Morasimi tauna au mampeulai aturana Pue
119
1 Morasimi tauna au katuwona bara kedai,hai tuwo moula aturana Pue.
2 Morasimi tauna au mampeulai hinangka hawaNa,
hai au mohaoki Pue hangko i kabulana laluna.
3 Morasimi tauna au bara wori mobabehi dake,
agaiana tuwo moula raraNa.
4 Nupahawe saduduami hinangka aturaMu,
bona rakingki i katotouana.
5 Kuharunga katuwongku ide
tou-tou mpuu mekingki liliu i hinangka aturaMu.
6 Mewali barana ina mohumba ea,
ane mopailaluna hinangka parentaMu.
7 Ane mampeguruina hinangka aturaMu au manoto,
ina kutoiaKo hangko i kabulana lalungku.
8 Ina mekingkina i aturaMu,
inee wongkoia Nupalehi.
9 Noumba rarana tauna mangura
peisa mokampai babehiana dati kedai?
Rarana iami mokampai tuwona
hintoto hai NgkoraMu.
10 Hangko i kabulana lalungku kuhaokiKo,
ineena Nupogiangaa mehupe hangko i parentaMu.
11 PaturoMu kuwoli i lalungku,
datina madosa Irio.
12 O Pue, tetoiamoKo,
Nupaturoamona hinangka popakanotoMu.
13 Ina mohowara liliuna
hinangka atura au Nupahawemi.
14 Matanana anti pampeulaingku parentaMu,
nodona molambi mampopengaa anu-anu.
15 Ina mampeguruina hinangka hawaMu
hai ina mopepekirina ope-ope paturoMu.
16 Matanana mokatuinao popakanotoMu;
NgkoraMu bara ina naliu inaongku.
17 Kuperapi maahi laluMu i tuduaMu ide bona tuwo peana,
hai mampeulaina ngkoraMu.
18 Nubungkahi matangku, bona moitana tanda kuasa
hangko i aturaMu.
19 Ide iko topolilo peana i dunia,
ineena Nuwuniangia hinangka parentaMu.
20 Wiora lalungku anti pokakabilaingku
hinangka aturaMu.
21 Oio mokambaroa tauna au mampemahile,
hai moganeKo tauna au mehupe hangko i hawaMu.
22 Nukabahana hangko i pepopowoo-woo hai pekakabosai tauna,
lawi iko mekingkina i aturaMu.
23 Nauri tomakuasa hintuwuhe moewana,
tuduaMu ide ina mampekiri hinangka popakanotoMu.
24 Tou mpuu, hinangka pepopaingaMu kupokatana,
mewalihe topepaturo iriko.
25 Tuwongku tirimi i lalu awu,
patuwo wongkoia hintoto hai ngkoraMu.
26 Polumaona tuwongku kupololitami, hai Nuhanaimona;
paturoa wongkoia hinangka popakanotoMu.
27 Nuweina kanoto pekiri i hinangka aturaMu
bona mampepekirina hinangka paturoMu
hai bagoMu au mewulii.
28 Teria lalungku anti kapari;
pakarohona hintoto hai dandiMu.
29 Kuperapi Nupakaraona hangko i rara au mepapuha,
hai anti kamaroaMu kuharunga Nupaturoana aturaMu.
30 Mampileimona rara ngkanoto,
hawaMu kukatuinao liliu.
31 Mekingkimona i hinangka pepopaingaMu.
O Pue, ineena Nupogiangaa molambi ea.
32 Ina mampeulaina hinangka parentaMu
lawi Nungaahimi lalungku.
33 O Pue, popaitaana rara mampeulai ope-ope popakanotoMu,
bona kukingki hawe pumpu tuwongku.
34 Popongilona bona kukingki hinangka aturaMu
bona kupeulai hangko i lalungku.
35 Pogiangaana tuwo moula hinangka parentaMu
lawi itimi peundeaku.
36 Nudiimi lalungku i hinangka pepopaingaMu,
dati mentaka i anu-anu dunia.
37 Pakarao woia lalungku hangko i hinangka au wosi-wosi;
patuwona hai hinangka rara au Nutudungiana.
38 DandiMu au Nuweimohe tauna au matundu Irio
Nupabukei wori i tuduaMu ide.
39 Kuperapi Nupakarao pepopowoo-woo au kupokalanga,
lawi atura-aturaMu batena maroa.
40 Mokabilai mpuuna hinangka hawaMu
patuwo wongkoia moula notoMu.
41 O Pue, Nutudungiana ahiMu au bara mokahopoa,
Nuhoremana hintoto hai dandiMu,
42 bona peisana mohanai tauna au mopapakoina,
lawi mepoinalaina i ngkoraMu.
43 Inee mpuuna Nuhomboki mampololita ngkoraMu au manoto,
lawi meharungana i hinangka aturaMu.
