Petoia 67

Pepomahile i Pue Ala anti hinangka pewatiNa

1 Idemi nani petoia au rapahawe i tadulako toponani hai au raponani hai kecapi.

2 Taperapi i Pue Ala bona Napokaahike,

Nawatike hai Nakamata liliuke i kabulana laluNa.

3 Kiperapi bona raraMu hai peundeaMu raisa i humalele dunia,

hai pehoremaMu rapatongawa i ope-ope tauna.

4 O Pue Ala, kiperapi bona tauna i hinangka ngamba motoiaKo,

hai ope-ope tauna mampomahileKo hangko i katana lalunda.

5 Kiharunga bona tauna hangko i hinangka ngamba matana-tanahe hai monanihe Irio,

lawi moparentaKo i lalu kanoto

hai moniniKo tauna i hinangka ngamba i dunia.

6 O Pue Ala, kiharunga bona tauna hangko i hinangka ngamba motoiaKo,

hai ope-ope tauna mopahawehe katana lalunda Irio.

7 Tampo au ratudai rapupumi wuana;

Pue Ala au tapenombai mowatike.

8 Pue Ala mowatike

bona Ia rabila i humalele dunia.