Ngkora pandiri kana i topobago bonde
20
1-2 Nauli Yesu, “Ane Pue Ala mohurungi pobagonda ope-ope taunaNa i alo au ina mai, pewalina nodo ngkora pandiri ide: Hadua ampu bonde anggoro lao mohaoki tauna au raunde mobago i bondena. Madondo-dondo nalambihe tauna, hai nauliangaahe: ‘Laomokau mobago i bondeku, hai ina kuweikau hadua-hadua saromi hampeka doi pera hangaloa.’ Rapokanami lolitana iti, lao mpuumohe. 3 Tinti hahio madondo, lao mbulimi mohaoki au ntanina, naita bahangkia tauna mohuda-huda i pobalu-balua. 4 Nauliangaahe: ‘Laomokau mobago i bondeku, kuweikau saromi au hintoto hai pobagomi.’ Lao mpuumohe. 5 Pualomi, lao mbuli mohaoki tauna, nauliangaahe: ‘Laokau mobago i bondeku.’ Nodo wori au nababehi i tinti talu kalumba.6 Kalumbami, ina tinti lima, molambi mbuli tauna au mohuda-huda. Napekunehe: ‘Moapa hai mohuda-huda peakau hangaloa, barakau mobago?’
7 Rahanai: ‘Lawi bara ara au mampopobagongkai.’
Nauli ampu bonde iti: ‘Ane nodo, laomokau mobago i bondeku.’ Lao mpuumohe.
8 Tampumi alo, naulimi ampu bonde i mandorona: ‘Kakiomohe topobago iti, hai nuweimohe saronda. Nuweihe hampai saronda tauna au mepongkahe mobago tinti lima kalumba. Roo indo, nuwei worihe saronda i tauna au mepongkahe mobago tinti talu. Nubabehi nodo duuna hawe i tauna au mobagohe mepongka madondo.’
9 Mai mpuumohe au mobago mepongka tinti lima kalumba, molambihe saronda hadua-hadua hampeka doi pera. 10 Nodo mpuumi duuna hawehe topobago au mepongka madondo-dondo. Topobago au mepongka madondo iti manguli i lalunda: ‘Manoto hangangaa melabi au naweike, lawi hangaloake mobago!’ Agaiana batena pea wori hampeka doi pera au rahumba. 11 I polambinda saronda iti, mohume-humehe i ampu bonde, rauli, 12 ‘Au hawe mobago i boko, mobagohe hajaa pea. Agaiana ikami, mobagongkai hangaloa, nasimbakingkai alo au makere. Moapari hai nubaiarihe himbela hai ikami?’
13 Nahanai ampu bonde iti: ‘Ene, barana masala irikamu. Bara pae himpudumoke, molambikau saromi hampeka doi pera i lalu hangaloa? 14 Nialami saromi hai laomokau! Peundeakumi mowei saronda i tauna au hawe i boko himbela hai au kuweikau. 15 Bara pae peunde-undeakuto mampopobundu doingku? Moapari hai mahinakau i rangami ane maroa lalungku irihira?’ ”
16 Napahopo Yesu ngkora pandiri iti, Nauli, “Nodo wori i alo pebotusi: bosa tauna au tepaibokoa tuwonda i tempo ide ina mewali tepaiorua i alo au ina mai. Hai bosa wori tauna au mahile tuwonda i tempo ide ina mewali tepaibokoa i alo au ina mai.”
Kataluna belana Yesu mampopaisa kapateNa
17 I tempo iti, Yesu molumao monontohi wanua Yerusale. I tanga rara, Nakakiohe topeguruNa au hampulo hai rodua mogulu mopatani, hai Nauliangaahe: 18 “Nipehadingi maroa! Ide-ide laomoke monontohi Yerusale. Inditimi, Iko Ana Manusia ina rahuhuNa i kapala-kapala tadulako mpenomba hai guru-guru agama, hai ina rabotusi bona rahuku mateNa. 19 Roo indo, ina rahuhuNa i tauna au barahe to Yahudi bona rakakabosaiNa, rapapahaiNa, hai rapapateNa i kau mombehape. Agaiana i alo katalu, ina tuwo huleNa.”
Tauna au mengkaiwoi, ihirami au mahile hanganda i peitana Pue Ala
20 I tempo iti, towawinena Sebedeus hai anana rodua maihe i Yesu. Inanda iti molingkudu motumpa i lindoNa lawi ara au ina naperapi. 21 Mekunemi Yesu iria, Nauli, “Apa au nuperapi?”
Nahanai inanda iti, “Pamperapiku bona ane mewaliKo Datu, anangku au rodua mohuda moparenta hihimbela hai Oio, hadua ntanda i koanaMu, hadua ntanda i kabeoMu.”
22 Nauliangaahe Yesu, “Bara niisa apa au niperapi? Nibuku pae mohalea kapari au hangangaa Kuhalea?”
Rahanai topeguruNa au rodua iti, “Kibuku!”
23 Nauli Yesu, “Tou, hangangaa nihalea kapari nodo au Kuhalea. Agaiana bara Iko au mopakanoto hema au mohuda ntanda i koanaNgku hai ntanda i kabeoNgku. Batena pea UmaNgku au mopakanoto kahemana.”
24 Karahadina topeguruNa au hampulo, pamperapinda ranganda au rodua, rumpumohe. 25 Ido hai Yesu mokakio ope-ope topeguruNa, hai Nauliangaahe, “Niisato kamakancana poparentanda tauna au bara moisa Pue Ala moparentai tauna bosa. Tauna au mahile lantinda mopari-pari tauna bosa mampeulai hawanda. 26 Agaiana ikamu, inee nodo babehiami. Hema au mampeinao mapangka lantina, hangangaa mewali hampai nodo hadua topekadipura. 27 Hai hema au mampeinao mahile hangana hangangaa mewali hampai nodo hadua hawi. 28 Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”
Yesu mopakaoha rodua tobilo
29 Kapadunda Yesu hai topeguruNa hangko i boea Yeriko, mokoloromohe tauna meula Iria. 30 Arahe rodua tobilo mohuda i wiwi rara. Karahadina Yesu au moliu, meraroahe, rauli, “Pue, pemuleana Datu Daudi! Pokaahi wongkamia!”
31 Bosa tauna mokarumpuihe, rauli, “Mandiikau!” Agaiana to bilo iti monganga-nganga peahe masisimbuku, “Pue, pemuleana Datu Daudi, pokaahi wongkamia!”
32 Mengkaroomi Yesu, Nakakiohe, hai Nauliangaahe, “Apa au niunde bona Kubabehi?”
33 Rahanai, “Pue, kiunde wongkamia meita!”
34 Maahi laluna Yesu moitahe, pane Napetobo matanda. Unga peahe meita, liliu meulahe Iria.