Tauna au hungku i Pue Ala lene katuwona
62
1 Idemi nanina Daudi au napahawe i tadulako toponani to Yedutun.
2 Batena pea hungku i Pue Ala, katuwongku ide lene;
Hangko Iria pea katehoremangku.
3 Batenami Ia bulu watungku hai Topehoremangku;
Ia benteku au maroho bara bata-bata lalungku.
4 Hangkia mani kamahaena mobungkakau hadua
au nodomi rindi dumba
hai wala au ina mapoka?
5 Tunggaiami, monawo peakau hadua
hangko i pohudaana au mapangka.
Mampololita peakau dongko; humemi mohowara pewati,
agaiana lalumi metunda-tunda.
6 Batenami hungku i Pue Ala, katuwongku ide lene;
hangko Iria pea peharungangku.
7 Batenami Ia bulu watungku hai Topehoremangku;
Ia benteku au maroho, bara bata-bata lalungku.
8 Hangko i Pue Ala pea katehoremangku hai kateadaingku;
bulu watu rohongku hai peongaangku iami Pue Ala.
9 Ee taunangku, poinalai liliu Pue Ala.
Nihowara hinangka ihi lalumi Iria,
Pue Ala iami peongaanta.
10 Topeahi-ahi nodo peahe pewui himburu;
dongko peahe tauna au pebuku;
hihimbelahe bara ara holonda.
Ane ratimbahe, mangaa manihe hangko i himburu.
11 Ineekau meharunga i pehihipi
hai ineekau mampopangewa parewa au niperampai.
Ane kapebukumi tetambai,
inee mentaka lalumi i anu-anu iti.
12 Hambela Pue Ala mongkora,
ara rompaka au kuhadi;
ope-ope kuasa batena pea hangko i Pue Ala,
13 hai kamaahi au bara mokahopoa hangko Iria pea.
O Pue, Oio mohurungi
hadua-hadua tauna hintoto hai babehianda.