Nani pepomahile hai katana lalu
66
1 Idemi nani petoia au rapahawe i tadulako toponani.
Ee tauna i humalele dunia,
mogee-geemokau i lalu katana
mampomahile Pue Ala.
2 Niponani peawana hangaNa;
nipomahile Pue Ala hai nani petoia.
3 Niuli i Pue Ala, “Rumihi mpuu kamahilena bagoMu.
Anti kamakuasaMu, iwaliMu meampuhe Irio hai langahe.
4 Humalele dunia menombahe Irio,
monanihe motoia hangaMu.”
5 Laokau hai nipeita hinangka au Nababehi Pue Ala;
mewulungai mpuu bagoNa i olonda manusia.
6 Tahi Nabaliki mewali tampo bangi,
inditimohe toiorungki molumao bona wetahe.
Idomi hai hangangaa matana-tanake anti kamakuasaNa.
7 Ia moparenta hai kuasaNa i hae-haena.
Ia mokamata humalele tauna,
bona ope-ope tauna au meewa i Pue barahe peisa mantindora.
8 Ee humalele tauna, toiami Pue Ala au kipenombai,
hai hinangka petoiami nipopahadi Iria.
9 Nakadipura liliu katuwongki,
hai barangkai Napogiangaa manawo.
10 O Pue Ala, Nupetandakamongkai,
nodo tauna mohowu salaka.
11 Nupogiangaamongkai kana hea,
hai Nuweingkai halea au mantimi.
12 Nupogiangaamongkai rapangka-pangka iwalingki;
mampolumaongimongkai api hai owai,
agaiana Nupopesuwungkai hai Nuantingkai lao i tampo au marudu.
13 Ina mesuana i souMu hai mohuhuna hinangka popenomba au raintu,
Ina mopabukeina dandiku Irio
14 au nahowarami humengku
i tempoku mapari.
15 Kuhuhu Irio popenomba au rahuwe hangko i binata au marudu
iami towau, dimba hai japi laki,
au rambuna mengkaore hawe i langi.
16 Ikamu au langakau i Pue Ala
maikau; ina kupahaweakau
apa au nababehi Pue Ala i watangku.
17 Merapi tulungina Iria,
hai mamponanina petoia Iria.
18 Ane rapana ara tunggaia au kadake i lalungku,
hangangaa barana Napehadingi Pue.
19 Agaiana Napehadingimi Pue Ala peraroangku.
Nahanaimi pekakae au kupahawe Iria.
20 Tatoiami Pue Ala au bara moae pekakaengku,
hai au bara mabotu-botu kamaahiNa iriko.