Mampekakaea datu
Hangko i Salomo
72
1 O Pue Ala, paturoa datu aturaMuhai kamanotoMu i ana datu au tobalilo,
2 bona ia mobotusi taunaMu moula notoMu
hai mobabehi au manoto i taunaMu au mapari.
3 Kuperapi bona ope-ope bulu mopaara roa ngkatuwo,
hai tongku-tongkuna mopatongawa kamanotoMu.
4 Kuperapi bona datu
mamperurui tauna au rapopeahi-ahi,
motulungihe tauna au mapari katuwonda
hai mopatunahe tauna au mepopeahi-ahi.
5 Kuperapi bona datu ngkalanga tinuwuna hawe i pemuleana,
hungkana mani ara alo hai wula.
6 Kuharunga datu mewali pewati nodo uda au toa i pada,
nodo potimburu uda kebuu moowaihi tampo.
7 Kuperapi bona tetambai liliu kamanotona poparentana,
hai roa ngkatuwo hawe i ope-ope tauna hungkana mani ara wula.
8 Kuharunga poparentana datu ina maemba mepongka i Mata alo hawe i Katampua alo.
Hangko i owai Eprat hawe i wuntu dunia.
9 Tauna au maida i pada wungi ina molingkuduhe i lindona,
hai ope-ope iwalina ina meampuhe iria.
10 Kuharunga datunda to Tarsis hai datu au hangko i tampo karao
ina moantihe popenombanda iria;
Ope-ope datunda to Ara hai datunda to Etiopia
ina maihe moanti anu-anunda iria.
11 Ope-ope datu ina menomba iria,
hai humalele tauna ina mewalihe hawina.
12 Lawi datu ina mohoremahe topeahi-ahi au meraroa,
mamperuruihe tauna au rapopeahi-ahi hai tauna au bara ara topetulunginda.
13 Ia ina maahi i tauna au malede hai topeahi-ahi,
hai mohorema tauna au mapari katuwonda.
14 Datu ina mohompoki tauna hangko i pepopeahi-ahi hai karapakaparinda
lawi katuwonda masuli holona iria.
15 Tuwomi datu! Kuharunga bulawa hangko i tampo Ara rapopenomba iria.
Kuharunga ia rapekakaea liliu
hai tewati i alo-alona.
16 Kuharunga i humalele poparentana tuwo pare au melabi-labi
mobalumba i wowo bulu.
Wuana memboka nodo bulu Libanon,
wuli-wulina nodo kangkaia hehi i dunia.
17 Kuperapi hangana datu rakatuinao hawe i hae-haena.
Hangana tebambari liana mani ara alo.
Humalele tauna ina mombewatihe i lalu hangana
hai ina mampololitahe porasina.
18 Tetoiami Pue au rapenombai to Isaraeli,
batena pea Ia au mobabehi hinangka au melangaki.
19 Hai tetoiami hangaNa au meawa i hae-haena,
hai taperapi bona peawaNa mobukehi humalele dunia.
Amin, Amin.
20 Hampa indemi Sura Petoiana Daudi, anana Isai.a