Nani petoianda to Isaraeli anti penanginda
68
1 Idemi nanina Daudi au napahawe i tadulako toponani.
2 Mearomi Pue Ala mohawu-hawuhe iwaliNa;
tauna au mokahihi Pue melangkamohe hangko Iria.
3 Nodo rambu au nawui himburu
hai kamagonu taru au nahundere api,
nodo wori tauna au kadake tunamohe i lindona Pue Ala.
4 Agaiana tauna au manoto matanahe.
Hai rumihi mpuu kamatananda i lindona Pue Ala.
5 Monanimoke motoia Pue Ala, hai tapomahile hangaNa.
Tapasilolongami raraNa, lawi polumaoaNa i laerawa!
HangaNa iami Pue; Matana-tanake i lindoNa.
6 Pue Ala au maida i souNa au malelaha,
Iami au mewali Umanda toilu
hai au mamperuruihe tobemba.
7 Pue Ala mowei paidaa i tauna au tuwo sadudua,
Ia mampopesuwu tauna au ratarunggu alanda matana,
agaiana tauna au meewa i Pue Ala, maidahe i tampo au bangi hai bara marudu.
8 O Pue Ala, i tempoMu mampoioruahe taunaMu mombeala,
hai i kaNunininda molumao i pada wungi,
9 moenggomi tampo, hai tebumbuhami uda hangko i langi.
Ope-ope iti mewali i lindona Pue,
Pue Ala au mampatongawa wataNa i bulu Sinai,
Pue Ala au rapenombai to Isaraeli.
10 O Pue Ala, ngkaia mpuu uda au Nubumbuha hangko i langi;
Oio mopamarudu tampoMu au maduhu.
11 Idomi hai taunaMu maidahe indo.
O Pue Ala, anti kamaroaMu,
Nupabukei hinangka au rapotuwo topeahi-ahi.
12 Pue monangihe iwalingki;
hai bambari maroa iti raantihe towawine
au kabosanda nodo surodado.
13 Rauli node, “Mabalimohe ope-ope datu hai surodadonda
bulawa hai salaka au raperampai, rakira-kira towawine to Isaraeli.
14 Bosahe au bara meula mombeala, leta peahe i olo gimpu dimba.
Nauri nodo, batena molambi worihe anu-anu masuli au raperampai,
nodo kapi tadasi manggebodo au rababehi hangko i salaka hai bulawa.”
15 I tempona Pue Ala au makuasa mohawu-hawu datu i tampo iti,
toami wua uda hai magara i bulu Salmon.
16 Ee bulu Basan bulu au meawa
hai ngkaia wowona,
17 moapari hai mahinako bulu au meawa hai ngkaia wowomu
mototoki bulu Sion au napileimi Pue Ala mewali paidaaNa hawe i hae-haena?
18 Pue Ala au ratoleliki kareta pombealaNa
ipulona sabuna,
maimi hangko i bulu Sinai mesua i paidaaNa au malelaha!
19 Karoona monangi iwaliNa, mengkaoremi lao i kapangkaaNa, hai bosahe tawani au Naanti.
Ia modoko hinangka popenomba hangko i tauna, tepesua topeewa,
bona maidahe indora hihimbela hai Pue Ala.
20 Tetoiami Pue,
lawi Ia au mohalea parinta alo-alona.
Pue Ala iami Topehoremanta.
21 Pue Ala au tapoinalai, iami Pue Ala au mehorema.
Pue Ala au tapenombai, mokabahake hangko i kapate.
22 Pue ina mopamarupu waanda iwaliNa,
hai mopengka banga waa tauna
au tuwo liliu i kamadosanda.
23 Mongkorami Pue Ala, nauli, “Hangko i Basan ina Kuanti hule iwalimu,
ina Kuanti hulehe mai hangko i lalu tahi,*
24 bona bitimu nubahoi hai wahenda,
hai dikemu molambi worihe kiranda.”
25 O Pue Ala, ope-opehe tauna moita karabanduMu i penangiMu;
Pue Ala, Datungku au kupenombai, Oio raanti i paidaa au malelaha.
26 Au molumaohe ioru toponani; au i taleu topokecapi;
hai au i tanga anantowawine au mokaleahe rebana.
27 Node naninda,
“Toiami Pue Ala i poteruhua taunaNa.
Ope-opekau pemuleana Yako, nitoiami Pue!”
28 Pemuleana Benami, au barahe bosa, molumao iorunda;
roo indo, meulahe tadulakonda to Yehuda;
i bokonda tadulakonda Sebulo hai Naptali.
29 O Pue Ala, wuroho rohoMu,
patongawa kamarohoMu
nodo kaNuperuruingki hangkoia.
30 Bosahe datu moanti popenombanda Irio
i souMu i Yerusale.
31 Kambaroahe iwaliMu au nodohe binata maila.
Kontohe tauna au maroho hai au makuasa i humalele dunia!
Pangka-pangkahe au mohaoki peahe salaka;
Nuhawu-hawuhe tauna au raunde peami mombeala.
32 I kamananginda, to Masiri ina moantihe parewa-parewa tambaga
hai to Etiopia hoholigahe moanti popenombanda i Pue Ala.
33 Ee ope-ope kadatua i dunia, niponani petoia i Pue Ala.
Nitoiami!
34 Ia au hangkoiami mampolumaongi laerawa.
Pehadingi! Pue Ala mongkora hangko i langi; wotuNa nodo gumpata.
35 Nibambari kamakuasana Pue Ala.
PeawaNa ara i to Isaraeli;
kamakuasaNa hawe i langi.
36 Melangaki kuasana Pue Ala hangko i paidaaNa au malelaha.
Pue Ala au rapenombai to Isaraeli, mokiraia kamakuasa
hai karoho i taunaNa.
Tetoiami Pue Ala.