoto Pue Ala bona barahe motambi. 12 Ara tauna au bara peisa motambi lawi nodomi watana hangko i karapoanakana. Ara wori au bara motambi anti babehiana tauna ntanina i watana. Ara wori au bara motambi anti peundeana haduduana bona tepaka mampopolumao bagona Pue Ala. Hema au peisa mampeulai paturo ide, maroa ane napeulai.”
Yesu mowati anangkoi
13 Hambela tempo, arahe tauna au moanti ananda i Yesu bona Napetobo hai Napekakaengaahe. Agaiana topeguruNa mampokarumpuhe tauna iti. 14 Nauli Yesu i topeguruNa, “Pogiangaahe anangkoi iti mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa.”* 15 Napetobomohe anangkoi iti, hai Nawati. Roo indo, padumi hangko inditi.
Tauna au pebuku lohe mokabaha anu-anuna hai meula i Pue Ala
16 Hambela tempo, ara hadua tobalilo au hawe i Yesu mekune, “Guru, babehia apa au hangangaa kubabehi bona molambina katuwo maroa au bara mokahopoa?”
17 Nahanai Yesu, Nauli “Moapa hai nupekune kana i babehia au maroa? Bara ara ntanina au maroa, batena pea Pue Ala. Ane mampeinaoko molambi katuwo maroa, peulaimide hawana Pue Ala.”
18 Mekune mbuli tauna iti, nauli, “Hawa au noumba?”
Nahanai Yesu, “Inee mepapate, inee mebualosi, inee manangka, inee mohowara dongko, 19 bila umamu hai inamu, hai nupokaahi hangka rangamu nodo pampokaahimu watamu haduduamu.”
20 Nauli anantomoane iti, “Ope-ope hawa iti, kupeulaimi. Apa mani au hangangaa kubabehi?”
21 Nahanai Yesu, “Ane mampeinaoko mampeulai Pue Ala hangko i kabulana lalumu, laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.”
22 Kamohadina lolitana Yesu, masusa laluna hai padumi, lawi ngkaia anu-anuna. 23 Ido hai nauli Yesu i topeguruNa, “Nipehadingi maroa au Kuuliangaakau: mapari mpuu tauna au pebuku mewali taunana Pue Ala i lalu poparentaNa. 24 Bona niisa: hagolo mani hambaa onta mesua i kalolu gigiu pane topebuku mewali taunaNa Pue Ala i lalu poparentaNa.”
25 Karahadina topeguruNa lolitana Yesu, rapotingkara mpuu, rauli, “Oo, ane nodori, hema pae au nabuku molambi katuwo maroa au bara mokahopoa?”
27 Hangko inditi, nauli Peturu i Yesu, “Noumbami ikami? Kipalehimi hinangkana bona kiulaKo. Apa au ina kihumba?”
28 Nahanai Yesu, “Bona niisa: i alo pebotusi i tempona Pue Ala mopawou hinangkana, Iko Ana Manusia ina mohuda moparenta i pohudaa au meawa. I tempo iti, ikamu au meula Iriko ina mohuda worikau i pohudaa au hampulo hai rombua, moparenta to Isaraeli au hampulo hai rontina. 29 Hema au mopalehi halaluna, inana ba umana, anana ba souna ba bondena lawi meula Iriko, batena molambi hurungina hangatu belana hangko i apa au napalehi, hai molambi wori katuwo maroa au bara mokahopoa. 30 Agaiana bosa tauna au tepaioruami tuwonda ide-ide ina mewali tepaibokoa i alo au ina mai. Hai bosa wori tauna au tepaibokoa tuwonda ide-ide ina mewali tepaiorua i alo au ina mai.”