Nani pandawi anti kamagerona souNa Pue Ala
Nani pepaturona Asaf.
74
1 O Pue Ala, moapari hai Nutende mpaliliumongkai?Moapari hai humawomi karumpuMu, i taunaMu?
2 Nukatuinao taunaMu au Nupileimohe hangkoia.
Au Nuhoremamohe mewalihe taunaMu haduduaMu.
Katuinao bulu Sion au Nupopewali paidaaMu.
3 Nupamangaami palantaMu mai mampeita paidaa au mageromi ide;
hinangka au ara i souMu au malelaha rarugiimohe iwaliMu.
4 IwaliMu mogee-geehe i souMu
hai moorehe bandera tanda penanginda.
5 Ihira nodohe tauna au mowaleaka owahenda
motiwingi pandulu;
6 hinangka batina
raowahe hai rapalu-palu hawe magero.
7 Mohuwehe souMu au malelaha hawe pumpu
hai modaihihe paidaa menomba Irio,
8 rauli lalunda, “Ina tapopeahi-ahihe ope-ope.”
Ihira iti mohuwehe hinangka paidaa menomba i Pue Ala i tampo ide.
9 Tanda kuasa irikami barapi kiita; nabi-nabi barapi ara.
I olongki bara ara au mangisa hangkia mani kamahaena node liliu.
10 O Pue Ala, hangkia mani kamahaena iwali iti ina mokakabosaiKo?
Ba ina Nupogiangaahe mampopowadi-wadi hangaMu i hae-haena?
11 Moapari hai Nupogiangaa pearaingkai?
Moapari mangkalapui ponda pearaiKo?
12 Moleri hangkongkoianami Oiomi datungku, O Pue Ala;
Oiomi au mohoremangkai.
13 Oiomi au mampopogaa tahi hai rohoMu,
au mopengka waa naga i wongko tahi.
14 Oiomi au morupu Lewiatana au moroogu waana.
Hai Nupopewali paandenda hinangka binata au maida i pada wungi.
15 Oiomi au mobeto ulu owai hai mampopoili owai,
hai au mopamati ope-ope owai au moili.
16 Oiomi au mampopewali mabaa hai kaindi,
hai au mopakanoto paidaa alo hai wula.
17 Oiomi au mopakanoto hinangka tampana tampo,
nodo wori tempo madii hai tempo keuda.
18 O Pue, hangangaa Nukatuinao noumba iwali mampopowoo-woo hangaMu,
hai noumba humalele tauna au barahe moisaKo mokakabosai hangaMu.
19 IneeKo mohuhu taunaMu au malede i tauna au maseke!
Inee mpuu naliu inaoMu katuwonda taunaMu au masusa.
20 Katuinao podandiMu irikami
lawi humalele paidaa au makaindi buke hai tauna au mobabehihe dake.
21 Inee Nupogiangaa tauna au rapopeahi-ahi molambihe kamaea.
Kuharunga tauna au mapari hai au meahi-ahi motoia liliuhe hangaMu.
22 O Pue Ala, peangka hai popewalimide tunggaiaMu,
lawi hahangaloa hangaMu rakakabosai liliu tauna au barahe moisaKo.
23 Inee naliu inaoMu wotunda iwaliMu,
hai ponganga-nganganda iwalimu
au bara mengkangkaroo.