44 Ina mekingki liliuna i aturaMu
hawe i hae-haena.
45 Ina mangaa tuwongku,
lawi mohaokina hinangka hawaMu.
46 Ina mampololitana kana i hinangka pepopaingaMu i lindonda datu
hai barana ina molambi ea.
47 Rumihi kamatanangku mampeulai parentaMu
au kukabilai ntepuu.
48 Moadaina hawaMu hai kukabilai,
hinangka popakanotoMu kupailalu.
49 Buhuinao dandiMu au Nupahawemi i tuduaMu
au moweimona peharunga.
50 Idomi au mopalindona i lalu kaparingku:
dandiMu au mopatuwomona.
51 Rumihi mpuu karakakabosaingku tauna au mampemahile,
agaiana barana mekabaha hangko i atura-aturaMu.
52 Kukatuinao aturaMu au arami hangkoia;
O Pue, tepalindomi lalungku.
53 Rumpuna i tauna au kadake,
lawi mopalehihe aturaMu.
54 Hinangka au Nupakanotomi mewali nani petoiangku
i sou au kupaidai i poliloangku.
55 Ane kaindi, kukatuinao hangaMu, O Pue;
hinangka aturaMu kukingki liliu.
56 Mohumbana roa ngkatuwo,
lawi mekingkina i hinangka parentaMu.
57 O Pue, Oiomi kirangku
lawi modandimona mampeulai paturoMu.
58 Merapina kamaahiMu hangko i kabulana lalungku;
pokaahina hintoto hai dandiMu.
59 Mampekirina rara ngkatuwongku,
hai molumaona moula hinangka pepopaingaMu.
60 Hoholigana hai barana ina molia-lia
mampopolumao hinangka parentaMu.
61 Ratilobuna tauna au kadake,
agaiana hawaMu bara naliu inaongku.
62 Laembengi mearona moore wamba petoia katana lalu,
lawi hinangka aturaMu hintimba.
63 Mohintuwuna hai ope-ope tauna au mengkoru Irio,
hai tauna au mampeulai hinangka parentaMu.
64 O Pue, dunia buke hai ahiMu au bara mokahopoa;
paturoana popakanotoMu.
65 O Pue, Oio mopabukeimoko dandiMu,
hai maroaKo i tuduaMu.
66 Nupaturoana kanoto pekiri hai kapande au maroa,
lawi mepoinalaina i ope-ope parentaMu.
67 Hangko damanina rahuku, mehupena hangko i raraMu,
agaiana ide-ide mekingkimona i dandiMu.
68 MaroaKo hai maroa babehiaMu;
paturoana popakanotoMu.
69 Tauna au mampemahile radaihina hai dongko
agaiana iko, moleogu mpuu lalungku mampeulai hawaMu.
70 Matua lalunda nodo watu,
agaiana iko, mampokatanana hawaMu.
71 Pehuku maroa iriko
bona mampeguruina popakanotoMu.
72 Atura au Nupahaweana mahile holona iriko,
melumbu hangko i bulawa hai salaka.
73 TaieMu au mampopewali hai moteruna,
Nupopongilona bona peisana mampegurui parentaMu.
74 Ane raitana tauna au mengkoruhe Irio matanahe,
lawi meharungana i ngkoraMu.
75 Kuisa, O Pue, kamanotona aturaMu,
lawi Nuhukumona anti kamaahiMu.
76 Kuperapi bona ahiMu au bara mokahopoa mopalindona,
hintoto hai dandiMu au Nuhowarami i tuduaMu.
77 Kuperapi pewatiMu hawe iriko bona tuwo peana,
lawi aturaMu kupokatana lalu.
78 Pogiangaahe tauna au mampemahile molambi ea,
lawi mobabehihe dake iriko au bara ara pongkana.
Agaiana iko, ina mopailaluna parentaMu.
79 Kuperapi tauna au mengkoru Irio,
ope-opehe tauna au moisa aturaMu, rapohintuwuana.
80 Kuperapi lalungku mentaka i aturaMu
datina molambi ea.
81 Rumihi mpuu pokabilaingku pehorema hangko Irio,
meharungana i ngkoraMu.
82 Mamarami matangku mampegia dandiMu
mololitamona, kuuli,
“ImpiramoKo mai mopalindo lalungku?”
83 Barapona mobundu nodo embe kolia au mengkuru rakari,
agaiana popakanotoMu bara naliu inaongku.
84 Hangkia mani kamahaena tuduaMu ide sabara?
Impirahe Nuhuku tauna au mowulaina?
85 Tauna au mampemahile au barahe mampeulai aturaMu
mokaemohe kalolu bona kukanawoi.
86 Hinangka hawaMu peisa raharunga;
tulungi wongkoia lawi rawulaina,
hai karawulaingku bara mokanta-kanta.
