Pekabilai i Pue Ala
63
1 Idemi nanina Daudi au nauki tempona i pada wungi Yehuda.
2 O Pue Ala, Oio mpuumi Pue Ala au kupenombai,
kuhaoki ntepuuKo hai kukabilai mpuuKo.
Kamabilangku Irio
nodo tampo bangi au moparaluu owai.
3 Mewali kutotokiKo i paidaaMu au malelaha,
hai kuita karohoMu hai peawaMu.
4 Anti kamaahiMu au melumbu pobunduna hangko i katuwo,
idomi hai ina kupomahileKo;
5 ina kutoiaKo hawe i tampana tinuwungku.
Ina kuangka taiengku hai mekakaena Irio.
6 KupomahileKo i lalu katana-tana,
lawi Nupamabuhumi tanoanangku hai paande au matama.
7 Ane maturumona KubuhuinaoKo,
kupepekiriKo hahambengia,
8 lawi Oiomi au motulungina
hai monanina matana-tana i pebambaongaakina kapiMu.
9 Lalungku mentaka Irio,
taie koanaMu moharongina.
10 Agaiana tauna au motunggaihe mopaope inaongku,
ina manawohe i lapi tampo.
11 Ina matehe i lalu pombeala,
ina mewalihe paandenda binata maila.
12 Agaiana datu ina matana-tana anti kanatulungina Pue Ala;
ope-ope tauna au modandi i lalu hangana Pue Ala ina motoiahe hangaNa,
agaiana tauna au modongko ina rasisingi nganganda.