Pekakaena tauna au matinuwumi
71
1 O Pue, meongana Irio;inee wongkoia Nupogiangaa rapakaea.
2 Nukabahana hai horemana anti kamanotoMu;
Nupehadingi pekakaengku hai Nupatuwona.
3 MewalimoKo bulu watu pantidaangku i hae-haena;
Nupakanotomi kaNuhoremangku,
lawi Oiomi bente pentabungiangku.
4 O Pue Ala au kupenombai, peparaina hangko i tauna au kadake,
hangko i kuasanda tauna au masurokoa hai maseke,
5 lawi Oiomi peharungangku, O Pue Ala.
O Pue, Iriomi pepoinalaingku mepongkana koi-koi.
6 Hangko i karakantimiangku Iriomona mekingki.
Nukampaina mepongka hangko i lalu taina inangku;
ido hai kutoia liliuKo.
7 Katuwongku mewali pandiri i tauna bosa,
lawi Oiomi peongaangku au maroho.
8 Kutoia liliuKo;
hahangaloa kubambari peawaMu.
9 Ineena Nutende ane saemona;
ineena Nupalehi ane opemi rohongku,
10 lawi ope-ope iwalingku, rauli-uli peamona.
Tauna au mampeinaohe mopapatena mombepateruhumohe,
11 rauli, “Ia napalehimi Pue Ala,
tawulaimi tahaka, lawi barapi ara au mamperurui.”
12 O Pue Ala, ineeKo karao hangko iriko!
Pue Ala au kupenombai, tulungi wongkoia holiga!
13 Nupogiangaahe tauna au mampoiwalina
rapakaea hai rapatuna.
Nupalikangaahe tauna au ina mopahurewuna
narumpa pekakabosai hai ea.
14 Agaiana iko, meharunga liliuna Irio,
hai petoiangku Irio kutambai.
15 Ina mampololitana kana i kanotoMu;
hahangaloa ina kubambari kana i pehoremaMu
au barapi peisa kuimba.
16 O Pue Ala, kutoia hinangka kamakuasaMu;
batena pea kamanotoMu au kupatolele.
17 O Pue Ala, hangko koi-koina, Nupaturomona.
Hawe ide-ide, hinangka au Nubabehi au mewulii kubambari.
18 O Pue Ala, hawena sae hai keuba
ineena Nukalambahi
bona kuasaMu ina kubambari i hasilapiandahe anangku,
hai rohoMu ina kupahawe i pemuleangku.
19 O Pue Ala, kamanotoMu hawe i langi.
Nupobago mampopengaa babehia au mahile.
O Pue Ala, hema au himbela hai Oio?
20 Nupogiangaamona molambi mampopengaa pari hai pantodiha,
agaiana ina Nupatuwo hulena
hangko i lapi tampo.
21 Ina Nutambai katebilangku,
hai ina Nupalindo mbulina.
22 O Pue Ala au kupenombai, ina mamponanina petoia
katana lalu Irio hai gambusu, lawi Nupabukei ope-ope dandiMu.
O Pue Ala au malelaha au rapenombai to Isaraeli,
ina kutoiaKo hai kecapi.
23 Matana lalungku mamponani petoia Irio,
matana-tana wori tanoanangku lawi Nuhoremamona.
24 Hahangaloa kubambari kamanotoMu
lawi tauna au mampeinao mopapatena
ranangi hai rapakaeamohe.