87 Haodi rai hai malamona rapapate,
agaiana barana mopalehi ope-ope hawaMu.
88 Patuwona hintoto hai ahiMu au bara mokahopoa
bona mekingkina i atura au Nuweina.
89 O Pue, ngkoraMu bara mokahopoa
monono i suruga.
90 KamaduduMu bara tebali i hae-haena.
Oio mopatogo tampo pane ara liliu.
91 Hinangka au ara ide-ide mewali anti parentaMu
lawi ihira iti tuduaMu hahahe.
92 Ane pandirina aturaMu bara mewali kamatanangku,
manoto matemona i lalu pantodihangku.
93 ParentaMu bara naliu inaongku i hae-haena,
lawi hai itimi Nupatuwona.
94 Ide iko anaMuna, horema wongkoia,
lawi mohaokina hawaMu.
95 Rapegiana tauna au kadake rapapate;
agaiana iko, ina mampekiri peana aturaMu.
96 Kuita apa au maroa ara mani tampana,
agaiana parentaMu bara ara hokana.
97 AturaMu rumihi mpuu kakuundena!
Kupepekiri liliu hahangaloa.
98 HawaMu mampopewalina matopa hangko i iwalingkuhe,
lawi hawaMu iti kukatuinao liliu.
99 Mapande manina iko panehe gurungku,
lawi ope-ope hawaMu kupailalu.
100 Mongilo manina panehe totosae,
lawi mekingkina i hinangka parentaMu.
101 Rara dake bara kupolumaongi
bona mampeulaina ngkoraMu.
102 Barana mekabaha hangko i aturaMu,
lawi Oiomi au mopaturona.
103 Mengkasa mpuu i karangku kamomina dandiMu,
melumbu hangko i tinaha i dilangku.
104 Molambina kapande hangko i aturaMu,
idomi hai mokahihina hinangka rara dake.
105 NgkoraMu iami hulona bitingku
hai baa i rarangku.
106 Mosumpamona hai ina kupabukei;
ina mekingkina i hinangka aturaMu au manoto.
107 O Pue, mapari gagamona,
patuwo wongkoia moula ngkoraMu.
108 O Pue, Nudokomi petoia kamba kabula lalungku
hai Nupaturoana hinangka aturaMu.
109 Katuwongku naingke peami kapate,
agaiana aturaMu bara naliu inaongku.
110 Tauna au kadake mampotangaamona hea
agaiana barana mekabaha hangko i hinangka hawaMu.
111 Hinangka parentaMu kupososorami i hae-haena,
lawi itimi au mopamatana lalungku.
112 Kupatetidami lalungku mampeulai popakanotoMu
hawe i kahopoana katuwongku.
113 Tauna au mokawewo pekirina kukahihi,
agaiana aturaMu kupokakaia.
114 Oiomi pentabungiangku hai labangku;
meharungana i ngkoraMu.
115 Ee tauna au kadake, nikaraohina!
Ina mampeulaina hawana Pue Ala au kupenombai.
116 Hugana hintoto hai dandiMu bona tuwona,
hai ineena Nupogiangaa rapakaea i lalu peharungangku.
117 Nuharongina bona tehoremana;
mopailalu liliuna parentaMu.
118 Nuae hahahe tauna au motengko
hangko i hinangka popakanotoMu
lawi peakalanginda mbero-mbero.
119 Ope-ope tauna au kadake Nuimbahe nodo pupu i dunia,
ido hai moundena hinangka pepopaingaMu.
120 Moradana lawi langana Irio,
langana i pehukuMu.
121 Mampopolumaomona noto hai kahintimba;
ineena hawe Nuhuhu i tauna au mohihipina!
122 Podandimide, ina Nutulungina;
tauna au mampemahile ineehe Nupogiangaa mampopeahi-ahina.
123 Mamarami matangku mampegia pehoremaMu;
moharungana kaNupabukeina dandiMu au manoto.
124 Nukadipuramona moula ahiMu au bara mokahopoa,
hai Nupaturoana hinangka popakanotoMu.
125 Ide iko tuduaMuna, Nupamapandena
bona kuisa hinangka pepopaingaMu.
126 O Pue, hawemi tempoMu mearoha;
tauna moewamohe aturaMu;
127 ido hai hinangka parentaMu kupokakaia,
meruu hangko i bulawa; melumbu hangko i bulawa ntepuu.
128 Idomi hai tuwo manotona moula hawaMu;
hinangka rara dongko kukahihi.
129 Ope-ope pepopaingaMu maroa ntepuu,
idomi hai kukingki i tuwongku.
130 Ane tewungkehi NgkoraMu, mopaara kamabaa,
mowei kanoto lalu i tauna au bara mongilo.
131 Wiora lalungku
lawi mokabilaina hinangka hawaMu.
132 Pembalilingimona hai Nupokaahina,
nodo pampokaahiMu tauna au mokabilai hangaMu.
