Nani pepomahile
118
1 Tapahawemi katana lalunta i Pue, lawi Ia maroa!Tetida ahiNa au bara mokahopoa.
2 Pogiangaahe to Isaraeli mololita, rauli,
“Tetida ahiNa au bara mokahopoa.”
3 Pogiangaahe pemuleana Haruni manguli,
“Tetida ahiNa au bara mokahopoa.”
4 Pogiangaahe tauna au mengkoru Iria mololita, rauli,
“Tetida ahiNa au bara mokahopoa.”
5 I lalu kaparingku meraroana i Pue;
Nahanaimona hai Nakabahana.
6 Barana ina langa lawi Pue mamporangaina.
Apa pae au peisa rababehi tauna iriko?
7 Pue mamporangaina bona Natulungina,
ina moitana karananginda iwalingku.
8 Maroa mani meonga i Pue,
pane mampoinalai tauna.
9 Maroa mani meonga i Pue,
pane mepoinalai i tuana.
10 Bosahe iwali motolelikina,
agaiana i lalu hangaNa Pue kuhuhulihe.
11 Lelimona ratoleliki, ralibumona,
agaiana i lalu hangaNa Pue kuhuhulihe.
12 Rapokombo-komboina nodohe owani; agaiana ina rapatunahe
nodo api au hampalai pea moande hehi bangi
hai i lalu hangaNa Pue kuhuhulihe.
13 Rahumbangana rurumihi hawena madungka,
agaiana natulungina Pue.
14 Puemi rohongku, Iriami petoiangku
Iami katehoremangku.
15 Pehadingi wotu katana-tana hai penangi
i bambarunda tauna manoto, au manguli,
“Taie koanana Pue makuasa mobabehi au metingkarai,
16 taie koanana Pue makuasa mepopenangi;
taie koanana Pue makuasa mobabehi au metingkarai!”
17 Barana ina mate, agaiana batengku tuwo
bona mobambarina hinangka bagona Pue.
18 Rumihi mpuu pekandangina Pue iriko,
agaiana barana Nahuhu i kapate.
19 Bungkahiana babaka Souna Pue au rapesuangi tauna malelaha,
ina mesuana i laluna
ina mopahawena katana lalungku i Pue.
20 Idemi babaka Souna Pue,
tauna au manoto ina mesuahe i laluna.
21 Mopahawena katana lalungku Irio, lawi Nuhanaimona
hai Nuhoremamona.
22 Watu au ratende topoaro sou,
watu iti au mewali pohudaa sou.
23 Iti mewali moula peundeana Pue,
hai maroa ntepuu apa au Nababehi.
24 Idemi alo au napopewali Pue,
maimokau tapomahile i lalu katana-tana!
25 O Pue, kiperapi Nuhoremangkai!
O Pue, Nukiraia wongkamia rasi!
26 Rawatimi tauna au mai i lalu hangana Pue!
Kiwatikau mai hangko i souna Pue.
27 Pue, iami Pue Ala, Ia mopamabaake.
I alo mahile nutoe popenombamu hai koloro
i tandu-tandu meja pohuwea popenomba.
28 Oiomi Pue Ala au kupenombai,
ina mopahawena katana lalungku Irio,
Pue Ala au kupenombai, ina kupomahileKo.
29 Tapahawemi katana lalunta i Pue lawi Ia maroa,
Tetida ahiNa au bara mokahopoa.