Nani petoia anti pewatina Pue Ala
65
1 Idemi nanina Daudi au napahawe i tadulako toponani.
2 O Pue Ala, Irio pea hinangka petoia i Sion,
hai Irio kipabukei apa au kidandi.
3 Oiomi au mopabukei pekakaengki;
ope-ope tauna maihe Irio lawi madosamohe.
4 Barapi kibuku mohalea salangki
Oiomi au mokabahangkai.
5 Morasi mpuuhe tauna au Nupilei hai au Nukakio
lao i tabangaa souMu
Pogiangaangkai mabuhu hangko i hinangka au maroa i souMu,
paidaaMu au malelaha.
6 O Pue Ala au mohoremangkai, hai kuasaMu au melangaki
hai i kamanotoMu Nuhanai pekakaengki.
Oiomi au raharunga ope-ope tauna
au maida i humalele dunia.
7 Oio au mopatogo bulu hai rohoMu
bona mopatongawa kuasaMu au mahile.
8 Oio au mopamaora gumuru tahi hai hinangka balumbana;
Nupalene posisala humalele tauna.
9 Idomi hai ope-ope tauna au maida i humalele dunia,
tingkarahe moita hinangka au Nubabehi au mewulii.
Ope-ope tauna hangko i Mata alo hawe i Katampua alo
Nupamatana-tanahe.
10 Tampo ide Nukadipura hai Nuudahi,
Nupamarudu alana ngkaia wuana;
ope-ope poilia owai Nubukehi.
Nupasilolonga pare i tampo iti,
nodomi kaNupasilolongana ope-ope moula tunggaiaMu.
11 Nuowaihi popajekoanda,
hai ogu-ogu tampo Nuwurui;
Nupamagara hai uda, Nuwati tuda-tudana
bona marudu katuwona.
12 Anti kamaroaMu, i pare-parena Nupasilolonga wua tuda-tuda au handaka;
iumba kalaoaMu, indo pewati au melabi-labi.
13 I pada wungi au bangi, tuwomi hehi au marudu;
ope-ope bulu matana-tanahe.
14 Hinangka pada au maemba hambimi nakomoki dimba,
hinangka lembo nabalungkuhi pare.
Monani-nani hahahe anti kamatananda.