Kamakuasa hai kamaroana Pue
147
1 Toiami Pue!Maroa mpuu motoia hangaNa;
mototoia hangaNa iti, mepakatana hai hintoto.
2 Pue moaro hule Yerusale;
Ia moguluhe to Isaraeli au mahawu-hawu.
3 Ia mopakaoha tauna au bela lalunda,
hai Nawewehi watanda au bela.
4 Ia mopakanoto imbana ope-ope betue,
hai Nahangahe haogu-haogu.
5 Mahile mpuu Pue hai melumbu rohoNa;
kapandeNa bara ara hokana.
6 Pue mopatogo hule peangkanda tauna au rapopeahi-ahi,
hai monawohe tauna kadake.
7 Motoiamokau Pue hai nani katana lalu,
nitoia Pue Ala hai kecapi!
8 Ia motuko langi hai gawu
au mampopendaulu uda mopamawuru tampo;
Ia mopatuwo hehi i hinangka bulu.
9 Ia mopaandehe binata
hai ana tadasi kaloa au mokaa-kaa.
10 Karoho dara pombeala bara Naunde;
karoho surodado bara Napokatana.
11 Au Napokatana Pue iami tauna au mebila Iria
hai tauna au meharunga i ahiNa au bara mokahopoa.
12 O Yerusale popeawamide Pue;
O Sion toiami Pue Ala au nupenombai,
13 lawi Ia mopakaroho pebehule babakamu,
hai mowatihe anami i olomi.
14 Tampomi Nawei roa ngkatuwo;
Napamabuhukau hai pare au tepamaroa.
15 Ia mopahawe parentaNa i dunia;
ngkoraNa hampalai tebambari.
16 Salju Napopendaulu nodo wulu dimba,
hai langalo baku Nahawuka nodo awu.
17 Uda watu Nakambura nodo wungi.
Hema au peisa motaha pelintina?
18 Ia mongkora, liliu magonu hahahe;
himburuNa Napopewui hai owai liliu moili.
19 Ia mopahawe ngkoraNa i pemuleana Yako,
hinangka popakanotoNa
hai aturaNa Nabambari i to Isaraeli.
20 I humalele ngamba ntanina, barahe Nababehia nodo;
hinangka aturaNa bara raisa.
Toiami Pue!