Langi hai tampo, nitoiami Pue
148
1 Toiami Pue!Toiami Pue i suruga,
toiami Ia i kapangkaaNa!
2 Nitoiami Ia, ikamu malaekaNa;
toiami Ia, ikamu surodadoNa!
3 Nitoiami Ia, ikamu alo hai wula,
toiami Ia, ope-opekau betue au mewangka!
4 Nitoiami Ia, O langi au tepaiwongko
hai owai au i wongko langi!
5 Maikau motoiake hangana Pue,
lawi hai parentaNa pea, mewali haha hinangkana.
6 Ia au mampopeangka hinangkana i hae-haena,
hai popakanotoNa tetida i hae-haena.
7 Nitoiami Pue i wongko tampo:
ikamu ile naga hai ope-ope au tuwo i tahi maemba,
8 ikamu api hai uda watu, salju hai gawu makumba,
angi mata au mampopolumao parentaNa.
9 Nitoiami Pue, ikamu hinangka bulu hai tongku-tongkuna,
hinangka kau mowua hai kau himburu,
10 ikamu binata maila hai hinangkana pinatuwo,
binata au mendele hai hinangka tadasi au mokapi.
11 Nitoiami Pue, ikamu ope-ope datu i dunia hai humalele tauna,
ope-ope tomakuasanda hai topoparenta i dunia,
12 ikamu anantomoane hai anantowawine,
tosae hai pamuda.
13 Pogiangaa ope-opena motoia Pue
lawi hangaNa pea au meawa ntepuu;
peraeNa melumbu hangko i langi hai tampo.
14 Pue mampopengowahe taunaNa,
alana Ia ratotoia tauna au Napokaahi,
to Isaraeli, taunaNa au hungku Iria.
Toiami Pue!