Pekakae i lalu kapari
69
1 Idemi nanina Daudi au rapahawe i tadulako toponani au raponani moula nani “Bunga Bakung”.
2 O Pue Ala, horemana,
lawi owai hampa i tambolongkumi!
3 Halolona i nangko au kaladu,
bara ara pepangkaaku.
Tirimona i owai au kaladu;
balumba au rumihi mopamalisona.
4 Maledena anti perararoangku.
Bangimi padokongku hai mamarami matangku,
lawi mampepegiana petulungina Pue Ala
au kupenombai.
5 Tauna au bara ara pongkana mokahihina,
melumbu kabosanda hangko i weluangku.
Bosa mpuu tauna au mampeinao mopapatena
nauri bara ara salangku.
Rapari-parina mampopesule anu-anu
au barato kuperampai.
6 O Pue Ala, Nuisa noumba kantuliku,
dosangku bara tewuniangi Irio.
7 O Pue Ala au makuasa,
ineena Nupogiangaa mopaara eanda tauna
au meharunga Irio.
O Pue Ala au rapenombai to Isaraeli,
ineena Nupogiangaa modaihi tauna
au menombahe Irio.
8 Anti pepoinalaingku Irio
rapapakoina hai rakakabosaina
9 Tepairaoamona hangko i hahalalungkuhe;
nodomona tohandarena i olonda wutungkuhe,
10 lawi rumihi mpuu pokabilaingku souMu;
pekakabosai tauna Irio morumpa wori watangku.
11 Moteriana hai mopuasana,
agaiana rapapakoirina.
12 Ane mampowaruna waru ngkasusa,
rakakabosairina.
13 I potobu-tobuanda iko pea au rauli-uli;
hai i olonda tomalangu-langu iko pea au raponani-nani.
14 Agaiana mekakaena Irio, Pue; O Pue Ala, hanai pekakaengku
i tempo au Nupatokami,
moula kamaahiMu au mahile
hai petulungiMu au bara mabotu-botu.
15 Horemana hangko i lalu nangko,
datina tampu.
Kabahana hangko i tauna au mokahihina,
hai hangko i owai au kaladu.
16 Ineena Nupogiangaa nawiwilolo balumba tahi,
ba naamena kalolu au malobu
ba manawona i tibubu hai teiwungina.
17 Hanaina O Pue, lawi kamaahiMu bara tebali.
Nupokaahi wongkoia hintoto hai kabulana laluMu au mahile!
18 IneeKo karao hangko i tuduaMu ide,
lawi mapari mpuuna; holigaKo mai motulungina!
19 MaiKo iriko hai horemana;
kabahana hangko i ope-ope iwalingku.
20 Nuisa noumba kamaeangku, karapapakoingku hai karapopowoo-woongku;
Ope-opehe iwalingku Nuisa hahahe.
21 Pekakabosainda iti mopamalede buungku
hai matalami rohongku.
Mampepegiana ahi, agaiana mbero-mbero pea;
mohaokina pepalindo, batena pea wori bara kulambi.
22 Agaiana rapaanderina rasu,a
hai ane mangkadouna, rapaenuna anggoro au mangilu.*
23 Kuperapi bona paande posusa au rapasilolonga, mewali nodo hea
hai tarobo au morugii watanda.
24 Pogiangaa matanda mewali bilo datihe meita
hai Nupabungku-bungkuhe.*
25 Bumbuha karumpuMu irihira;
Nupogiangaahe narumpa pehukuMu au rumihi.*
26 Pogiangaamide paidaanda boa;
inee ara hadua au mampaidai,
27 lawi mampopeahi-ahihe tauna au Nuhuku,
hai moparumihi parinda tauna au Nupamaparihe.
28 Nurarangi salanda bona tetambai
hai ineehe Nupamanoto!
29 Palikangaamide hanganda ragewo i sura ngkatuwo;
ineehe teuki hihimbela hai tauna au manoto.
30 Agaiana ide iko maparina hai barapi kusauru.
O Pue Ala, kuharunga bona Nuhoremana hai Nukampaina.
31 Ina kupolinga Pue Ala hai nani petoia,
Ina kupomahile hai nani katana lalu.
32 Itiri au mopamatana laluna Pue
pane popenomba japi laki au marudu hai mahile.
33 Moita iti, ope-opekau au tepaiwoi tuwomi ina matana-tana.
Kuharunga ikamu au mohaoki Pue Ala ina maroho hule lalumi,
34 lawi Pue mampehadingi peraroanda topeahi-ahi
hai taunaNa au i lalu tarunggu barahe Nakalambahi.
35 Ee langi, tampo,
tahi hai hinangka ihina, nitoiami Pue Ala
36 lawi Pue Ala ina mohorema Sion
hai moaro hule hinangka boea au i tampo Yehuda
bona taunaNa maida mbulihe indora hai mewalimohe ampu boea.
37 Ina rapososora pemuleana taunaNa;
hai tauna au mokabilaihe Pue Ala ina maidahe inditi.