Sura Katalu
(Petoia 73–89)
Kapari hai peharunga
Nanina Asaf
73
1 Tou mpuu, Pue Ala maroa laluNa i taunaNa,i tauna au malelaha pekirina.
2 Anti kawulingku hangkoia, haodi rai tepalanggaruna
hai madampana,
3 lawi mahinana i tauna au mantintindora.
Ane moitana tauna kadake, maroa tuwona
4 lawi barahe mahai-hai,
watanda maroho hai malingkati.
5 Barahe molambi kamasusa,
hai barahe narumpa pantodiha, nodo tauna ntani.
6 Ido hai mampoenohe pampemahile
hai mampohampihe kamakasara.
7 Lalunda buke hai dake,
tunggaianda au kadake bara mau ope i pekirinda.
8 Mehengi-hengi peamohe hai lolita au mehoi.
Hai pampemahilenda, mepopara peamohe, ina mepopeahi-ahi.
9 Moewahe Pue Ala i suruga
hai mantindora peami pololitanda i ope-ope tauna i dunia.
10 Mewali ido hai taunana Pue Ala membalilihe mampehadingi lolitanda
hai rapoinalai alanda meula irihira.
11 Tauna au kadake mololitahe, rauli, “Barato naisa Pue Ala.
Mapande pae Pue Ala au rauli makuasa?”
12 Nodomi tauna au kadake iti;
maroa peami katuwonda tetambai liliu anu-anunda.
13 Mbero-mbero peana mokampai kamalelahana lalungku;
hai bara ara bunduna mokaraohina dosa,
14 lawi hahangaloa,
narumpana kapari,
hai kamadondona
molambina pehuku.
15 Ane rapana mololitana nodo
ina mopapuhana pemuleami.
16 Kupari-pari bona kuisa moapari hai mewali nodo,
agaiana mapari mpuu kakupepekirina
17 Kahopoana mesuana i lalu souna Pue Ala au malelaha,
hangko kuisari kahopoana katuwonda tauna au kadake.
18 Katouana Nupopaidamohe i rara au maleluru;
Nupogiangaamohe manawo alanda marupu.
19 Hangkapira mata pea kamaropunda;
tunahe anti kamaruginda au melangaki.
20 Nodo pangipi, ane mearoke madondo matantami.
Ane mearoKo unga peahe tuna, O Pue Ala.
21 I kamasusana lalungku,
pehadingku nodona ratohu-tohu.
22 I tempo iti, nodona tontuli hai barana matopa;
nodona binata i lindoMu.
23 Agaiana batengku pea hungku Irio,
Oio mokingki taie koanangku.
24 Nuninina hai pepaturoMu,
hai hangalo ina Nuweina peawa
25 Hema au kuporanga i suruga? Batenami Oio.
I raoa hangko Irio, bara ara au kuunde i dunia.
26 Nauri rumihi kamaledena watangku hai mapepe hulengku
batenami Pue Ala au kuporoho hai au kupososora i hae-haena.
27 Tauna au karao hangko Irio batena ina marugi,
hai ope-ope tauna au mopalehiKo Nupatunahe.
28 Agaiana ide iko, kuunde hungku i Pue Ala,
Iami au kupopewali peongaangku
bona mobambarina hinangka au Nababehi.