Pehukuna Pue Ala i tauna au kadake babehianda
64
1 Idemi nanina Daudi au napahawe i tadulako toponani.
2 O Pue Ala, pehadingi wotungku ane mogiluna;
kampaina hangko i iwali au melangaki.
3 Nukampaina hangko i pohintuwunda tauna au kadake,
hai tunggaianda tauna au mobabehihe dake.
4 Mopamataruhe dilanda nodo piho,
potendenda lolita mehoi hai metohu nodo pana.
5 Hangko i kawuniana mopanakahe pananda i tauna au manoto laluna.
Barahe langa-langa, unga peahe mopana tauna.
6 Barahe mokabaha tunggaianda au kadake.
Mohintuwuhe mokae ngkabuni tilobu,
rauli, “Hema pae au moita!”
7 Mampogombohe hinangka dake, rauli,
“Masilolongamongkai lawi tunggaia ide lehami kipololita!”
Mapande mpuu pekirinda meakalangi hai lalunda bara peisa tagao.
8 Agaiana Pue Ala mopanaka panaNa irihira,
hai unga peahe bela.
9 Pue mopakarugihe anti pololitanda haduduanda;
ope-ope au moita kamaruginda, molili-liliahe waanda.
10 Mewali ope-ope tauna ina langahe i Pue Ala
hai mobambarihe apa au Nababehimi.
Itimi au ina rapailalu.
11 Tauna manoto ina mampokatana kamakuasana Pue,
hai ina meongahe Iria.
Ope-ope tauna au manoto babehianda ina motoia hangaNa.