133 Pakarohomide polumaongku hintoto hai dandiMu
hai hinangka dake inee Nupogiangaa makuasa iriko.
134 Kabahana hangko i pehihipinda tauna,
bona matunduna i aturaMu.
135 Simbaki tuduaMu ide hai pewangkaMu,
hai paturoana hinangka popakanotoMu.
136 Owai matangku moili nodo halu,
lawi tauna barahe mampeulai aturaMu.
137 O Pue, manotoKo
hai aturaMu tou mpuu.
138 HawaMu au Nupahawemi
hintimba hai manoto.
139 Humawomi karumpuku,
lawi paturoMu naliumi inaonda iwalingku.
140 DandiMu maroho, rapoinalai
hai kupokakaia.
141 Meahi-ahi tuwongku hai barana kana raita,
agaiana hinangka parentaMu bara naliu inaongku.
142 KamanotoMu bara tebali i hae-haena
hai aturaMu tou mpuu.
143 Narumpana pepa hai kapari
agaiana hinangka parentaMu kupotana lalu.
144 Hinangka pepopaingaMu manoto i hae-haena;
Nupopongilona bona tuwo wongkoia.
145 Meraroana hangko i lalungku O Pue, hanai wongkoia!
Hinangka popakanotoMu ina kupeulai liliu.
146 Meraroana Irio; horema wongkoia
ina mekingkina i hinangka pepopaingaMu.
147 Madondo-dondo mearomona
hai meraroana merapi tulungi,
meharungana i ngkoraMu.
148 Hambengia barana leta,
lawi mampepekirina dandiMu.
149 Pehadingi wotungku
hintoto hai ahiMu au bara mokahopoa
O Pue, patuwo wongkoia moula aturaMu.
150 Tauna au mowulaina hungkumohe;
tunggaianda kadake iriko,
hai barahe moholoi aturaMu.
151 Agaiana Pue, hungkuKo,
hai hinangka parentaMu manoto.
152 Hangkongkoiami kuisa
hinangka pepopaingaMu
au Nupakanotomi i hae-haena.
153 Peita pantodihangku hai Nukabaha wongkoia,
lawi aturaMu bara naliu inaongku.
154 Nuperuruina i kara-karangku hai Nuhompokina;
patuwo wongkoia moula dandiMu.
155 Katehorema karao hangko i tauna au kadake,
lawi barahe mohaoki popakanotoMu.
156 O Pue, mahile mpuu ahiMu
patuwona hintoto hai aturaMu.
157 Topewulai hai iwalingku bosahe,
agaiana barana ina mehupe hangko i pepopaingaMu.
158 Topesapuaka barahe kuunde kuita
lawi barahe mekingki i paturoMu.
159 Peita kuunde mpuu hinangka parentaMu
patuwo wongkoia, O Pue;
hintoto hai ahiMu au bara mokahopoa.
160 Pepangkaana ngkoraMu iami kanoto
hai hinangka aturaMu au manoto;
bara tebali i hae-haena.
161 Bara mopongka-pongka karawulaingku tauna au mahile tuwonda,
agaiana iko, batena pea ngkoraMu au kupokalanga.
162 DandiMu kupokatana
nodo tauna au molambi ngkaia anu-anu.
163 Dongko kukahihi hai kupokarika,
agaiana aturaMu kupokakaia.
164 Pitu belana i lalu hangalo kutoiaKo,
lawi hinangka aturaMu manoto.
165 Tinda lalunda tauna au mampokakaia ope-ope aturaMu,
bara mpuu ara katehubeanda.
166 Kupegia katehorema hangko Irio O Pue,
hai mampeulaina hinangka parentaMu.
167 Mekingkina i pepopaingaMu
hai kupokakaia mpuu.
168 Mampeulaina aturaMu hai hinangka pepopaingaMu,
lawi tuwongku tepambole i lindoMu.
169 O Pue, kuharunga wotungku teduu i lindoMu;
weina kapande hintoto hai ngkoraMu.
170 Kuharunga perapingku hawe i lindoMu;
kabaha wongkoia moula dandiMu.
171 Pogiangaa humengku mohowara petoia Irio,
lawi Nupaturoa hahamona popakanotoMu.
172 Pogiangaana mamponani hinangka petoia
lawi ope-ope parentaMu manoto.
173 Kuharunga taieMu motulungina
lawi kupileimi mampeulai hahana parentaMu.
174 O Pue, mokabilaina katehorema hangko Irio,
hai aturaMu mopamatana lalungku.
175 Pogiangaana tuwo bona kutotoiaKo,
kuharunga ope-ope aturaMu motulungina.
176 Puhana nodo dimba au matanta;
Nuhaoki woia ide tuduaMu,
lawi ope-ope parentaMu bara mpuu naliu inaongku.